មន្ត្រីជាន់ខ្ពស់មួយរូបនៅសហព័ន្ធកាយវប្បកម្ម ប្រកាសលាលែងពីតំណែង ដោយសារមិនពេញចិត្តនឹងការដឹកនាំរបស់ប្រធានសហព័ន្ធ និងមានភាពមិនប្រក្រតីក្នុងការផ្តល់ប្រាក់រង្វាន់សម្រាប់កីឡាករកាយវប្បកម្មដែលកើតឡើងថ្មីៗនេះ។
អគ្គលេខាធិការខេមរៈសហព័ន្ធកាយវប្បកម្មនិងលំហាត់ប្រាណ (CBBFF) លោក តឹក ប៊ុនវី បានប្រកាសឲ្យដឹងពីការលាលែងតំណែង នៅលើទំព័រហ្វេសប៊ុករបស់លោកកាលពីថ្ងៃសៅរ៍ទី២៣ ខែមីនា និងសម្តែងការមិនសប្បាយចិត្តនឹងការដឹកនាំរបស់ប្រធានសហព័ន្ធបច្ចុប្បន្ន ដោយលោកចោទប្រកាន់ថា ប្រធានរូបនេះមិនបានគិតដល់ប្រយោជន៍រួម។
លោកបានប្រកាសថា៖ «ខ្ញុំបាទ តឹក ប៊ុនវី ជាអគ្គលេខាធិការ ខេមរៈសហព័ន្ធកាយវប្បកម្មនិងជាកីឡាករជម្រើសជាតិម្នាក់ដែរ សូមប្រកាសលាលែងពីសហព័ន្ធចាប់ពីពេលនេះតទៅ មូលហេតុមកពីប្រធានសហព័ន្ធគិតតែពីផលប្រយោជន៍ផ្ទាល់ខ្លួន»។
លោក តឹក ប៊ុនវី ជាម្ចាស់មេដាយមាសអាស៊ីអាគ្នេយ៍មុនគេនៅឆ្នាំ២០១៦ និងមេដាយសំរឹទ្ធពិភពលោកនៅឆ្នាំ២០១៦ ផងដែរ។ លោកបានចោទប្រកាន់លោក ស៊ីម សុកមង្គលរស្មី ជាប្រធានសហព័ន្ធបច្ចុប្បន្នថា បានយកចំណេញពីកីឡាករ ដោយយកកីឡាករធ្វើមុខជំនួញ ដើម្បីរៃអង្គាសប្រាក់ពីបរទេស ប៉ុន្តែមិនបានដាក់ប្រាក់ទៅក្នុងសហព័ន្ធទេ។
ប្រធានខេមរៈសហព័ន្ធកាយវប្បកម្ម លោក ស៊ីម សុកមង្គលរស្មី បានប្រាប់ VOD ថា លោកបានដឹងពីការប្រកាសលាលែងនេះមែន ប៉ុន្តែលោកថា នៅមិនទាន់ដឹងច្បាស់ថា ជាការលាលែងផ្លូវការឬយ៉ាងណានោះទេ។ លោកបានបដិសេធផ្តល់ព័ត៌មានលម្អិតចំពោះការចោទប្រកាន់មកលើរូបលោក។
លោក ស៊ីម សុកមង្គលរស្មី បានមានប្រសាសន៍ថា៖ «ខ្ញុំអត់មានឆ្លើយតបអ្វីទេ។ គេចោទស្អីៗតាមតែគេទៅ។ គេនិយាយអី្វតាមគេទៅ»។
ការលាលែងរបស់អគ្គលេខាធិការរូបនេះ កើតមានក្នុងរយៈពេលប្រមាណពីរសប្តាហ៍ បន្ទាប់ពីមានភាពចម្រូងចម្រាសជុំវិញបញ្ហាប្រាក់រង្វាន់សម្រាប់កីឡាករកាយវប្បម្ម សំបូរ សុភ័ណ្ឌ ដែលទើបទទួលបានមេដាយមាសពិភពលោកកាលពីពាក់កណ្តាលខែធ្នូ ឆ្នាំ២០១៨កន្លងទៅនេះ និងស្របពេលដែលកីឡាករមួយចំនួនទៀតប្រកាសលាលែងពីក្រុមជម្រើសជាតិ។
