រដ្ឋមន្ត្រីក្រសួងមហាផ្ទៃអះអាងថា សមត្ថកិច្ចកំពុងតាមចាប់ខ្លួនអ្នកពាក់ព័ន្ធមួយចំនួនទៀត ក្នុងសំណុំរឿងគ្រឿងញៀននៅរ៉ក់ ក្នុងនោះក៏មានមន្ត្រីប៉ូលីសផងដែរ។
នៅក្នុងពិធីបូកសរុបការងារសាលារាជធានីភ្នំពេញនៅថ្ងៃនេះ លោក ស ខេង លើកឡើងក្តីបារម្ភដែលគ្រឿងញៀនរាលដាលខ្លាំង ហើយកំពុងតែបំផ្លាញពលរដ្ឋខ្មែរពិសេសក្រុមយុវជន។ លោក ក៏បានអំពាវនាវឲ្យកម្លាំងសមត្ថកិច្ចពង្រឹងទប់ស្កាត់ការជួញដូរគ្រឿងញៀន។
ក្នុងឱកាសនោះលោក ស ខេង ក៏បានលើកឡើងដែរថា ករណីជួញដូរគ្រឿងញៀននៅក្លឹបកម្សាន្តរ៉ក់ក្នុងរាជធានីភ្នំពេញពាក់ព័ន្ធនគរបាល។
កាលពីយប់ថ្ងៃទី២៣ខែកុម្ភៈ សមត្ថកិច្ចបានឆ្មក់ចូលក្នុងក្លិបកម្សាន្តរ៉ក់ក្នុងរាជធានីភ្នំពេញ ឃាត់ខ្លួនយុវជនជាង៣០០នាក់ រកឃើញគ្រឿងញៀន និងសារធាតុជាតិជាង៥០គីឡូក្រាម។ ក្រោយមកយុវជនភាគច្រើនត្រូវដោះលែង និងមួយចំនួនត្រូវបញ្ជូនទៅតុលាការ ចំណែកម្ចាស់ក្លិប លោក គិត ធាង ក៏ចាប់បញ្ជូនទៅតុលាការដែរ។
