ប្រមុខរដ្ឋាភិបាល ព្រមានប្រើច្បាប់អស្សាមិករណ៍ ដើម្បីបើកផ្លូវឲ្យក្រុមហ៊ុនចិនមួយ អាចសម្រេចគម្រោងធ្វើផ្លូវពីភ្នំពេញទៅខេត្តព្រះសីហនុ ដែលមានចំងាយជាង១៩០គីឡូម៉ែត្រ ។
ក្នុងពិធីបើកការដ្ឋានផ្លូវល្បឿនលឿន ដែលធ្វើឡើងនៅរាជធានីភ្នំពេញ នាថ្ងៃសុក្រនេះ លោក ហ៊ុន សែន ថ្លែងថា ផ្លូវនេះ ឆ្លងកាត់រាជធានី-ខេត្តចំនួន៥ មានរាជធានីភ្នំពេញ កណ្តាល កំពង់ស្ពឺ កោះកុង និងខេត្តព្រះសីហនុ ដែលប៉ះច្រើនជាងគេរហូតដល់ជិត៩០គីឡូ។ មេដឹកនាំរូបនេះ អំពាវនាវឲ្យមានការយោគយល់ដល់ការចុះដោះស្រាយសំណង។
ប៉ុន្តែ លោក ហ៊ុន សែន ព្រមានថា រដ្ឋាភិបាលនឹងប្រើវិធានការច្បាប់ជាជម្រើសចុងក្រោយ ដូចតំបន់អភិវឌ្ឍន៍មួយចំនួនដែរ បើការចរចាផ្តល់សំណងពីផលប៉ះពាល់ត្រូវបានបរាជ័យ។
លោកថា៖ «ករណីស្ពានអ្នកលឿង រាប់រយគ្រួសារចេញអស់ហើយ ដោះស្រាយ ប៉ុន្តែនៅសល់២គ្រូសារអត់ព្រមចេញ ដល់អញ្ចឹងត្រូវធ្វើម៉េច! ទុកឲ្យស្ពានអ្នកលឿងកសាងមិនបាន? ដោយជំនួយរបស់ជប៉ុន មានអីច្បាប់អស្សាមិករណ៍ត្រូវបានអនុវត្តដោយរើផ្ទះហ្នឹងចេញហ្មង ហើយយកធ្វើស្ពាន។ ថ្នល់ពីថ្នល់កែងដល់ខេត្តសៀមរាប។ ជាង៤ពាន់គ្រួសារចាកចេញយកថ្នូរជាប្រាក់ចាកចេញ នៅសល់៤២គ្រួសារមិនព្រម អញ្ចឹងត្រូវធ្វើម៉េច គឺច្បាប់អស្សាមិករណ៍ត្រូវអនុវត្ត។ អាហ្នឹង រឿងវាតែប៉ុណ្ណឹង»។
ច្បាប់អស្សាមិករណ៍ មាត្រា៤ ពន្យល់ថា អស្សាមិករណ៍សំដៅដល់ការដកហូតកម្មសិទ្ធិលើអចលនវត្ថុ រួមមាន ដី សំណង់ និងដំណាំដាំដុះ សម្រាប់បម្រើការស្ថាបនា ស្តារ និងពង្រីកហេដ្ឋារចនាសម្ព័នរូបវ័ន្តសាធារណៈ ដែលបម្រើប្រយោជន៍សាធារណៈ និងប្រយោជន៍ជាតិ។
ប៉ុន្តែ មាត្រា១៩ ចែងថា៖ «ការដកហូតកម្មសិទ្ធិលើអចលនវត្ថុ និងសិទ្ធិប្រត្យក្ស អាចធ្វើទៅបានលុះណាតែគណៈកម្មាធិការ អស្សាមិករណ៍ បានផ្តល់សំណងឲ្យម្ចាស់អចលនវត្ថុ និងម្ចាស់កម្មសិទ្ធិជាមុន ដោយសមរម្យនិងយុត្តិធម៌»។
នាយកមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា ដើម្បីជំរុញតម្លាភាពនៃការដោះស្រាយសំណង រដ្ឋាភិបាលគួរជំរុញយន្តការដោះស្រាយមុនអនុញ្ញាតឲ្យក្រុមហ៊ុនអនុវត្តគម្រោង។
លោក យង់ គិមអេង បង្ហាញការព្រួយបារម្ភថា ករណីនេះ អ្នករងផលប៉ះពាល់អាចប្រឈមទៅនឹងការដាក់សម្ពាធ ឲ្យទទួលយកសំណងតិចតួច ឬត្រូវបណ្តេញចេញទាំងបង្ខំ ដូចតំបន់អភិវឌ្ឍន៍មួយចំនួនទៀតដែលបានកើតឡើងកន្លងមក បើការដោះស្រាយនោះមានការឃុបឃិតគ្នាជាប្រព័ន្ធពីមន្ត្រីចុះអនុវត្តច្បាប់នោះ។
លោកថា៖ «ផលប្រយោជន៍ជាតិ វាធំជាងប្រយោជន៍បុគ្គលម្នាក់ៗមែន។ ក៏ប៉ុន្តែ នៅក្នុងនោះដែរ ដើម្បីបង្ហាញពីការទទួលខុសត្រូវ រដ្ឋត្រូវតែដោះស្រាយកុំឲ្យប្រជាជនគាត់រងការឈឺចាប់ដែរ។ ធ្វើយ៉ាងណាឲ្យប្រជាពលរដ្ឋហ្នឹងអាចទទួលបានសំណងសមរម្យ ដែលអាចធ្វើឲ្យគាត់អាចទៅរកផ្ទះ[ថ្មី]បានសមរម្យ បើសិនជាចំផ្ទះគាត់»។
រដ្ឋមន្ត្រីក្រសួងសាធារណការ និងដឹកជញ្ជូនរបស់កម្ពុជា លោក ស៊ុន ចាន់ថុល អះអាងថា ផ្លូវល្បឿនលឿនមួយខ្សែប្រវែងជាង១៩០គីឡូម៉ែត្រនេះ តភ្ជាប់ពីភូមិ១ ក្នុងសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ទៅដល់ភូមិ១ សង្កាត់លេខ៣ ក្រុងព្រះសីហនុ។ ផ្លូវនេះ វិនិយោគតាមរូបភាពសាងសង់ ធ្វើអាជីវកម្ម ហើយប្រើរយៈពេលសាងសង់៤ឆ្នាំ ចំណាយថវិកា២ពាន់លានដុល្លារ ជាទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន CRBC តាមរយៈក្រុមហ៊ុន Cambodian PPSHV Expressway Co. Ltd។
បើតាមអនុរដ្ឋមន្ត្រីក្រសួងការបរទេសចិន លោក ខុង សៀនយ៉ូ ដែលបានចូលរួមកម្មវិធិនេះដែរ បានអះអាងថា ផ្លូវល្បឿនលឿនមួយខ្សែនេះ កើតចេញពីចំនុចចាប់ផ្តើមនៃគោលនយោបាយខ្សែក្រវ៉ាត់មួយផ្លូវមួយ៕