លោក សំបូរ ណាន ជាម្ចាស់មេដាយមាសពិភពលោកឆ្នាំ២០១៧ ក៏បានបង្ហាញការមិនពេញចិត្តរបស់លោកចំពោះការដឹកនាំរបស់ប្រធានបច្ចុប្បន្នផងដែរ ហើយថា សហព័ន្ធមួយនេះអាចនឹងត្រូវរំសាយ។
លោក សំបូរ ណាន បានមានប្រសាសន៍ថា៖ «ខ្ញុំគិតថា បើសិននៅតែប្រធានដើមដដែល ខ្ញុំគិតថា អត់មានការរីកចម្រើនទៅមុខទេ។ ខ្ញុំគិតថា មិនយូរទេ ប្រហែលជារំសាយ»។
លោក សំបូរ ណាន ក៏បានសម្តែងការខកចិត្តរបស់លោកផងដែរ ខណៈពេលកីឡាកាយវប្បកម្មទើបនឹងមានការរីកចម្រើនខ្លាំងប៉ុន្មានឆ្នាំចុងក្រោយ ប៉ុន្តែបែរជាមិនសូវទទួលបានយកចិត្តទុកដាក់និងឧបត្ថម្ភគាំទ្រពីស្ថាប័នពាក់ព័ន្ធទៅវិញ។ លោកថា មកដល់ពេលនេះមានកីឡាករខ្លាំងៗដូចជា ប្រាក់ សុបិន សំបូរ នន់ និងរូបលោកផ្ទាល់បានប្រកាសលាលែងនិងសម្រាកពីក្រុមជម្រើសជាតិ ចំណែកប្អូនប្រុសរបស់លោកឈ្មោះ សំបូរ សុភ័ណ្ឌ ស្ថិតក្នុងការពិចារណា។
លោកបានមានប្រសាសន៍ថា៖ «ប្រសិនបើក្រសួងនៅតែធ្វើមិនអើពើជាមួយអ្នកកីឡាករ [ខ្ញុំ] គិតថា គ្មាននរណាមានកម្លាំងចិត្តនឹងទៅប្រកួតទេ ព្រោះពេលចេញប្រកួតម្តងៗខាងក្រសួងក៏មិនដែលបានជួយស្អីដែរ។ មានតែកីឡាកររកលុយខ្លួនឯង។ ហូបចុកខ្លួនឯង»។
ភាពចម្រូងចម្រាសនិងការរិះគន់នៅលើបណ្តាញសង្គមបានកើតមានភ្លាមៗ បន្ទាប់ពីកីឡាករ សំបូរ សុភ័ណ្ឌ បានបង្ហោះសារនៅលើទំព័រហ្វេសប៊ុករបស់ខ្លួន អំពាវនាវសុំអន្តរាគមន៍ពីលោកនាយករដ្ឋមន្ត្រី ដោយអះអាងថា ក្រសួងបានទម្លាក់ប្រាក់រង្វាន់លើកទឹកចិត្តពី១២០លានរៀលមកត្រឹម២០លានរៀលវិញ។
កីឡាករ សំបូរ សុភ័ណ្ឌ អាយុ២៤ឆ្នាំដែលមានចំណូលចិត្តនឹងកីឡាកាយវប្បកម្មតាំងពីអាយុ១៦ឆ្នាំបានសម្តែងការខកចិត្ត ហើយថា ទាំងលោកនិងសហព័ន្ធរបស់លោកមិនទទួលបានការបញ្ជាក់ឲ្យដឹងជាមុនជុំវិញប្រាក់រង្វាន់ ២០លានរៀលនោះដែរ។
