ភរិយាលោក រ៉ាត់ រត្នមុនី អ្នកអ្នកបកប្រែឲ្យសារព័ត៌មានរុស្ស៊ី RT អះអាងថា អ្នកដែលទៅចូលរួមតវ៉ាជាមួយអ្នកស្រីនៅមុខស្ថានទូតរុស្ស៊ីត្រូវបានគេគំរាមកំហែង។
ថ្លែងប្រាប់ VOD តាមទូរស័ព្ទនៅថ្ងៃទី១៣ ខែមីនា នេះ អ្នកស្រី ឡុង គឹមហ៊ាង អះអាងថា អ្នកដែលទៅចូលរួមតវ៉ានៅមុខស្ថានទូតរុស្ស៊ីជាមួយអ្នកស្រីជារៀងរាល់សប្ដាហ៍ គឺឈប់ទៅអស់ហើយ ក្រោយពីមានគេគំរាមកំហែងជាបន្តបន្ទាប់។
អ្នកស្រីថា៖ «គេគំរាមកំហែងតាមទូរសព្ទប្រាប់ថា កុំឲ្យមកចូលរួម កុំឲ្យមកជួយប្រយ័ត្នមានបញ្ហាដល់ខ្លួនឯង ប្រយ័ត្នជាប់គុក ប្រយ័ត្នងាប់ អញ្ចឹងទៅ គ្រប់រូបទាំងអស់ហ្នឹង ហើយដល់ពេលអញ្ចឹងទៅ អ្នកទាំងអស់ហ្នឹង អត់បានមកចូលរួមជាមួយខ្ញុំទេ ថ្ងៃសកម្មភាពហ្នឹង។ អញ្ចឹងសម្រាប់ទាំងអស់ហ្នឹង រូបភាពបែបហ្នឹងឯងដែលធ្វើឲ្យអ្នកគាំទ្រអត់បានមកចូលរួមជាមួយខ្ញុំ។ ខ្ញុំមិនដឹងថា អ្នកណានៅពីក្រោយទេ គ្រាន់តែឃើញរូបភាពបែបហ្នឹងធ្វើឲ្យអ្នកចូលរួមអត់អាចមកបាន»។
អ្នកស្រី គឹមហ៊ាង យល់ថា ការគំរាមកំហែងអ្នកគាំទ្រមិនឲ្យចូលរួមតវ៉ានេះ គឺចង់ឲ្យអ្នកស្រីបោះបង់ការតស៊ូមតិ ដើម្បីទាមទារឲ្យមានការដោះលែងប្ដីរបស់គាត់។ អ្នកស្រីបន្តថា ទោះបីជាអ្នកគាំទ្រមិនបានទៅចូលរួមជាមួយក៏ដោយ ក៏អ្នកស្រីនឹងមិនបោះបង់ការតស៊ូមតិ ដើម្បីស្វែងរកយុត្តិធម៌ឲ្យប្ដីដែរ។
លោក រ៉ាត់ រត្នមុនី កាលពីថ្ងៃទី១៣ ខែធ្នូ ឆ្នាំ២០១៨ ត្រូវបានតុលាការកម្ពុជាចោទប្រកាន់នឹងបញ្ជូនទៅឃុំខ្លួននៅពន្ធនាគារព្រៃស ក្រោយលោកចូលរួមផលិតខ្សែភាពយន្តឯកសាររបស់ស្ថានីយទូរទស្សន៍រុស្ស៊ី RT រឿង «ម្ដាយខ្ញុំលក់ខ្ញុំ»។ លោក ត្រូវបានចោទប្រកាន់ក្រោមបទថា ញុះញង់ឲ្យមានការរើសអើង តាមមាត្រា៤៩៦ នៃក្រមព្រហ្មទណ្ឌ និងបញ្ជូនទៅឃុំខ្លួននៅពន្ធនាគារព្រៃស បន្ទាប់ពីគាត់ត្រូវបានប្រទេសថៃចាប់បញ្ជូនត្រលប់មកកម្ពុជាវិញ។
បន្ទាប់ពីឃុំខ្លួនលោក រត្នមុនី ភរិយារបស់លោកតែងតែតវ៉ាជាបន្តបន្ទាប់ ដោយថា ការឃុំខ្លួនប្ដីរបស់អ្នកស្រី គឺអយុត្តិធម៌បំផុតសម្រាប់ការរាយការណ៍ពីរឿងពិតក្នុងសង្គម។