ក្នុងរយៈពេលប៉ុន្មានថ្ងៃក្នុងសប្ដាហ៍នេះ តំណាងសហភាពអឺរ៉ុបប្រចាំនៅកម្ពុជា បានជួបពិភាក្សាជាលើកចុងក្រោយជាមួយមេដឹកនាំកម្ពុជា មុននឹងលោកត្រូវចាកចេញពីប្រទេសនេះ ក្រោយការបំពេញបេសកកម្មការងារចប់អាណត្តិរបស់លោកនោះ។
ក្រសួងការបរទេសកម្ពុជា បានប្រកាសនៅលើគេហទំព័ររបស់ខ្លួនថា អគ្គរដ្ឋទូតសហភាពអឺរ៉ុប លោក George Edgar បានជួបជជែក និងជម្រាបលារដ្ឋមន្ត្រីការបរទេសកម្ពុជា លោក ប្រាក់ សុខុន កាលពីថ្ងៃម្សិលមិញនេះ ប៉ុន្តែ ក្រសួងមិនបានបង្ហាញទេថា តើបញ្ហាអ្វីខ្លះត្រូវបានលើកយកមកជជែកនៅក្នុងជំនួបចុងក្រោយនោះ។
ក្រៅពីជំនួបជាមួយប្រមុខការទូតកម្ពុជា លោក Edgar ក៏បានជួបពិភាក្សារួចមកហើយជាមួយបណ្ដាមេដឹកនាំរដ្ឋាភិបាលដទៃទៀត ដូចជា ជំនួបជាមួយរដ្ឋមន្ត្រីកសិកម្ម លោក វេង សាខុន កាលពីថ្ងៃចន្ទដើមសប្ដាហ៍នេះ និងជំនួបជាមួយរដ្ឋមន្ត្រីមហាផ្ទៃ លោក ស ខេង នៅរសៀលថ្ងៃពុធនេះផងដែរ។
អគ្គរដ្ឋទូតអឺរ៉ុបដើមកំណើតចក្រភពអង់គ្លេសរូបនេះ នឹងត្រូវផុតអាណត្តិនៅឆ្នាំ២០១៩នេះហើយ បន្ទាប់ពីលោកបានចូលកាន់តំណែងនេះចាប់តាំងពីខែធ្នូ ឆ្នាំ២០១៥មក។
ថ្វីបើមន្ត្រីការទូតអឺរ៉ុបរូបនេះ បានបញ្ចប់បេសកកម្មរបស់លោកទៅតាមអាណត្តិពេញលេញក៏ដោយ ក៏ប៉ុន្តែ ទំនាក់ទំនងកម្ពុជា-អឺរ៉ុប បានរសាត់អណ្តែតប៉ែលប៉ោលនៅក្នុងអំឡុងពេលលោកបំពេញតួនាទីប្រចាំនៅកម្ពុជា។
សហភាពអឺរ៉ុបបានសម្រេចដកហូតពន្ធគយលើអង្ករនាំចូលពីប្រទេសកម្ពុជាក៏ដូចអង្ករនាំចូលពីភូមាផងដែរកាលពីពាក់កណ្ដាលខែមករាកន្លងមកនេះ ហើយវិធានការថ្មីបំផុតរបស់អឺរ៉ុបមកលើកម្ពុជានោះ គឺការចាប់ផ្ដើមដំណើរការនីតិវិធីដែលអាចនាំទៅដល់ការដកហូតប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ [EBA]» ពីប្រទេសកម្ពុជា។
វិធានការទាំងពីរនេះ ឆ្លុះបញ្ចាំងឲ្យឃើញនូវទំនាក់ទំនងប៉ែលប៉ោលរវាងសហភាពអឺរ៉ុបដែលសមាជិក ២៨ប្រទេស និងប្រទេសកម្ពុជានាពេលយ៉ាងតិច ២ឆ្នាំចុងក្រោយមកនេះ បើទោះបីជាទំនាក់ទំនងមួយនេះ មិនធ្ងន់ធ្ងរដល់កម្រិតកាត់ផ្ដាច់ចំណងការទូតទាំងស្រុងក៏ដោយ។
