អ្នកឃ្លាំមើលបញ្ហាសង្គម ចាត់ទុកការបង្កើតមូលនិធិជួយគ្រួសារសពបុរសម្នាក់ដែលត្រូវជនជាតិជប៉ុនពីរនាក់ប្លន់សម្លាប់ ជាការទទួលខុសត្រូវខ្ពស់របស់រដ្ឋាភិបាល និងប្រជាជនជប៉ុន។
កាលពីថ្ងៃទី១៧ ខែមីនា ឆ្នាំ២០១៩ សមត្ថកិច្ចខេត្តសៀមរាប បានចាប់ខ្លួនជនជាតិជប៉ុនពីរនាក់ ករណីប្លន់សម្លាប់បុរសជាអ្នករត់តាក់ស៊ីម្នាក់ នៅស្រុកពួក ខេត្តសៀមរាប ដើម្បីប្លន់យករថយន្ត។ ជនរងគ្រោះដែលស្លាប់នោះមានឈ្មោះ ហ៊ឹម ចាន់ រស់នៅភូមិជាន់ត្រាច ឃុំឈូកដាច់ ស្រុកបារាយណ៍ ខេត្តកំពង់ធំ។
ក្រោយហេតុការណ៍នេះ ទាំងស្ថានទូតជប៉ុន និងពលរដ្ឋរបស់ខ្លួនបានបង្ហោះសារផ្ញើរចូលរួមរំលែកទុក្ខដល់គ្រួសារសព ដោយសម្តែងនូវការសោកស្តាយបំផុតចំពោះទង្វើរបស់បុរសទាំងពីរនាក់នោះ។ មិនត្រឹមតែប៉ុណ្ណោះ ប្រជាជនជប៉ុនមួយចំនួនក៏បានរៃអង្គាសប្រាក់ និងកៀងគរបង្កើតជាមូលនិធិសម្រាប់ជួយទំនុកបម្រុងគ្រួសារសពផងដែរ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង យល់ថា ការដែលជប៉ុនផ្ញើសារចូលរួមរំលែកទុក្ខ និងជួយថវិកាដល់គ្រួសារជនរងគ្រោះនេះ បង្ហាញឲ្យឃើញពីការទទួលខុសត្រូវខ្ពស់របស់រដ្ឋាភិបាលជប៉ុន ចំពោះទង្វើដែលពលរដ្ឋរបស់ខ្លួនបានប្រព្រឹត្តកន្លងមក។
លោកបន្តថា ជប៉ុនផ្ញើសារនេះ ក៏ជាការព្រមានដល់ពលរដ្ឋរបស់ខ្លួន កុំឲ្យប្រព្រឹត្តទង្វើខុសឆ្គងទៀត ដោយជប៉ុនចាត់ទង្វើនេះ បានធ្វើឲ្យប៉ះពាល់ដល់កិត្តិយសប្រទេសជាតិ ក៏ដូចជាពលរដ្ឋជប៉ុនទាំងមូលផងដែរ។
លោកថា៖ នេះជាសារមួយប្រាប់ទៅប្រជាជនជប៉ុនទាំងមូលថា ទង្វើបែបនេះ ទាំងរដ្ឋាភិបាលជប៉ុន ទាំងប្រជាជាតិជប៉ុន គេអត់អាចទទួលយកបានទេ ហើយជាសារមួយដែរ [បង្ហាញថា] ពួកគេ [ជប៉ុន]ស្អប់ខ្ពើម ទង្វើបែបនេះ។ អញ្ចឹងហើយ បានជាគេទៅចូលរួមគាំទ្រ គេបង្ហាញទឹកចិត្តរបស់គេចំពោះប្រជាជាតិទៅចំពោះជនរងគ្រោះហ្នឹង ដើម្បីឲ្យគេបានធូរក្នុងអារម្មណ៍ នៅក្នុងចិត្តរបស់គេ កុំឲ្យអារម្មណ៍ដូចជានៅក្នុងចិត្តរបស់គេពោលពេញទៅក្ដីឈឺចាប់ ហើយនិងទុក្ខកង្វល់ វាខ្លាំងពេក!»។
អ្នកនយោបាយជើងចាស់ម្នាក់ លោក ឡៅ ម៉ុងហៃ ចាត់ទុកការចូលរួមរំលែកទុក្ខ និងការបង្កើតមូលនិធិជួយជនរងគ្រោះនេះ បានពីការឈឺចាប់របស់រដ្ឋាភិបាលនិងពលរដ្ឋជប៉ុនផងដែរ។ លោកបន្តថា សារនេះក៏បង្ហាញពីការទទួលខុស និងជាគំរូល្អសម្រាប់ប្រទេសផ្សេងៗទៀតធ្វើតាមផងដែរ។
លោកថា៖ «ការធ្វើបែបនេះ ជាការលុបលាងការអៀនខ្មាស់ គឺគេចេញលុយសង ហើយគេសុំទោសទៀតផង នេះជាការទទួលខុសត្រូវខ្លាំងណាស់។ អញ្ចឹង ជនជាតិដទៃទៀត គួរតែរៀនពីជប៉ុន»។
អ្នកតាមដានពីការអភិវឌ្ឍសង្គម លោក ប៉ា ច័ន្ទរឿន ក៏យល់ឃើញប្រហាក់ប្រហែលនឹងលោក យង់ គិមអេង និងលោក ឡៅ ម៉ុងហៃ ដែរ។
លោកថា៖ «គេមិនត្រឹមតែទទួលខុសត្រូវ ចំពោះទង្វើទាំងអស់នោះទេ គេក៏បង្ហាញពីសន្ដានចិត្ត ដូចជា ការជួយគ្រួសារអ្នកដែលរងគ្រោះ។ កន្លងមក ដូចជាកម្រឃើញស្ថាតទូតមុខសុំទោស ឬក៏បង្កើតជាមូលនិធិ ដើម្បីជួយដល់គ្រួសារជនរងគ្រោះ ដូចជាស្ថានទូតជប៉ុន និងជនជាតិជប៉ុនហ្នឹងណាស់»។
គួរបញ្ជាក់ថាក្រោយការប្លន់សម្លាប់បុរសជនជាតិខ្មែរដោយជនជាតិជប៉ុនទាំងពីរនាក់នោះ សមាគមជប៉ុនប្រចាំកម្ពុជា បានបង្កើតមូលនិធិមួយស្វែងរកប្រាក់ដើម្បីជួយដល់គ្រួសារសព។ ជាមួយគ្នានេះប្រធានក្លឹប Angkor Tiger លោក Akihiro Kato បង្ហាញការសុំទោសដល់ប្រជាជនកម្ពុជា ករណីដែលជនជាតិជប៉ុនពីរនាក់សម្លាប់ពលរដ្ឋខែ្មរ នៅលើទំព័រហ្វេសប៊ុក Cambodia Football News។ ក្រៅពីបង្ហាញការសុំទោស លោក Akihiro Kato ប្រធានក្លឹប Angkor Tiger និងមិត្តភក្ដិរួមជាមួយកីឡាករជនជាតិជប៉ុនដែលប្រកបអាជីពនៅកម្ពុជា បានជួយថវិកាដល់គ្រួសារជនរងគ្រោះផងដែរ៕