ចលនាមាតាធម្មជាតិជំរុញឲ្យរដ្ឋាភិបាលពិចារណាឡើងវិញ ករណីលុបបឹងធម្មជាតិនៅខេត្តព្រះសីហនុ ដែលនាំឲ្យប៉ះពាល់ដល់បរិស្ថាន និងបណ្តាលឲ្យប្រជាពលរដ្ឋនៅតំបន់នោះខ្វះខាតទឹកសាបប្រើប្រាស់។
កាលពីម្សិលមិញ យុវជនចលនាមាតាធម្មជាតិលោក ថុន រដ្ឋា បានបណ្តេញខ្សែវីឌីអូមួយលើកឡើងពីផលប៉ះពាល់ដោយសារតែការលុបបឹងធម្មជាតិឈ្មោះបឹងព្រែកទប់។ យុវជនរូបនេះលើកឡើងថា បឹងធម្មជាតិព្រែកទប់រងការចាក់ដីលុប ក្រោយរដ្ឋាភិបាលបានកាត់ផ្ទៃដី ១១,៥០ហិកតា នៃផ្ទៃដីសរុបជាង១៦ហិកតា ឲ្យទៅក្រុមហ៊ុន លី យ៉ុងផាត់ កាលពីខែកុម្ភៈ ឆ្នាំ២០១៨កន្លងទៅ។
អ្នកនាំពាក្យខេត្តព្រះសីហនុ លោក ឃាង ភារម្យ បានប្រាប់ វីអូឌី ថា ករណីលុបបឹងព្រែកទប់ មិនមែនជារឿងថ្មីនោះទេ។ លោកថា ការកាត់ដីឲ្យក្រុមហ៊ុនជាការសម្រេចចិត្តរបស់រដ្ឋាភិបាល រដ្ឋបាលខេត្តព្រះសីហនុមិនមានសិទិ្ធក្នុងការសម្រេចនោះទេ។
លោកមានប្រសាសន៍ថា៖ «ករណីការលុបបឹងនេះ គឺមិនមែនជាសមត្ថកិច្ចកម្រិតខេត្តទេ ការអនុញ្ញាត ស.ជ.ណ ហ្នឹង គឺពីរាជរដ្ឋាភិបាល»។
អ្នកនាំពាក្យរូបនេះបន្តទៀតថា ករណីខ្វះខាតទឹកគឺបណ្តាលមកពីបម្រែបម្រួលអាកាសធាតុ បញ្ហាបណ្តាញរដ្ឋករទឹក និងក្រុមហ៊ុនឯកជនដែលទទួលខុសត្រូវមានការរអាក់រអួល មិនពាក់ព័ន្ធការលុបបឹងនេះទេ។
លោកបន្ថែមទៀតថា កន្លងមកក្រៅពីតំបន់ក្បាលឆាយ រដ្ឋបាលខេត្តព្រះសីហនុ និងក្រសួងធនធានទឹកបានសិក្សាពីលទ្ធភាពនៃការផ្គត់ផ្គង់ទឹកចំនួនពីរកន្លែងទៀត មានទំហំដល់ទៅ ៦២៥ហិកតា ដែលចំនួននេះអាចផ្គត់ផ្គង់ទឹកក្នុងខេត្តទាំងមូលរហូតជាង៣០ឆ្នាំទៀត។
