រដ្ឋបាលខេត្តកោះកុងឲ្យម្ចាស់អាជីវកម្មត្រៀមម៉ាស៊ីនភ្លើងសម្រាប់ប្រើប្រាស់ផ្ទាល់ខ្លួន ព្រោះអាកាសធាតុមានភាពរ៉ាំងស្ងួតធ្វើឲ្យស្ថានីយវារីអគ្គិសនីស្ទឹងតាតៃ និងវារីអគ្គិសនីឫស្សីជ្រុំមានកម្ពស់ទឹកទាបមិនអាចទាញយកថាមពលគ្រប់គ្រាន់។
យោងតាមសេចក្ដីជូនដំណឹងរបស់មន្ទីររ៉ែ និងថាមពលខេត្តកោះកុងចុះកាលពីម្សិលមិញឲ្យដឹងថា ស្ថានភាពពេលនេះថាមពលអគ្គសនីមានត្រឹមតែ ១០មេកាវ៉ាត់ មិនអាចផ្គត់ផ្គង់ការប្រើប្រាស់បានគ្រប់គ្រាន់ដូច្នេះ មន្ទីររ៉ែនិងថាមពលខេត្តកោះកុងអំពាវនាវឲ្យប្រជាពលរដ្ឋម្ចាស់អាជីវកម្មត្រៀមម៉ាស៊ីនភ្លើងសម្រាប់ប្រើប្រាស់ផ្ទាល់ខ្លួន។
ម្ចាស់អាជីវកម្មនៅខេត្តកោះកុង (សុំមិនបញ្ចេញឈ្មោះ) បានប្រាប់សារព័តមានវីអូឌីថា ការផ្គត់ផ្គង់អគ្គសនីមិនមែនជាបន្ទុករបស់ប្រជាពលរដ្ឋទេ ហើយរដ្ឋាភិបាលគួរមានដំណោះស្រាយសម្រាប់ប្រជាពលរដ្ឋមិនមែនដាក់បន្ទុកឲ្យប្រជាពលរដ្ឋម្ចាស់អាជីវកម្មរកដំណោះស្រាយខ្លួនឯងនោះទេ។
លោកមានប្រសាសន៍ថា៖ «វាដូចជាការដាក់បន្ទុកមកលើប្រជាពលរដ្ឋវិញព្រោះថាប្រជាពលរដ្ឋម្ចាស់អាជីវកម្មទាំងអស់មិនប្រាកដថាមានលទ្ធភាពដែលអាចទិញម៉ាស៊ីនយកមកប្រើប្រាស់សម្រាប់អាជីវកម្មអីទេ អញ្ចឹងហើយខ្ញុំគិតថាខាងមន្ទីរក៏ដូចជាក្រុមហ៊ុនឯកជនគួរពិភាក្សាគ្នារកដំណោះស្រាយផ្សេងជាជាងដាក់បន្ទុកមកប្រជាពលរដ្ឋ»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ បានលើកឡើងថាទំហំនៃការសាងសង់វារីអគ្គិសនីមានការកើនឡើង តែការផ្គត់់ផ្គង់ថាមពលអគ្គសនីមិនគ្រប់គ្រាន់ដូច្នេះគម្រោងសម្បទានវារីអគ្គសនីគឺមានបញ្ហា។
លោកមានប្រសាសន៍ថា៖ «គម្រោងសម្បទានវារីអគ្គិសនីមានការកើនឡើង តែបែរជាមានការមានការលើកទឹកចិត្តឲ្យម្ចាស់អាជីវកម្មបង្កើតថាមពលប្រើប្រាស់ដោយខ្លួនឯងធ្វើឲ្យយើងយល់ថាគម្រោងសម្បទានវារីអគ្គិសនីមានបញ្ហា»។
នៅក្នុងខេត្តកោះកុងនៅរដូវក្តៅនេះ ក៏កំពុងជួបប្រទះបញ្ហាខ្វះទឹកប្រើប្រាស់ដែរ ហើយអាជ្ញាធរកម្ពុជាកំពុងតែទំនាក់ទំនងទិញទឹកពីខេត្តត្រាតនៃប្រទេសថៃ។
