សមាគមការពារសិទ្ធិមនុស្សមួយ បានជំរុញទៅព្រះរាជអាជ្ញារខេត្តព្រះវិហារ ឲ្យកោះហៅបុគ្គលដែលតុលាការខេត្តនេះចោទថា បានផ្ដល់យោបល់ឲ្យពលរដ្ឋម្នាក់រត់គេចខ្លួន ហើយទម្លាក់កំហុសទៅលើអាជ្ញាធរខេត្តនេះ យកមកសាកសួរ។
លោក ស៊ុំ ម៉ឺន ជាពលរដ្ឋម្នាក់កំពុងមានជម្លោះដីធ្លីជាមួយក្រុមហ៊ុនមេត្រីភាព ស្ថិតក្នុងឃុំយា ស្រុកជាំក្សាន្តនោះ ត្រូវបានសាច់ញាតិក្រុមគ្រួសារអះអាងថា កំពុងបាត់ខ្លួនចាប់ពីលោកត្រូវបានក្រុមទាហាននៅកងពលតូចលេខ ៦ ចាប់ខ្លួននៅក្នុងចំណោមពលរដ្ឋ ១៤នាក់ផ្សេងទៀតកាលពីថ្ងៃទី២០ ខែមករាកន្លងមក។
កាលពីថ្ងៃទី៦ ខែមីនាកន្លងមកនេះ ព្រះរាជអាជ្ញាសាលាដំបូងខេត្តព្រះវិហារ លោក ទី សុវិនថាល់ អះអាងថា ពលរដ្ឋម្នាក់នោះ បានរត់គេចខ្លួន និងសម្ងំលាក់ខ្លួនទៅតាមការណែនាំពីបុគ្គលណាម្នាក់ ដើម្បីទម្លាក់កំហុសទៅលើអាជ្ញាធរ ហើយលោកក៏បានព្រមានចាត់វិធានការផ្លូវច្បាប់ទៅលើបុគ្គលដែលលោកហៅថា ជាអ្នកបានផ្តល់យោបល់ឲ្យពលរដ្ឋម្នាក់រត់គេចខ្លួននោះដែរ។
មន្ត្រីសម្របសម្រួលសមាគមអាដហុកប្រចាំខេត្តព្រះវិហារ លោក ឡោ ចាន់ បានជំរុញទៅព្រះរាជអាជ្ញាតុលាការខេត្តនេះ កោះហៅយកមកសាកសួរនូវបុគ្គលដែលតុលាការចោទថា បានណែនាំ និងផ្ដល់យោបល់ឲ្យអ្នកភូមិសម្ងំលាក់ខ្លួន ប្រសិនបើព្រះរាជអាជ្ញារធ្វើការស៊ើបអង្កេត រកឃើញថា ពិតជាមានអ្នកផ្ដល់យោបល់ឲ្យមែននោះ។
លោក ឡោ ចាន់ មានប្រសាសន៍ថា៖ «អញ្ចឹង បានខ្ញុំជំរុញឲ្យមានការចេញដីកានាំ ឬចេញដីកាកោះណាមួយជនសង្ស័យនៅពីក្រោយខ្នងរឿងហ្នឹងវិញ វាស្រួលជាង ដើម្បីយើងស្វែងរកការពិតទាំងអស់គ្នា»។
ភរិយារបស់លោក ស៊ុំ ម៉ឺន គឺអ្នកស្រី ភូ ភឹមម៉ៅ លើកឡើងថា បើសិនព្រះរាជអាជ្ញារបានដឹងថាស្វាមីរបស់គាត់នៅរស់ ហើយកំពុងលាក់ខ្លួន ដោយសារមានអ្នកផ្ដល់យោបល់មែននោះ អ្នកស្រីស្នើទៅព្រះរាជអាជ្ញារកោះហៅជននោះមកសួរ។
អ្នកស្រី ភូ ភឹកម៉ៅ ប្រាប់ថា៖ «បើគាត់ដឹងហើយ ឲ្យគាត់ហៅមក ព្រោះខ្ញុំចង់ជួបមុខ។ បើថា ឲ្យប្ដីខ្ញុំលាក់ខ្លួន ខ្ញុំដូចជាមិនជឿសោះ មិនដែលអ្នកណាសុខចិត្តឲ្យ ស៊ុំ ម៉ឺន លាក់ខ្លួនហ្នឹង ខ្ញុំដូចអត់ជឿសោះ។ បើសិនសមត្ថកិច្ចដឹងអ្នកនៅពីក្រោយហើយ ហៅមកជួបខ្ញុំផង ហេតុអ្វីបានគាត់លាក់ប្ដីខ្ញុំ អត់ឲ្យខ្ញុំជួបប្ដីខ្ញុំហ្នឹង»។
