អង្គការឃ្លាំមើលសិទ្ធិមនុស្សអន្ដរជាតិ ទាមទារឲ្យអាជ្ញាធរកម្ពុជាបង្ហាញមុខបុរសម្នាក់ដែលជាអ្នកមានជម្លោះដីធ្លីនៅខេត្តព្រះវិហារ ហើយបានបាត់ដំណឹងសូន្យឈឹងអស់រយៈពេលជាង២ខែ ក្រោយត្រូវក្រុមទាហានវាយដំ និងចាប់ខ្លួននោះ។
លោក ស៊ុំ ម៉ឺន ជាពលរដ្ឋម្នាក់មានជម្លោះដីធ្លីជាមួយក្រុមហ៊ុន «មេត្រីភាព» ស្ថិតក្នុងឃុំយា ស្រុកជាំក្សាន្ត ត្រូវបានសាច់ញាតិ និងក្រុមគ្រួសារអះអាងថា បានបាត់ខ្លួនបន្ទាប់ពីពីលោក និងកូនប្រុសរបស់គាត់ឈ្មោះ «ម៉ឺន មាន» ត្រូវក្រុមទាហាននៅកងពលតូចលេខ៦ វាយដំ និងចាប់ខ្លួនរួមជាមួយពលរដ្ឋមានជម្លោះដីធ្លី ១៣នាក់ផ្សេងទៀត កាលពីថ្ងៃទី២០ ខែមករាកន្លងមក។
ប៉ុន្ដែ កាលពីថ្ងៃទី៦ ខែមីនាកន្លងមកនេះ ព្រះរាជអាជ្ញាសាលាដំបូងខេត្តព្រះវិហារ លោក ទី សុវិនថាល់ អះអាងថា បុរសរូបនេះបានរត់គេចខ្លួន និងសម្ងំលាក់ខ្លួនទៅតាមការណែនាំពីបុគ្គលម្នាក់ ដើម្បីទម្លាក់កំហុសទៅលើអាជ្ញាធរទៅវិញ។
ក្នុងសេចក្ដីថ្លែងការណ៍ចុះកាលពីថ្ងៃទី២០ ខែមីនាម្សិលមិញ អង្គការឃ្លាំសិទ្ធិមនុស្ស Human Rights Watch អះអាងថា បុរសឈ្មោះ «ស៊ុំ ម៉ឺន» បានបាត់ខ្លួនដោយបង្ខំ បន្ទាប់ពីក្រុមទាហានវាយដំលើរូបគាត់ និងចាប់បញ្ជូនខ្លួនទៅការិយាល័យនៃតំបន់ដែនជម្រកសត្វព្រៃគូលេនព្រហ្មទេព ដែលជាតំបន់ជាប់ប្រទល់រវាងខេត្តឧត្តរមានជ័យ និងខេត្តព្រះវិហារនោះ។
នាយកអង្គការឃ្លាំមើលសិទ្ធិមនុស្សប្រចាំតំបន់អាស៊ី លោក Brad Adams មានប្រសាសន៍ក្នុងសេចក្ដីថ្លែងថា អាជ្ញាធរកម្ពុជាគួរតែបង្ហាញពីកន្លែងដែលបុរសឈ្មោះ «ស៊ុំ ម៉ឺន» កំពុងស្នាក់នៅ ដោយថា ដើម្បីនាំខ្លួនរូបគាត់មកជំនុំជម្រះក្ដីតាមផ្លូវតុលាការ ឬឲ្យគាត់បានទៅជួបជុំគ្រួសារវិញ។
ប៉ុន្ដែ លោក Brad Adams មានប្រសាសន៍ទៀតថា ករណីនេះ គួរមានការស៊ើបអង្កេតឯករាជ្យ និងឆាប់រហ័ស ដោយមានការចូលរួមពីភាគីទាហាន ដែលស្ថិតក្រោមការបញ្ជារបស់អគ្គមេបញ្ជាការរងនៃកងយោធពលខេមរភូមិន្ទ លោក ហ៊ុន ម៉ាណែត ផងដែរ។
លោក Brad Adams មានប្រសាសន៍ក្នុងសេចក្ដីថ្លែងការណ៍ថា៖ «រដ្ឋាភិបាលកម្ពុជាត្រូវបង្ហាញមុខលោក ស៊ុំ ម៉ឺន នៅតុលាការ និងចោទប្រកាន់គាត់តាមផ្លូវច្បាប់ ឬនាំគាត់ត្រឡប់ទៅផ្ទះវិញឲ្យទៅជួបគ្រួសារ។ ករណីនេះ គឺគួរតែមានការស៊ើបអង្កេតឯករាជ្យ និងឆាប់រហ័សដោយមានការសហការពីខាងកងទាហាន ដែលបញ្ជាដោយកូនលោកនាយករដ្ឋមន្ដ្រី ហ៊ុន សែន គឺលោក ហ៊ុន ម៉ាណែត នោះ»។
លោក ស៊ុំ ម៉ឺន បានបាត់ដំណឹងជាង ២ខែមកហើយ ដោយតុលាការខេត្តព្រះវិហារបានចេញដីកាចាប់ខ្លួនបុរសរូបនេះ ចំណែកឯឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា OHCHR ក៏បានធ្វើការស៊ើបអង្កេតករណីនេះផងដែរ និងថា កំពុងធ្វើការជាមួយអាជ្ញាធរបន្ដទៀត៕