បើទោះបីជាទំនាក់ទំនងនេះបានដើរដល់ចំណុចប៉ែលប៉ោលខ្លះៗដ៏ដោយ ប៉ុន្តែ លោកនាយករដ្ឋមន្ត្រី ហ៊ុន សែន បានបញ្ជាក់ជំហររបស់លោកជាថ្មីម្ដងទៀតកាលពីថ្ងៃម្សិលមិញនេះថា កម្ពុជាមិនយកប្រទេសសមាជិកសហភាពអឺរ៉ុបណាមួយជាសត្រូវនោះឡើយ ហើយលោកថា សហភាពអឺរ៉ុបនៅតែជាមិត្ត ជាដៃគូសេដ្ឋកិច្ច-ពាណិជ្ជកម្មល្អជាមួយកម្ពុជាដដែល។
បន្ទាប់ពីលោកនាយករដ្ឋមន្ត្រី ហ៊ុន សែន បញ្ជាក់ជំហររបស់លោកបែបនេះ វាក៏ជំរុញឲ្យមានការចោទសួរជាថ្មីម្ដងទៀតថា តើហេតុអ្វីបានជាកម្ពុជាត្រូវថែរក្សាទំនាក់ទំនងល្អជាមួយសហភាពអឺរ៉ុប?
ការរក្សាបាននូវទំនាក់ទំនងល្អរវាងកម្ពុជា និងសហភាពអឺរ៉ុប នឹងជួយផ្ដល់ផលប្រយោជន៍ដ៏ធំធេងដល់ប្រទេស និងប្រជាជនកម្ពុជា។ ផលប្រយោជន៍នោះ អាចឆ្លុះបញ្ចាំងបានតាមរយៈផលចំណេញលើវិស័យផ្សេងៗ ប៉ុន្តែ ផលចំណេញផ្នែកសេដ្ឋកិច្ចដែលកម្ពុជាទទួលបានតាមរយៈទំនាក់ទំនងពាណិជ្ជកម្មជាមួយក្រុមប្រទេសលោកសេរីតំបន់នេះ គឺជាការពិតមិនអាចប្រកែកបាន។
កម្ពុជាទទួលបានផលចំណេញធំធេងនៅក្នុងទំនាក់ទំនងពាណិជ្ជកម្មជាមួយសហគមន៍អឺរ៉ុប ដែលមានសមាជិកចំនួន ២៨ប្រទេសចាប់តាំងពីពេលដែលកម្ពុជាទទួលបានប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» (EBA)។
តួលេខរបស់គណៈកម្មការអឺរ៉ុប បានបង្ហាញថា ទំហំនៃការនាំចេញទំនិញពីកម្ពុជាចូលទៅទីផ្សាររួមមួយនេះ បានកើនឡើងដល់ទៅជាង ៩០០ភាគរយ នៅក្នុងរយៈពេល ១៥ឆ្នាំចុងក្រោយមកនេះ ពោលគឺបានកើនឡើងពីចំនួនប្រហែល ៥០០លានដុល្លារ (៤៩៩,៥៤៤,៦៦២ដុល្លារ) នៅក្នុងឆ្នាំ២០០៣ មកដល់ចំនួនជាង ៥ពាន់លានដុល្លារ (៥,០០៩,៦១២,៥៨១ដុល្លារ) នៅក្នុងឆ្នាំ២០១៨កន្លងមកនេះ។
តួលេខដដែលនេះ បានបង្ហាញឲ្យឃើញផងដែរថា កម្ពុជាទទួលបានផលចំណេញយ៉ាងហោចណាស់ ៥ដង ខណៈអឺរ៉ុបទទួលបានផលចំណេញមិនដល់ ១ដងផង នៅក្នុងទំនាក់ទំនងពាណិជ្ជកម្មទ្វេភាគី ដែលមានទំហំទឹកប្រាក់សរុបដល់ទៅជិត ៦ពាន់លានដុល្លារអាមេរិកនេះ(៥,៨៦០,២៨១,០៦៩ដុល្លារ)។