លោកបានមានប្រសាសន៍ថា៖ «ចឹងខ្ញុំមានអារម្មណ៍ថា តូចចិត្តនិងបាក់ទឹកចិត្តពីព្រោះថា ប្រាក់រង្វាន់ដែលខ្ញុំរំពឹងគឺ១២០លាន»។
កន្លងមកលោក តឹក ប៊ុនវី ធ្លាប់បាននិយាយថា លោកនឹងដើរចេញពីសហព័ន្ធប្រសិនបើគ្មានដំណោះស្រាយសម្រាប់កីឡាកររបស់លោក។ លោកបានអះអាងថា លោកមិនអាចទទួលយកបានទេ ដោយសារលោកទើបទទួលបានប្រកាសចុះថ្ងៃទី៣១ ខែមករា ឆ្នាំ២០១៩ របស់ក្រសួងអប់រំ យុវជននិងកីឡាករនៅដើមខែមីនានេះ ដែលប្រកាសផ្តល់ប្រាក់រង្វាន់មេដាយមាសពិភពលោកត្រឹម២០លានរៀល ដែលខុសពីបណ្តាឆ្នាំកន្លងមកនិងខុសពីការរំពឹងទុករបស់កីឡាករមុនពេលចេញទៅចូលរួមប្រកួត ហើយថា ក្រសួងគួរប្រកាសឲ្យដឹងមុនពេលកីឡាករចេញទៅប្រកួត។
បញ្ហានេះបានធ្វើឲ្យមានការចោទប្រកាន់ថា មានការកាត់យកប្រាក់រង្វាន់១០០លានរៀល ប៉ុន្តែតំណាងក្រសួងអប់រំលោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡានៃក្រសួងអប់រំ យុវជននិងកីឡា បានច្រានចោលការចោទប្រកាន់ទាំងនេះ ដោយលោកលើកឡើងថា អ្វីៗគឺធ្វើទៅតាមគោលការណ៍ដែលបានគំណត់ដោយក្រសួងអប់រំ យុវជននិងកីឡាករនិងក្រសួងហិរញ្ញវត្ថុ ហើយថា គ្មានដំណោះស្រាយអ្វីលើសពីនេះទេ។
លោក អ៊ុក សិទ្ធិជាតិ បានមានប្រសាសន៍ថា៖ «គោលការណ៍ចឹង ខ្ញុំមានសិទ្ធិស្នើទៅក្រសួងហិរញ្ញវត្ថុប៉ុណ្ណឹង ហើយខ្ញុំក៏គ្មានសិទ្ធិដាក់លើសដែរ បើខ្ញុំដាក់លើសក៏ខ្ញុំមានទោសដែរ»។
លោកបន្ថែមថា គោលការណ៍របស់រដ្ឋាភិបាលកំណត់ប្រាក់រង្វាន់លើកទឹកចិត្ត២០លានរៀលសម្រាប់ជើងឯកពិភពលោកនេះ គឺត្រូវបានផ្សព្វផ្សាយទូលំទូលាយ ហើយត្រូវបានអនុវត្តដូចៗគ្នាទាំងអស់មិនមែនតែចំពោះកីឡាកាយវប្បកម្មប៉ុណ្ណោះទេ។ លោកថា ប្រាក់រង្វាន់លើកទឹកចិត្ត១២០លានរៀលវិញគឺ ឈរលើគោលការណ៍ពិសេស ព្រោះកន្លងមកកម្ពុជាមិនសូវទទួលបានមេដាយ។
បច្ចុប្បន្ន កម្ពុជាមានសហព័ន្ធកីឡាករដល់ទៅ៥២សហព័ន្ធក្នុងនោះ មាន២៥សហព័ន្ធជាកីឡាករអូឡាំពិក និង២៧សហព័ន្ធមិនមែនជាកីