រដ្ឋមន្ត្រីក្រសួងមហាផ្ទៃ លោក ស ខេង បានព្រមានមន្ត្រីក្រោមឱវាទកុំឲ្យមានការឃុបឃិតគ្នាជាមួយអ្នកប្រព្រឹត្តបទល្មើស ដើម្បីធានាសុខមាលភាពជូនពលរដ្ឋ និងប្រទេសជាតិ។
ក្នុងពិធីដុតបំផ្លាញផលិតផលក្លែងក្លាយដែលធ្វើឡើងក្នុងរាជធានីភ្នំពេញកាលពីម្សិលមិញ លោក ស ខេង ថ្លែងថា បញ្ហាផលិតផលក្លែងក្លាយ និងបទល្មើសគ្រឿងញៀន គឺបង្រ្កាបមិនចេះអស់ ដោយលោកថា ការបង្ក្រាបនោះធ្វើបានចំពោះតែអ្នកប្រើប្រាស់ និងអ្នកចែកចាយបន្តតូចតាចប៉ុណ្ណោះ។
លោក ស ខេង ព្រមានមន្រ្តីពាក់ព័ន្ធរបស់ខ្លួនកុំឲ្យចិញ្ចឹមបញ្ហាដើម្បីទទួលបានផលប្រយោជន៍ ដោយលោកជំរុញឲ្យធ្វើការបង្ក្រាបឲ្យបានប្រសិទ្ធិភាព។
លោកបន្ថែមថា៖ «សុំស្នើថា ទី១ យើងត្រូវបន្តធ្វើការងារនេះ ឥលូវនេះមានយន្តការអីច្បាស់លាស់ណាស់ មានការចូលរួមពីក្រសួង ស្ថាប័ននានា ដូច្នេះត្រូវធ្វើ ហើយកុំមានទស្សនៈចិញ្ចឹមបញ្ហា ព្រោះតែអស់បញ្ហាហ្នឹងអស់ការងារធ្វើហើយ បើយើងត្រូវចិញ្ចឹម បញ្ហាហ្នឹងឲ្យវានៅយូរបន្តិចទៅឲ្យមានការងារធ្វើ បើមានទស្សនៈអញ្ចឹងរលាយហ្មង។ នេះដែលខ្ញុំកត់សម្គាល់ ហើយខ្ញុំចង់ បញ្ជាក់ថា យើងត្រូវបន្តធ្វើ ហើយធ្វើដោយទទួលខុសត្រូវ ហើយតម្លាភាព»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ បានសាទរចំពោះប្រសាសន៍លោក ស ខេង ដោយថា កន្លងមកមានការសង្ស័យទៅលើមន្ត្រីអនុវត្តច្បាប់ជាច្រើនដែលជាប់ពាក់ព័ន្ធការនៅពីក្រោយបទល្មើសផលិតផលក្លែងក្លាយ និងបទល្មើសគ្រឿងញៀន។
លោកបន្ថែមថា៖ «ការបង្រ្កាប គឺជាវិធានការមួយដែលចាំបាច់ត្រូវតែពិនិត្យមើលលើឬសគល់នៃបញ្ហា ហើយត្រូវតែផ្តាច់ឬសគល់នៃបញ្ហានោះចោល ទើបមានប្រសិទ្ឋភាពនៃការអនុវត្តច្បាប់ ព្រោះយើងក៏មានការសង្ស័យបញ្ហាទំនាស់ផលប្រយោជន៍អ្នករកស៊ី អ្នកខុសច្បាប់រវាងអ្នកចុះអនុវត្តច្បាប់ហ្នឹងតែម្តង។ ថ្មីៗនេះយើងឃើញករណីមួយ ពេលដែលសមត្ថកិច្ចចុះបង្ក្រាបនោះ ឃើញមានវត្តមានទាហានស័ក្កិបីម្នាក់លេចមុខនៅកន្លែងដែលសមត្ថកិច្ចកំពុងអនុវត្តច្បាប់ដែរ។ អញ្ចឹងសួរថា នេះជាឬសគល់នៃបញ្ហា ហើយថាវិធានការត្រូវបង្រ្កាបនោះត្រូវធ្វើយ៉ាងដូចម្តេច!»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព (PDP-Center) លោក យង់ គិមអេង មានប្រសាសន៍ថា ប្រសិនបើរដ្ឋាភិបាលបង្ក្រាប និងទប់ស្កាត់បទល្មើសផលិតផលក្លែងក្លាយ រួមទាំងបញ្ហាគ្រឿងញៀនមិនមានប្រសិទ្ធភាពទេ នឹងធ្វើប៉ះពាល់យ៉ាងធ្ងន់ធ្ងរទៅដល់សុខភាពប្រជាពលរដ្ឋ និងសង្គមជាតិ។
លោកបន្ថែមថា៖ «កាលណាមនុស្សឈឺទៅពេទ្យ រដ្ឋត្រូវអស់លុយចំណាយព្យាបាល ហើយគ្រួសារពលរដ្ឋក៏ត្រូវអស់លុយអស់កាក់ ដើម្បីចំណាយលើការព្យាបាលដែរ នេះជារឿងមួយសំខាន់ រដ្ឋក៏ខាតបង់ ប្រជាពលរដ្ឋក៏ខាតបង់។ យើងឃើញហើយកន្លងមកប៉ះពាល់ដល់ក្រលៀន កើតមហារីក និងជំងឺផ្សេងៗហូរហែរ ជាផលប៉ះពាល់ធំមួយដែលយើងមានការបារម្ភ។ អញ្ចឹង ប្រសិនជាមានការបង្ក្រាប គឺអាចកាត់បន្ថយផលប៉ះពាល់ទាំងអស់ហ្នឹងបាន។ ហើយជាការបង្ហាញឆន្ទៈពិតប្រាកដរបស់រដ្ឋក្នុងការទទួលខុសត្រូវចំពោះសុខមាលភាពរបស់ប្រជាពលរដ្ឋ»។
បើតាមលោក ស ខេង យុទ្ធនាការបង្ក្រាបគ្រឿងញៀនជិត២ឆ្នាំមកនេះ សមត្ថកិច្ចរឹបអូសបានគ្រឿងញៀនជិត៥០០គីឡូក្រាម ខណៈសមត្ថកិច្ចមិនបានបង្ហាញចំនួនឧក្រិដ្ឋជនគ្រឿងញៀនប៉ុន្មាននាក់ត្រូវនាំខ្លួនមកផ្តន្ទាទោសនោះទេ។
ចំណែកឯរបាយការណ៍របស់គណៈកម្មាធិការប្រយុទ្ធប្រឆាំងផលិតផលក្លែងក្លាយបានឱ្យដឹងថា ក្នុងរយៈពេល ១២ខែ កាលពីឆ្នាំ២០១៧ ស្ថាប័ននេះបានរឹបអូសផលិតផលក្លែងក្លាយ រួមនឹងគ្រឿងទេសក្លែងក្លាយខុសច្បាប់ចំនួនប្រមាណ៦០០តោន។ ក្រោយមកនៅក្នុងឆ្នាំ២០១៨ សមត្ថកិច្ចបានរឹបអូសទំនិញក្លែងក្លាយ ហើយដុតបំផ្លាញចោលជាបន្តបន្ទាប់ដែលមានជាង២០០តោន ខណៈនៅដើម២០១៩នេះ សមត្ថកិច្ចក៏បានចុះបង្រ្កាបបានទំនិញក្លែងក្លាយរាប់រយតោនផងដែរ៕