តួលេខទំហំពាណិជ្ជកម្មកម្ពុជា-អឺរ៉ុបឆ្នាំ២០១៨កន្លងមកនេះ បានបង្ហាញថា រដ្ឋសមាជិកសហភាពអឺរ៉ុបចំនួន ៥ដែលនាំចូលទំនិញពីកម្ពុជាច្រើនជាងគេ មានអាល្លឺម៉ង់ ចក្រភពអង់គ្លេស អេស្ប៉ាញ់ ហូឡង់ និងប៊ែលហ្ស៊ិក ដែលប្រទេសទាំង ៥នេះ បាននាំចូលទំនិញពីកម្ពុជាមានតម្លៃ ៣.៦៦៩លានដុល្លាររួចទៅហើយ។
តួលេខនេះ បង្ហាញឲ្យឃើញថា សហភាពអឺរ៉ុបគឺជាទីផ្សារធំលំដាប់ទី១ ខណៈដែលប្រទេសមហាអំណាចលោកសេរីដទៃទៀត ដូចជា សហរដ្ឋអាមេរិក កាណាដា និងជប៉ុន ក៏ជាទីផ្សារធំបំផុតសម្រាប់ទំនិញកម្ពុជាផងដែរ ដែលផ្ដល់ផលចំណេញវិជ្ជមានលើសលប់នៅក្នុងទំនាក់ទំនងពាណិជ្ជកម្មទៅវិញទៅមក។
តួលេខទាំងនេះ បង្ហាញផងដែរថា មិនថាទីផ្សារមួយណាទេ ភាគច្រើននៃទំនិញដែលកម្ពុជានាំចេញទៅ គឺជាផលិតផលកាត់ដេរសម្លៀកបំពាក់ និងស្បែកជើង ដែលត្រូវបានផលិតឡើងដោយកម្មករ-កម្មការិនីកម្ពុជាមានចំនួនប្រហែល ៨០ម៉ឺននាក់នៅទូទាំងប្រទេស។
បើទោះបីជាចិនជាដៃគូពាណិជ្ជកម្មធំសម្រាប់កម្ពុជាក្ដី ប៉ុន្តែ ទិន្នន័យរបស់ធនាគារពិភពលោក បានបង្ហាញថា កម្ពុជានាំចេញទំនិញមានតម្លៃតែជាង ៦០៩លានដុល្លារប៉ុណ្ណោះចូលទៅទីផ្សារមហាអំណាចសេដ្ឋកិច្ចមួយនេះ ខណៈដែលចិនវិញបាននាំចូលទំនិញមកកម្ពុជាមានតម្លៃដល់ទៅជាង ៤,៥៥០លានដុល្លារឯណោះ ដែលធ្វើឲ្យកម្ពុជាមានឱនភាពពាណិជ្ជកម្មដល់ទៅជាង ៣,៩៤១លានដុល្លារកាលពីឆ្នាំ២០១៦កន្លងមក។
តួលេខទាំងនេះ ឆ្លុះបញ្ចាំងឲ្យឃើញថា តើទំនាក់ទំនងល្អរវាងកម្ពុជា និងសហភាពអឺរ៉ុប មានសារៈសំខាន់ប៉ុណ្ណាសម្រាប់កម្ពុជាទាំងនៅក្នុងរយៈពេល ២០ឆ្នាំចុងក្រោយនេះ និងទាំងបណ្ដាឆ្នាំបន្តបន្ទាប់ទៅមុខទៀត។
ជារួម វាចាំបាច់ណាស់ដែលថា កម្ពុជាត្រូវតែកែលម្អទំនាក់ទំនងរបស់ខ្លួនជាមួយសហភាពអឺរ៉ុប ព្រមទាំងបណ្ដាប្រទេសលោកសេរីដែលប្រកាន់របបប្រជាធិបតេយ្យដទៃទៀត ដូចជា សហរដ្ឋអាមេរិក កាណាដា និងជប៉ុន៕
