មន្ត្រីជាន់ខ្ពស់ក្រសួងការពារជាតិកម្ពុជា អះអាថា សមយុទ្ធនាគមាសរួមគ្នារវាងកងយោធពលខេមរភូមិន្ទ និងកងទ័ពរំដោះប្រជាជនចិនចាប់ផ្តើមថ្ងៃនេះ មិនមានការគំរាមគំហែងដល់អ្នកណានោះទេ ប៉ុន្តែ ដើម្បីពង្រឹងទំនាក់ទំនងកងទ័ពប្រទេសទាំងពីរឲ្យកាន់តែរឹងមាំ។
អ្នកនាំពាក្យក្រសួងការពារជាតិ លោក ឈុំ សុជាតិ បានសរសេរបង្ហោះលើទំព័រហ្វេសប៊ុកថា សមយុទ្ធនាគមាស ឆ្នាំ២០១៩ រវាងកងទ័ពកម្ពុជា-ចិន បានបើកជាផ្លូវការនៅថ្ងៃនេះហើយ នៅស្រុកជុំគីរី ខេត្តកំពត ដែលមានអគ្គមេបញ្ជាការនៃកងយោធពលខេមរភូមិន្ទ លោក វង្ស ពិសេន ចូលរួមបើកកម្មវិធីនេះ។
លោក ឈុំ សុជាតិ លើកឡើងថា លំហាត់ហ្វឹកហ្វឺននេះ មិនមានការគំរាមគំហែងដល់អ្នកណានោះទេ។ លោកថា សមយុទ្ធនេះ គឺសម្រាប់ចូលរួមថែរក្សា សន្តិសុខក្នុងតំបន់ តាមរយៈការផ្លាស់ប្តូរបទពិសោធគ្នាតែប៉ុណ្ណោះ និងជាពិសេសប្រយុទ្ធប្រឆាំងអំពើភេវរកម្ម ព្រមទាំងជួយសង្គ្រោះប្រជាពលរដ្នពេលមានគ្រោះមហន្តរាយធម្មជាតិ។
ប្រភពដដែលបន្តថា លំហាត់នាគមាស ឆ្នាំ២០១៩ គឺជាការចូលរួមចំណែកជំរុញទំនាក់ទំនងមិត្តភាពកម្ពុជា- ចិន ឱ្យកាន់តែរឹងមាំបន្ថែមទៀត។
នៅក្នុងសមយុទ្ធនេះ ភាគីកម្ពុជាចូលរួម២៥៤២នាក់ និងភាគីចិន២៥២នាក់ ព្រមទាំងមានកម្លាំងបម្រើការក្នុងលំហាត់ចំនួន៤៤៨នាក់ និងកម្លាំងចូលរួមពិធីបើកនិងបិទចំនួន១៦៨៥នាក់។ អាវុធយុទ្ធភ័ណ្ឌសំខាន់ៗដែលប្រើប្រាស់ឆ្នាំនេះមាន រថពាសដែក រថក្រោះ កាំភ្លើងធំ កាំភ្លើងត្បាល់ ឧទ្ធម្ភាគចក្រ។
សមយុទ្ធលើទី៣នេះ បើកនៅថ្ងៃទី១៣ ខែមីនា និងបិទវិញនៅថ្ងៃទី២៧ ខែមីនា ឆ្នាំ២០១៩ ខាងមុខនេះដែលមានការចូលរួមពីលោករដ្ឋមន្រ្តីក្រសួងការពារជាតិ ទៀ បាញ់។
កងទ័ពកម្ពុជា-ចិន បានធ្វើលំហាត់នាគមាស នៅក្នុងប្រទេសកម្ពុជាចំនួន២លើករួចមកហើយ ដោយលើកទី១ នៅឆ្នាំ២០១៦ និងលើកទី២ នៅឆ្នាំ២០១៨។
