សមត្ថកិច្ចកម្ពុជា បានរឹបអូសគ្រឿងសមុទ្រជាង ៧តោន ដែលត្រូវបាននាំចូលពីប្រទេសវៀតណាម ក្រោយពីបានត្រួតពិនិត្យ និងរកឃើញថា គ្រឿងសមុទ្រទាំងនោះខូចគុណភាពកាលពីថ្ងៃម្សិលមិញនេះ។ នេះបើតាមការចុះផ្សាយរបស់នគរបាលជាតិ។
គេហទំព័រនគរបាលជាតិ បានចុះផ្សាយកាលពីថ្ងៃម្សិលមិញថា កម្លាំងសមត្ថកិច្ច និងមន្ត្រីកាំកុងត្រូល បានរឹបអូសគ្រឿងសមុទ្រខូចគុណភាពជាង ៧តោន ហើយបានរកឃើញបង្គាដែលមានចាក់សារធាតុម្យ៉ាងខាប់ដូចចាហួយ និងគ្រឿងសមុទ្រចំនួន ៣៧៦កេស មានទម្ងន់ ៧.៥២០គីឡូក្រាម។
ប្រភពដដែលឲ្យដឹងថា សមត្ថកិច្ចបានយកបង្គាដែលមានចាក់សារធាតុគីមីនោះ ទៅដុតបំផ្លាញចោលនៅទីលានចាក់សម្រាមបឹងជើងឯក និងនាំខ្លួនអ្នកបើកបរដឹកគ្រឿងសមុទ្រ ៣នាក់ ទៅសាកសួរស្វែងរកម្ចាស់បន្តនីតិវិធីតាមផ្លូវច្បាប់។
ក្នុងពិធីសំណេះសំណាលជាមួយមន្រ្តីពាណិជ្ជកម្មនិងមន្រ្តីកាំកុងត្រូល រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ បានជំរុញទៅមន្ត្រីកាំកុងត្រូល ឲ្យរឹតបន្តឹងបញ្ហាសុវត្ថិភាពម្ហូបអាហារ និងវែកមុខឈ្មួញខិលខូច ដើម្បីដាក់ទោសតាមច្បាប់ផងដែរ។
កាលពីឆ្នាំ២០១៨កន្លងទៅ មន្រ្តីនគរបាលប្រឆាំងបទល្មើសសេដ្ឋកិច្ចនៃអគ្គស្នងការនគរបាលជាតិ បានរឹបអូសសត្វក្រួចជាង ២តោនខូចគុណភាពដែលនាំចូលពីវៀតណាមផងដែរ។
កាលពីថ្ងៃអង្គារកន្លងមកនេះ រដ្ឋមន្ត្រីមហាផ្ទៃ លោក ស ខេង បានព្រមានថា លោកនឹងមិនចូលរួមក្នុងកម្មវិធីបំផ្លាញទំនិញខូចគុណភាព ឬទំនិញក្លែងក្លាយទៀតទេ ប្រសិនបើគ្មានការចាប់ខ្លួនជនសង្ស័យនៅក្នុងបទល្មើសនេះ៕