អតីតប្រធានគណបក្សប្រឆាំងដែលកំពុងរស់នៅក្រៅប្រទេស លោក សម រង្ស៊ី បានចោទលោកនាយករដ្ឋមន្ដ្រី ហ៊ុន សែន ថា កំពុងក្ដោបក្ដាប់អំណាចជាលក្ខណៈគ្រួសារ ហើយយកប្រទេសកម្ពុជាធ្វើជាកម្មសិទ្ធិផ្ទាល់ខ្លួន លក់ទ្រព្យសម្បត្តិជាតិឲ្យទៅប្រទេស។
លោក សម រង្ស៊ី បានចោទប្រកាន់បែបនេះអំឡុងពេលលោកថ្លែងក្នុងកិច្ចប្រជុំជាំមួយគណៈកម្មាធិការអចិន្ត្រៃយ៍គណបក្សសង្គ្រោះជាតិ នៅឯទីក្រុង Lowell លើទឹកដីសហរដ្ឋអាមេរិក នៅថ្ងៃនេះ។
ក្នុងសន្និសីទសារព័ត៌មានស្ដីពីលទ្ធផលនៃកិច្ចប្រជុំនេះ លោក សម រង្ស៊ី ថ្លែងថា លោក ហ៊ុន សែន កំពុងដឹកនាំប្រទេសផ្ទុយពីការចង់បានរបស់ប្រជាពលរដ្ឋ ដោយបានរៀបចំកូនចៅរបស់ខ្លួនត្រៀមបន្ដវេនដឹកនាំជំនួសលោក ហ៊ុន សែន និងថា សូម្បីមន្ដ្រីក្នុងគណបក្សប្រជាជនកម្ពុជា ក៏ជំទាស់នឹងការដឹកនាំបែបនេះ។
លោក សម រង្ស៊ី ថ្លែងបន្ដថា ដើម្បីរក្សាអំណាច លោក ហ៊ុន សែន បានយកប្រទេសកម្ពុជាធ្វើជាកម្មសិទ្ធិផ្ទាល់ខ្លួន និងបានពុះជ្រៀកប្រទេសជាដុំៗ លក់ឲ្យបរទេស ជាពិសេសជំរុញឲ្យកម្ពុជាធ្លាក់ក្នុងវិបត្តិសេដ្ឋកិច្ច ខណៈសហគមន៍អន្ដរជាតិព្រមានទណ្ឌកម្មមកលើកម្ពុជាជាបន្ដបន្ទាប់នោះ។
លោក សម រង្ស៊ី ថ្លែងថា៖ «គ្រួសារមួយដែលបំផ្លិចបំផ្លាញជាតិយកប្រទេសកម្ពុជាធ្វើដូចជាទ្រព្យសម្បត្តិរបស់ខ្លួន អត់គិតអំពីការឈឺចាប់របស់ប្រជារាស្ដ្រ នាំប្រទេសជាតិយើងឆ្ពោះទៅមហន្ដរាយដោយសារតែទង្វើអាក្រក់របស់ជនផ្ដាច់ការនោះ គ្រួសារនោះបានជាមានទណ្ឌកម្មអន្ដរជាតិ។ ទណ្ឌកម្មអន្ដរជាតិនេះពេលណាមកដល់ គឺច្បាស់ជាប៉ះពាល់ដល់ជីវភាប្រជារាស្រ្ដ»។
លោក សម រង្ស៊ី ថ្លែងបន្តថា៖ «ដោយសារក្រុមគ្រួសាររបស់បុគ្គលនោះ ដែលចាត់ទុកប្រទេសកម្ពុជាជាកម្មសិទ្ធិរបស់ខ្លួន ដែលរៀបចំឲ្យមានអ្នកតវេនបន្ដតំណែង ក្ដោបក្ដាប់អំណាចជាលក្ខណៈគ្រួសារ»។
ក្រៅពីថ្លែងបែបនេះ លោក សម រង្ស៊ី ក៏អំពាវនាវជាថ្មីឲ្យកងកម្លាំងប្រដាប់អាវុធ អ្នកស្នេហាលទ្ធិប្រជាធិបតេយ្យ និងមន្ដ្រីក្នុងជួររដ្ឋាភិបាល ក្រោកឈរឡើងប្រឆាំងរដ្ឋាភិបាល។
លោក សម រង្ស៊ី ក៏ប្រកាសជាថ្មីអំពីគម្រោងធ្វើមាតុភូមិនិវត្តន៍មកប្រទេសកម្ពុជាក្នុងពេលឆាបៗខាងមុខនេះ ដើម្បីទម្លាក់លោក ហ៊ុន សែន ចេញពីអំណាច។
អតីតប្រធានគណបក្សសង្គ្រោះជាតិ លោក សម រង្ស៊ី កំពុងនិរទេសខ្លួនឯងនៅឯបរទេស បន្ទាប់ពីប្រឈមមុខនឹងបណ្ដឹងជាច្រើនតាមផ្លូវតុលាការនៅក្នុងប្រទេសកម្ពុជា ដែលប្ដឹងដោយមេដឹកនាំបក្សប្រឆាំង ក្នុងនោះមានទាំងបណ្ដឹងរបស់លោកនាយករដ្ឋមន្ត្រី ហ៊ុន សែន ផងដែរ។
រដ្ឋាភិបាលរបស់លោក ហ៊ុន សែន បានទទួលរងការថ្កោលទោសជាបន្ដបន្ទាប់ ក្រោយកម្ពុជារៀបចំការបោះឆ្នោតមួយ ដែលគ្មានវត្តមានអតីតគណបក្សសង្គ្រោះជាតិ កាលពីខែកក្កដាឆ្នាំមុន។ រដ្ឋាភិបាលមួយនេះក៏ត្រូវបានគេរិះគន់ថា កំពុងងាកទៅរកប្រទេសកុម្មុយនីស្ដចិន និងឆ្ពោះទៅរករបបផ្ដាច់ការ៕
