នាយករដ្ឋមន្ត្រីកម្ពុជា លោក ហ៊ុន សែន ថ្លែងអរគុណប្រទេសថៃ ពិសេសខេត្តត្រាត ដែលជាខេត្តជាប់សមុទ្រដូចគ្នា សន្យាជួយផ្តត់ផ្គង់ទឹកដល់ខេត្តកោះកុង សម្រាប់ប្រើប្រាស់ក្នុងរដូវប្រាំងដែលកំពុងប្រឈមនឹងការខ្វះទឹក ។
ការថ្លែងរបស់នាយករដ្ឋមន្ត្រីកម្ពុជា ធ្វើឡើងក្នុងពិធីជួបសំណេះសំណាលជាមួយកម្មករនៅខេត្តកោះកុង នាថ្ងៃពុធនេះ។
ក្នុងពិធីនោះលោក ហ៊ុន សែន ថ្លែងថា ខេត្តកោះកុងពេលនេះកំពុងប្រឈមនឹងការអត់ទឹកប្រើប្រាស់ ប៉ុន្តែ លោកថា រដ្ឋមន្ត្រីក្រសួងការពារជាតិលោក ទៀ បាញ់ បានប្រាប់លោកថា អាជ្ញាធរថៃខេត្តត្រាតជាប់សមុទ្រដូចគ្នា បានសន្យាជួយផ្គត់ផ្គង់ទឹកសម្រាប់ប្រើប្រាស់ក្នុងរដូវប្រាំងនេះ។
លោកថា៖ «ខ្ញុំសុំយកឱកាសនេះ អរគុណព្រះរាជាណាចក្រថៃ ចំពោះខេត្តត្រាត ដែលបានជួយផ្គត់ផ្គង់ទឹក ជួយមកកាន់ខេត្តកោះកុង។ បញ្ហានៅត្រង់ថា តើយើងត្រូវរៀបចំបណ្តាញទឹកយ៉ាងម៉េចជាបណ្តោះអាសន្ន ដើម្បីតទុយោគ្នា ដើម្បីទាញទឹកយកមកផ្គត់ផ្គង់»។
ទោះជាយ៉ាងណា លោកនាយករដ្ឋមន្ត្រីអះអាងថា លោក លី យ៉ុងផាត់ កំពុងសាងសង់ប្រព័ន្ធផ្គត់ផ្គង់ទឹកសម្រាប់ឆ្លើយតបទៅនឹងតម្រូវការរបស់ពលរដ្ឋនៅខេត្តកោះកុងនេះ ហើយថានឹងរួចរាល់នៅពេលឆាប់ៗ។
អំឡុងឆ្នាំ២០១៨ ពលរដ្ឋមួយចំនួននៅខេត្តព្រះសីហនុ បានបង្ហាញការព្រួយបារម្ភថា ពួកគេនឹងខ្វះទឹកប្រើប្រាស់ បើបឹងធម្មជាតិព្រែកទប់ ធ្លាប់ជាប្រភពទឹកសាបសម្រាប់ផលិតទឹកស្អាត សម្រាប់ប្រើប្រាស់នោះ ត្រូវបានអ្នកមានអំណាចមួយចំនួនចាក់ដីលុបរំលោភយកធ្វើជាកម្មសិទ្ធិ ។
បឹងព្រែកទប់ ស្ថិតនៅក្នុងភូមិ១ សង្កាត់លេខ៣ ក្រុងព្រះសីហនុ ។ បើតាមពលរដ្ឋ ផ្ទៃបឹងនេះមានទំហំ៦០ហិកតា ហើយបច្ចុប្បន្ននេះនៅសល់តែជាង ១៦ហិកតាប៉ុណ្ណោះ។
ប៉ុន្តែ នៅថ្ងៃទី១៨ ខែតុលា ឆ្នាំ២០១៨ អាជ្ញាធរខេត្ត បានចេញលិខិតមួយបំភ្លឺថា ទឹកព្រែកទប់ មិនអាចយកមកផ្គត់ផ្គង់បានទៀតទេ ដោយថា ទឹកបឹងនេះក្លាយជាទឹកស្អុយ ហើយថា បច្ចុប្បន្នទឹកស្អាតត្រូវទាញយកពីព្រែកទឹកសាបក្បាលឆាយមកប្រើប្រាស់ជំនួសវិញ។
អាជ្ញាធរខេត្តបញ្ជាក់ ក្នុងលិខិតនោះថា ដីមួយផ្នែកទំហំជាង១១ហិកតា រដ្ឋាភិបាលសម្រេចកាត់ឲ្យអ្នកវិនិយោគ កែលម្អបឹងធម្មជាតិមួយនេះ ទៅជាតំបន់ទេសចរណ៍វិញ។
