កម្មការិនីបម្រើការងារនៅរោងចក្រកាត់ដេរសម្លៀកបំពាក់ ឥណ្ឌូចិន អឹភែរឹល ខេមបូឌា ស្ថិត ស្រុកខ្សាច់កណ្ដាល ខេត្តកណ្ដាល បានដួលសន្លប់ ក្រោយពីធំក្លិនចេញពីការផ្សាដែក និងទុយោទឹកនៅក្នុងរោងចក្រ។
ស្នងការនគរបាលខេត្តកណ្ដាល លោក អ៊ាវ ចំរើន ប្រាប់ វីអូឌី នៅថ្ងៃនេះ ថាកម្មករដែលបានដួលសន្លប់ បន្ទាប់ពីពួកគេធំក្លិនពីការផ្សាដែក និងទុយោទឹកនៅក្នុងរោងចក្រនោះ។ លោកបន្តថា អ្នកដួលសន្លប់មានចំនួន ៨៤នាក់ជាស្ត្រី ហើយក្នុងចំណោម ៨៤នាក់នោះ គឺស្រ្ដីមានផ្ទៃពោះ២នាក់។
លោកថា៖ «ផ្សារដែកផ្សាធុងជ័រ។ គេកំពុងជួសជុលធុងជ័រ ដាក់ទឹកដាក់អីហ្នឹងទៅ ទុយោទឹកអីទៅ គាត់ទ្រាំក្លិនហ្នឹងមិនបាន ក៏គាត់នេះទៅ [សន្លប់] ជាង៨០ នាក់ ទៅដល់ពេទ្យ [ឥឡូវ] គាត់វិលមកវិញមក។ នៅសល់តែអ្នកមានផ្ទៃពោះប៉ុន្មាននាក់ គាត់នៅបញ្ចូលសេរ៉ូមគាត់ខ្សោយអញ្ចឹង គាត់វិលមុខអីអញ្ចឹងទៅ មិនមានអីធំដុំទេ»។
មន្រ្ដីនគរបាល ឲ្យដឹងថា កម្មករកម្មការិនីដែលធ្វើការក្នុងរោងចក្រកាត់ដេរ ឥណ្ឌូចិន អឹភែរឹល ខេមបូឌាមានចំនួន៣២៥០នាក់ ប្រុស២៦៧នាក់ ៕
