ភរិយាអ្នកបកប្រែភាសាឲ្យសារព័ត៌មានរុស្ស៊ី RT បានសម្រេចចិត្តចែកញត្តិស្វែងរកយុត្តិធម៌សម្រាប់ស្វាមីទៅសាធារណជន បន្ទាប់ពីការតវ៉ា១០ដងមកនេះមិនមានការឆ្លើយតបពីរដ្ឋាភិបាល និងស្ថាប័នពាក់ព័ន្ធ។
នៅព្រឹកថ្ងៃពុធនេះ គឺជាការតវ៉ាលើកទី១០ របស់អ្នកស្រី ឡុង គីមហ៊ាង នៅមុខស្ថានទូតរុស្ស៊ីគឺធ្វើឡើងរៀងរាល់ថ្ងៃពុធ។ ក្នុងញត្តិមានសរសេរជាភាសាខ្មែរ និងភាសាអង់គ្លេស ដែលអ្នកស្រី ឡុង គីមហ៊ាង ចែកទៅសាធារណជននៅថ្ងៃនេះ មានខ្លឹមសារអំពាវនាវឲ្យមានការដោះលែង លោក រ៉ាត់ រត្នមុនី។
ខ្លឹមសារញត្តិ៖ « រុស្ស៊ី ជួយអន្តរាគមន៍ដោះលែង រ៉ាត់ រត្នមុនី ផង! រ៉ាត់ រត្នមុនី កំពុងជាប់ឃុំទាំងអយុត្តិធម៌ ក្នុងគុកព្រៃស៩៧ថ្ងៃហើយ»។
អ្នកស្រី បន្តថា សកម្មភាពនេះដើម្បីអំពាវនាវឲ្យសាធារណជនបានដឹងរឿងពិតរបស់ស្វាមីអ្នកស្រី និងជំរុញទៅរដ្ឋាភិបាល ក៏ដូចជាស្ថាប័នពាក់ព័ន្ធជួយដោះស្រាយ។
លោក រ៉ាត់ រត្នមុនី កាលពីថ្ងៃទី១៣ ខែធ្នូ ឆ្នាំ២០១៨ ត្រូវបានតុលាការកម្ពុជាចោទប្រកាន់ និងបញ្ជូនទៅឃុំខ្លួននៅពន្ធនាគារព្រៃស ពាក់ព័ន្ធករណីផលិតខ្សែភាពយន្តឯកសាររបស់សារព័ត៌មានរុស្ស៊ី RT រឿង «ម្ដាយខ្ញុំលក់ខ្ញុំ»។