លោកនាយករដ្ឋមន្ត្រី ហ៊ុន សែន បានក្រើនរំឭកជាថ្មីទៀតទៅគណៈកម្មកាជាតិដើម្បីទប់ស្កាត់ និងបង្ក្រាបទល្មើសធនធានធម្មជាតិ ឲ្យពង្រឹងប្រសិទ្ធិភាពនៃការងាររបស់ខ្លួន ក្នុងការបង្ក្រាបបទល្មើសព្រៃឈើនៅកម្ពុជា ជាពិសេសបទល្មើសព្រៃឈើនាំទៅក្រៅប្រទេស។
ការក្រើនរំឭករបស់នាយករដ្ឋមន្ត្រីនេះ ធ្វើឡើងក្នុងពិធីបិទសន្និបាតបូកសរុបការងារនៅក្រសួងកសិកម្មរុក្ខាប្រមាញ់ និងនេសាទ នាព្រឹកថ្ងៃព្រហស្បតិ៍នេះ។
លោក ហ៊ុន សែន ថ្លែងថា៖ «គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដឹកនាំដោយឯកឧត្តម សៅ សុខា សុំបន្តពង្រឹងការគ្រប់គ្រងធនធានធម្មជាតិ ជាពិសេសទប់ស្កាត់ និងលុបបំបាត់ការនាំចេញឈើនិងផលិតផលកែច្នៃឈើគ្រប់ប្រភេទ ទៅក្រៅប្រទេសតាមច្រកព្រំដែន តាមច្រករបៀង ដែលគ្មានការអនុញ្ញាតិ ឲ្យមានប្រសិទ្ធិភាពនិងតម្លាភាព»។
អ្នកនាំពាក្យកងរាជអាវុធហ្ថលើផ្ទៃប្រទេស លោក អេង ហ៊ី មានប្រសាសន៍ថា កាលពីខែមករាដើមឆ្នាំនេះ គណៈកម្មការបានបើកកិច្ចប្រជុំជាមួយអន្តរក្រសួង ដើម្បីដាក់ផែនការចុះពង្រឹងប្រសិទ្ធិភាពនៃការទប់ស្កាត់បទល្មើសធនធានធម្មជាតិនេះ រួមទាំងបទល្មើសព្រៃឈើផងដែរ តាមការណាំនាំរបស់ប្រមុខរដ្ឋាភិបាលកន្លងទៅ។
អ្នកនាំពាក្យរូបនេះ អះអាងទៀតថា ក្រោយពីក្រុមការងារចុះអនុវត្តយុទ្ធសាស្ត្រនេះ លោកថា បទល្មើព្រៃឈើ រួមទាំងបទល្មើសផ្សេងទៀត បានថយចុះគួឲ្យកត់សម្គាល់។
លោក អេង ហ៊ី មានប្រសាសន៍ថា៖ «ក្រោយពីយើងបង្ក្រាបជាបន្តបន្ទាប់ ដល់ពេលនេះយើងឃើញថា បទល្មើសនៃការកាប់ព្រៃ ការទន្ទ្រានព្រៃផ្សេងៗពាក់ព័ន្ធនឹងរ៉ែអីហ្នឹង! យើងឃើញថា បានថយចុះជាបន្តបន្ទាប់។ បាទ! អាហ្នឹងស្ថិតក្នុងការស៊ើបអង្កេតរបស់គេ។ គេកំពុងតែធ្វើការ បាទ!»។
អ្នកសម្របសម្រួលបណ្តាញសហគមន៍ដើម្បីសន្តិភាព ដែលធ្វើការផ្តោតលើធនធានធម្មជាតិ លោក សេង សុខហេង អះអាងថា បទល្មើសព្រៃឈើមិនថយចុះទេ ដោយថា គ្រាន់តែឧក្រិដ្ឋជនបានប្តូររូបភាពពីកាប់ឈើទ្រង់ទ្រាយធំ មកដឹកជញ្ជូនតាមគោយន្ត រទេះ ឬតាមម៉ូតូវិញតែប៉ុណ្ណោះ។
