មេដឹកនាំបក្សកាន់អំណាច លោក ហ៊ុន សែន ព្រមានរឹបអូសទ្រព្យសម្បត្តិពីដៃគូប្រកួត បើឈ្នះក្តី ក្នុងសំណុំរឿងថ្មីមួយទៀត ដែលលោកអះអាងថា ទារសំណង២លានដុល្លារ។
លោក ហ៊ុន សែន ក្នុងពិធីសំណេះសំណាលជាមួយកម្មករនៅខេត្តកោះកុង នាថ្ងៃពុធនេះ បានថ្លែងថា លោកបានប្រាប់មេធាវីរបស់លោករួចហើយ ឲ្យរៀបចំភស្តុងតាងដែលប្រមូលបានលើបណ្តាញសង្គមប្តឹងទៅតុលាការ ទាក់ទិននឹងការជេរប្រមាថរូបលោកពីសំណាក់អ្នកនយោបាយដែលលោកមិនបញ្ចេញឈ្មោះ។
លោកថា៖ «ឥឡូវហ្នឹង គឺថា មានជាង៣០ដែលអ្ហែងបង្ហោះប្រមាថជីវិតអាញ់។៣២ៗ អញ្ចឹង បើវាចេញមកថ្ងៃហ្នឹងទៀត បានការយើងទៀតហើយ ប្រមូលធ្វើជាវត្ថុតាងរឹបអូសទ្រព្យសម្បត្តិអ្ហែងនៅក្នុងស្រុកអត់ទេ ទារមិនតិចជាង២លានដុល្លារទេ ប្រាប់ឲ្យហើយ។ ដើម្បីកុំឲ្យវាឈ្លើយ និយាយឡើង អាផុសចុងក្រោយនេះ ទំនាយលោក ហ៊ុន សែន ចំកន្លែងកំបុតក កំបុតកអ្ហែង មិនកំបុត!»។
ទោះជាលោកនាយករដ្ឋមន្ត្រីថ្លែងមិនបញ្ចេញឈ្មោះ ក៏គេអាចដឹងថា ការថ្លែងនោះទំនងសំដៅទៅអតីតមដឹកនាំបក្សប្រឆាំង លោក សម រង្ស៊ី ដោយសារតែលោក ហ៊ុន សែន ថ្លែងថា លោកខកចិត្តការប្តឹងកន្លងទៅទារតែ១០០រៀល ។
បន្តឹងទារសំណងជំងឺចិត្ត១០០រៀលនោះ លោក គី តិច ជាមេធាវីការពារក្តីឲ្យលោកនាយករដ្ឋមន្ត្រីនោះ បានប្តឹង លោក សម រង្ស៊ី និងមន្ត្រីបក្សប្រឆាំងមួយរូបទៀត គឺលោកស្រី ថាក់ ឡានី អំឡុងឆ្នាំ២០១៦ ទារសំណងជំងឺចិត្ត១០០រៀល ដែលទាក់ទិនទៅនឹងការនិយាយថា រដ្ឋាភិបាលជាអ្នកនៅពីក្រោយការសម្លាប់លោក កែម ឡី។
លោក សម រង្ស៊ី មិនទាន់ឆ្លើយតបសំនួររបស់ VOD តាមសារអេឡិចត្រូនិចនៅឡើយទេ គិតត្រឹមថ្ងៃពុធនេះ ជុំវិញសារព្រមានរបស់លោក ហ៊ុន សែន។
អ្នកវិភាគវ័យក្មេង កញ្ញា លី ស្រីស្រស់ វិភាគថា បើគេពិនិត្យពីទិដ្ឋភាពច្បាប់ ឥទ្ធិពលនយោបាយបានគ្រប់ដណ្តប់ស្ទើរទាំងអស់រួចទៅហើយ។ កញ្ញាថា រីឯការដែលលោក ហ៊ុន សែន គំរាមប្តឹង និងរឹបអូសទ្រព្យសម្បតិ្តពីដៃគូប្រកួត ក៏មិនមែនជារឿងថ្មី បម្រើដល់ផលប្រយោជន៍ជាតិដែរ។
កញ្ញា លី ស្រីស្រស់ វិភាគទៀតថា សារនយោបាយរបស់មេដឹកនាំនៅថ្ងៃនេះ បង្ហាញថា រដ្ឋាភិបាលមិនបានត្រៀមខ្លួនទៅរកដំណោះស្រាយនយោបាយ ដើម្បីការពារពារប្រយោជន៍ជាតិដែលកំពុងប្រឈមនឹងការបាត់បង់នៅពេលខាងមុខ ដោយសារទណ្ឌកម្មអន្តរជាតិនោះទេ។
កញ្ញាថា៖ «យើងកំពុងជួបប្រទះលើការគំរាមកំហែង លើការដាក់ទណ្ឌកម្មសេដ្ឋកិច្ចពីសហភាពអឺរ៉ុប ហើយអ្វីដែលនាយករដ្ឋមន្ត្រីកំពុងតែចាប់អារម្មណ៍ហ្នឹង គឺទៅចាប់អារម្មណ៍រឿងអ្វីផ្សេងអញ្ចឹងទៅ។ អញ្ចឹង បើយើងមើលពីចំណុចនេះ យើងហ៊ានសន្និដ្ឋានបានថា រដ្ឋាភិបាលហ្នឹង ហាក់មិនបានផ្តោតលើចំនុចស្នូលសំខាន់សម្រាប់ការដោះស្រាយពីការជាប់គាំងនយោបាយនោះទេ»។
ជម្លោះនយោបាយនៅកម្ពុជា រវាងគណបក្សកាន់អំណាច និងអតីតគណបក្សសង្គ្រោះជាតិ បានអូសបន្លាយជិត២ឆ្នាំមកហើយ ដែលជម្លោះនោះបានផាត់គណបក្សប្រឆាំងចេញពីឆាកនយោបាយ លោក សម រង្ស៊ី បន្តនិរទេសខ្លួន ដោយសារតែជាប់បណ្តឹង លោក ហ៊ុន សែន មួយចំនួន ។
ចំណែកមេបក្សប្រឆាំងមួយរូបទៀត គឺលោក កឹម សុខា មិនទាន់ដោះលែងនៅឡើយទេ ទោះការឃុំខ្លួនមានរយៈពេលជាង១៨ខែហើយក៏ដោយ។
ជម្លោះផ្ទៃក្នុងរបស់កម្ពុជានេះ ជំរុញឲ្យប្លុកលោកសេរី នាំមុខគេដោយសហរដ្ឋអាមេរិក និងសហភាពអឺរ៉ុប គំរាមដាក់ទណ្ឌកម្មសេដ្ឋកិច្ច បើមិនស្តារប្រជាធិបតេយ្យឡើងវិញ ពិសេស សហភាពអឺរ៉ុបកំពុងដំណើរការព្យួរប្រព័ន្ធអនុគ្រោះពន្ធ EBA ដោយថា ដើម្បីដាក់សម្ពាធឲ្យដោះលែងលោក កឹម សុខា។