អ្នកស្រី ភឹមម៉ៅ បានអះអាងជាថ្មីទៀតថា អ្នកស្រីនៅតែពុំបានដឹងថា ស្វាមីរបស់គាត់ស្ថិតនៅកន្លែងណា ហើយស្លាប់ ឬក៏នៅរស់នោះឡើយរហូតមកដល់ថ្ងៃនេះ។
ព្រះរាជអាជ្ញារងសាលាដំបូងខេត្តព្រះវិហារ លោក ទី សុវិថាល់ បានបដិសេធថា តុលាការនៅមិនទាន់ដឹងថា នរណាជាអ្នកផ្ដល់យោបល់ឲ្យលោក ស៊ុំ ម៉ឺន រត់គេចខ្លួននៅឡើយទេ ប៉ុន្តែ លោកថា តុលាការអាចដឹងបាន ទាល់តែលោក ស៊ុំ ម៉ឺន ចូលមកបំភ្លឺនៅសវនាការសិន។
លោក ទី សុវិថាល់ ប្រាប់ថា៖ «អ្នកនៅពីក្រោយមិនទាន់រកឃើញណា។ នៅពេល [ស៊ុំ ម៉ឺន ] ចូលមកឆ្លើយ ហើយស្រាវជ្រាវទៅគង់តែឃើញទេ។ នៅលើលោកនេះ គ្មានអ្វីដែលអាចលាក់បាំងជារៀងរហូតទេ មុននឹងក្រោយគង់តែឃើញទេ»។
ការបាត់ខ្លួនពលរដ្ឋមានជម្លោះដីធ្លីនៅខេត្តព្រះវិហារនេះ ក៏ជំរុញការិយាល័យអង្គការសហប្រជាជាតិប្រចាំនៅកម្ពុជា តាមដាន និងស្វែងរកការពិតផងដែរ។
មន្ត្រីព័ត៌មាន និងទំនាក់ទំនងនៃការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា (OHCHR) លោក Mahmoud Garga បានប្រាប់ វីអូឌី នៅថ្ងៃនេះថា ស្ថាប័នអង្គការមួយនេះ បានបញ្ចប់ការស៊ើបអង្កេតលើករណីនេះហើយ ប៉ុន្តែ លោកថា កំពុងបន្តតាមដានករណីនេះជាមួយរដ្ឋាភិបាលកម្ពុជាបន្តទៀត។
លោក Mahmoud Garga រៀបរាប់ក្នុងសារអេឡិចត្រូនិចថា៖ « OHCHR បានបិទបញ្ចប់ការស៊ើបអង្កេតរបស់ខ្លួនក្នុងករណីនេះហើយ ហើយកំពុងតែបន្តតាមដានជាមួយរដ្ឋាភិបាល»។
កាលពីខែកុម្ភៈកន្លងមកថា ស្ថាប័នពិភពលោកមួយនេះ កំពុងតែស៊ើបអង្កេតលើជុំវិញករណីបាត់ខ្លួនពលរដ្ឋម្នាក់នៅឯខេត្តព្រះវិហារដែរ ក្រោយពីពលរដ្ឋម្នាក់នោះត្រូវបានក្រុមទាហានចាប់ខ្លួន ដោយថា ក្រុមមន្ត្រីសិទ្ធិមនុស្ស UN បានចុះទៅជួបភាគីពាក់ព័ន្ធដើម្បីស្វែងរកការពិត។
អ្នកភូមិជាង ២០០នាក់ ដែលមានជម្លោះដីធ្លីទំហំជាង ៨៥០០ហិកតាជាមួយក្រុមហ៊ុនមេត្រីភាពនោះ បាននាំគ្នាមកស្វែងរកអន្តរាគមន៍ពីលោកនាយករដ្ឋមន្ត្រី ហ៊ុន សែន ម្ដងរួចមកហើយកាលពីថ្ងៃទី៣១ ខែមករាកន្លងមក ដើម្បីស្នើឲ្យដោះលែងពលរដ្ឋ ១៤នាក់ និងដោះស្រាយបញ្ចប់វិវាទដីធ្លីជូនពួកគេ៕