អតីតមន្ត្រីជាន់ខ្ពស់មួយរូបរបស់អង្គការសហប្រជាជាតិទទួលបន្ទុកប្រទេសកម្ពុជានៅសម័យអន្តរកាល លោក Benny Widyono បានទទួលមរណភាពកាលពីថ្ងៃអាទិត្យចុងសប្ដាហ៍មុន ក្នុងអាយុ ៨៣ឆ្នាំ។
មរណភាពរបស់លោក Benny Widyono ត្រូវបានអ្នកនិពន្ធសៀវភៅអំពីប្រទេសកម្ពុជា អ្នកស្រី Sue Coffey ប្រកាសឲ្យដឹងនៅលើគណនីទំនាក់ទំនងហ្វេសប៊ុករបស់អ្នកស្រីកាលពីថ្ងៃអាទិត្យកន្លងមកនេះ។
លោក Benny Widyono គឺជាមន្ត្រីជាន់ខ្ពស់មួយរូបរបស់អង្គការសហប្រជាជាតិ ដែលត្រូវបានតែងតាំងដោយអគ្គលេខាធិការរងអង្គការសហប្រជាជាតិទទួលបន្ទុកអាជ្ញាធរបណ្ដោះអាសន្នអង្គការសហប្រជាជាតិប្រចាំកម្ពុជា (UNTAC) លោក Yasushi Akashi ឲ្យទទួលខុសត្រូវលើខេត្តសៀមរាប ឬដែលមានន័យថា ជាអភិបាលខេត្តសៀមរាបតែងតាំងដោយអង្គការសហប្រជាជាតិនៅចន្លោះឆ្នាំ១៩៩២ ដល់ឆ្នាំ១៩៩៣។
អ្នកស្រី Sue Coffey អ្នកនិពន្ធសៀវភៅ «Seeking Justice in Cambodia» ឬជាភាសាខ្មែរថា «ស្វែងរកយុត្តិធម៌នៅកម្ពុជា»នោះ បានលើកឡើងលើហ្វេសប៊ុករបស់អ្នកស្រីថា លោក Benny Widyono ដែលបានចូលរួមចំណែកក្នុងសំណេរនៃស្នាដៃនិពន្ធរបស់អ្នកស្រីនោះ គឺជាបុគ្គលគំរូ ដែលចំណាយពេលលើការសរសេរ និងបង្រៀនរហូតដល់ឆាកជីវិតចុងក្រោយរបស់លោក។
មជ្ឈមណ្ឌលខេមរសិក្សា (CKS) ជាទីដែលលោកបណ្ឌិត Widyono តែងតែផ្ដល់បឋកថាជាសាធារណៈនោះ បានរៀបរាប់លើទំព័រហ្វេសប៊ុករបស់ខ្លួនថា លោក Widyono បានរស់នៅក្នុងប្រទេសកម្ពុជាជាច្រើនឆ្នាំ ស្រឡាញ់ប្រជាជន និងវប្បធម៌ខ្មែរ ហើយគាត់និយាយភាសាខ្មែរយ៉ាងច្បាស់ផងដែរ។
ដោយធ្លាប់បម្រើការក្នុងនាមជាមន្ត្រីជាន់ខ្ពស់អង្គការសហប្រជាជាតិប្រចាំនៅកម្ពុជានោះ លោក Widyono បានចងក្រងសៀវភៅមួយមានចំណងជើងថា «Dancing in Shadows» ឬមានន័យថា «រេរាំក្នុងស្រមោល» ដែលជាការរំឭកឡើងវិញនូវការចងចាំរបស់លោកអំឡុងពេលលោកបំពេញការងារនៅក្នុងប្រទេសកម្ពុជាក្នុងសម័យអន្តរកាលដែលគ្រប់គ្រងដោយអង្គការសហប្រជាជាតិ។
បើតាមកំណត់ត្រាក្នុងសៀវភៅ លោក Widyono បានស្នើទៅលោក Yasushi Akashi ដែលជាប្រធាន UNTAC នាពេលនោះ ឲ្យតែងតាំងលោកជាអភិបាលខេត្តសៀមរាប ជាខេត្តដែលប្រឈមនឹងការប្រយុទ្ធគ្នាខ្លាំងរវាងភាគីប្រដាប់អាវុធកម្ពុជានាពេលនោះ។
លោក Widyono បានរៀបរាប់ថា ក្រោយមក ទើបលោកដឹងថា លោកមានសំណាងដែលបានជាន់លើទឹកដីខេត្តសៀមរាប និងកាន់តំណែងជាអភិបាលខេត្តសៀមរាបនាពេលនោះ ជាតំណែងដ៏គួរឲ្យបេតីណាស់៕