មន្ត្រីជាន់ខ្ពស់ក្រសួងផែនការអះអាងថា មូលហេតុដែលធ្វើជំរឿនប្រជាជននៅខេត្តព្រះសីហនុដំណើរការយឺត គឺពាក់ព័ន្ធការអភិវឌ្ឍដំណើរការការដ្ឋានសំណង់ច្រើន និងបញ្ហាមួយទៀតបញ្ហាភាសាទំនាក់ទំនង។
អគ្គនាយករងនៃអគ្គនាយកដ្ឋានផែនការនៃក្រសួងផែនការ លោក ណុប កនណាវុឌ្ឍ បានប្រាប់ វី.អូ.ឌី ថា គិតត្រឹមថ្ងៃទី១៣ ខែមីនានេះ ខេត្តផ្សេងៗបានបញ្ចប់ការធ្វើជំរឿនហើយ លើកលែងតែនៅខេត្តព្រះសីហនុ និងរាជធានីភ្នំពេញ។
លោកថា នៅព្រះសីហនុមានការដ្ឋានសំណង់ច្រើន និងជនបរទេសមិនចេះនិយាយភាសាខ្មែរ ជាឧបសគ្គ។ ចំណែកនៅភ្នំពេញ លោកថា ពលរដ្ឋមិនសូវនៅផ្ទះទើបមន្ត្រីមិនបានជួបសាកសួរព័ត៌មាន។
លោក ណុប កនណាវុឌ្ឍ៖ «បញ្ហាស្មុគស្មាញ ព្រោះកើនឡើងនៅតំបន់អភិវឌ្ឍន៍ហ្នឹងណា ជនជាតិចិនច្រើន អីច្រើន ហើយពេលសម្ភាស យើងមិនយកមន្ត្រីធម្មតាទេ យើងយកមន្ត្រីអន្តោប្រវេសន៍ទៅសម្ភាសគាត់ ដើម្បីជួយភាសាយើងពិបាកនិយាយគ្នា គាត់ចេះចិនយើងអត់ចេះ យើងមាន Questionnaire ចិន និងអង់គ្លេសដែរ»។
ការធ្វើជំរឿនទូទាំងប្រទេសឆ្នាំនេះ ចាប់ពីថ្ងៃទី៣ ដល់ថ្ងៃទី១៣ ខែមីនា ឆ្នាំ២០១៩នេះ ដោយមានមន្ត្រីជំរឿនប្រមាណ ៥ម៉ឺននាក់ទូទាំងប្រទេសប្រមូលព័ត៌មានពីពលរដ្ឋ។
