អ្នកនាំពាក្យសាលារាជធានីភ្នំពេញ បានឲ្យដឹងថា សន្តិសុខ ៤រូប ដែលយាមនៅក្នុងទីស្នាក់ការគណបក្សសង្គ្រោះជាតិ ត្រូវបានសមត្ថកិច្ចដោះលែងវិញហើយកាលពីយប់ថ្ងៃអាទិត្យចុងសប្ដាហ៍កន្លងមកនេះ ក្រោយពីត្រូវបានឃាត់ខ្លួនយកទៅសួរនាំ។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី ប្រាប់ VOD ថា កាលពីយប់ថ្ងៃអាទិត្យម្សិលមិញ កម្លាំងសមត្ថកិច្ចបានឃាត់ខ្លួនមនុស្ស ៤នាក់ ដែលធ្វើសកម្មភាពទាំងកណ្ដាលយប់នៅអតីតស្នាក់ការគណបក្សសង្គ្រោះជាតិ មានទីតាំងស្ថិតនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
លោក ម៉េត មាសភក្ដី បកស្រាយថា មនុស្ស ៤នាក់ ត្រូវបានសមត្ថកិច្ចឃាត់ខ្លួនយកទៅទៅសួរនាំនេះ បន្ទាប់ពីមន្ដ្រីជំរឿនបានចុះទៅធ្វើជំរឿននៅទីតាំងនេះកាលពីពេលកន្លងមក ប៉ុន្ដែ រកឃើញថា មិនមានអ្នកណាម្នាក់រស់នៅក្នុងទីស្នាក់ការគណបក្សសង្គ្រោះជាតិនេះនោះទេ។
លោកបន្ដថា លុះដល់យប់កើតហេតុ កម្លាំងសមត្ថកិច្ចដែលល្បាតនៅពេលយប់ បានពិនិត្យឃើញមនុស្សចំនួន ៤នាក់ បានធ្វើសកម្មភាពនៅអតីតទីស្នាក់ការបក្សសង្គ្រោះជាតិ ហើយពួកគេបានធ្វើសកម្មភាពគួរឲ្យសង្ស័យមួយចំនួន ទើបឈានដល់ការឃាត់ខ្លួនមកសួរនាំ។
លោក ម៉េត មាសភក្ដី បន្ដថា៖ «នៅទីស្នាក់ការអតីតគណបក្សសង្គ្រោះជាតិហ្នឹង មានការកត់សម្គាល់ឃើញថា នៅពេលយើងជំរឿងហ្នឹង ការមានការបញ្ជាក់ថានៅទីស្នាក់ការនេះអត់មានមនុស្សទេ។ ប៉ុន្ដែក្រោយពេលកម្លាំងយើងនេះហ្នឹង មានការចាប់អារម្មណ៍ថា មានមនុស្សនៅក្នុងហ្នឹង រហូតដល់យើង ចុះដំបូងហ្នឹងសួរនាំទេ ប៉ុន្ដែដោយឃើញមានលោកតផ្លោះរបង លោតអីហាក់ដូចមានភាពមិនប្រក្រតី ទើបយើងធ្វើការសួរនាំបន្ដទៅ រហូតដល់យើងសួរនាំពួកគាត់ទាំង៤នាក់ហ្នឹង»។
ប៉ុន្ដែ អ្នកនាំពាក្យសាលារាជធានីភ្នំពេញ លោក ម៉េត មាសភក្ដី អះអាងថា សមត្ថកិច្ចបានដោះលែងពួកគេវិញនាយប់ថ្ងៃអាទិត្យដដែល ក្រោយសួរនាំពួកគេចប់។
សន្ដិសុខ ៤នាក់ ដែលត្រូវសមត្ថកិច្ចឃាត់ខ្លួនកាលពីយប់មិញ រួមមានឈ្មោះ សូរ តារា ឈ្មោះ ហុង ម៉ៅ ឈ្មោះ អ៊ី អេងហ័ន និងឈ្មោះ ទឹម សាម៉េត៕