អ្នកការពារធនធានធម្មជាតិរូបនេះ អះអាងថា ការក្រើនរំឭករបស់មេដឹកនាំពេលនេះ ទំនងជាគ្មានប្រសិទ្ធិភាពដូចពេលមុនដែរ បើពួកឧក្រិដ្ឋជនមិនត្រូវបានផ្តន្ទាទោសនោះ។
លោក សេង សុខហេង លើកជាឧទាហរណ៍ថា កាលពីជាង៣ឆ្នាំមុន ពោលគឺនៅអំឡុងឆ្នាំ២០១៦ គណៈកម្មការរបស់រដ្ឋាភិបាលមួយនេះ បានប្តឹងឧក្រិដ្ឋជនព្រៃឈើមួយចំនួនទៅតុលាការ តែថា មកដល់ពេលនេះ ពួកគេនៅតែមានមុខកាប់បំផ្លាញព្រៃឈើដដែល។
លោកថា៖ «មកដល់ពេលនេះ ឧកញ៉ាពីរបីនាក់ដែលគណៈកម្មការជាតិប្តឹងទៅតុលាការនោះ មិនត្រូវបានផ្តន្ទាទោសតាមច្បាប់ទេ ពួកគាត់នោះនៅតែមានសេរីភាព នៅតែធ្វើសកម្មភាពរកស៊ីឈើខុសច្បាប់ដដែលរហូតមកដល់បច្ចុប្បន្ននេះ។ អញ្ចឹង យើងឃើញថា ការអនុវត្តច្បាប់នៅស្រុកខ្មែរ វាមានភាពខ្សោយជាប្រព័ន្ធទៅហើយ។ អញ្ចឹង ការផ្តល់អានុសាសន៍របស់នាយករដ្ឋមន្ត្រីជាទូទៅ វាគ្រាន់តែជាវិធីសាស្ត្រសម្រាប់មន្ត្រីពុករលួយមួយចំនួនយកទៅច្បាមយកផលប្រយោជន៍សម្រាប់បុគ្គលខ្លួនឯងតែប៉ុណ្ណោះ»។
កាលពីឆ្នាំ២០១៥ រដ្ឋាភិបាលបានបង្កើតគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដែលគណៈកម្មការនោះដឹកនាំដោយមេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា។
ក្រោយការបង្កើតបានប្រមាណជា ៣ខែ គណៈកម្មការជាតិមួយនេះ ចាប់បានឈើខុសច្បាប់ប្រភេទឈើប្រណិតជាង ៧ម៉ឺនម៉ែត្រគូប និងប្ដឹងឈ្មួញរកស៊ីចំនួន ៥៧ករណីទៅតុលាការ ប៉ុន្តែ មកទល់ពេលបច្ចុប្បន្ន គ្មានឧក្រិដ្ឋជនធំៗណាម្នាក់ត្រូវបានចាប់ខ្លួន និងយកទៅផ្តន្ទាទោសតាមច្បាប់ឡើយ។
ទីភ្នាក់ងារអវកាសជាតិអាមេរិក ហៅកាត់ថា NASA បានបញ្ចេញរូបភាពកាលពីឆ្នាំ២០១៧ ដែលបានបង្ហាញថា ព្រៃឈើនៅក្នុងប្រទេសកម្ពុជាកំពុងប្រឈមនឹងការកាប់បំផ្លាញយ៉ាងធ្ងន់ធ្ងរនៅប៉ុន្មានឆ្នាំចុងក្រោយនេះ។
ស្ថាប័នមួយបញ្ជាក់ថា ការកាប់បំផ្លាញព្រៃឈើក្នុងដីសម្បទានសេដ្ឋកិច្ចស្ថិតនៅចន្លោះពី ២៩ ទៅ ១០៥ភាគរយ ដោយសារតែរដ្ឋាភិបាលកម្ពុជា បានជួលដីទាំងនោះឲ្យទៅក្រុមហ៊ុនក្នុងស្រុក និងក្រុមហ៊ុនវិនិយោគបរទេស សម្រាប់វិស័យកសិកម្ម ការកាប់យកឈើលក់ និងមូលហេតុផ្សេងៗទៀត៕
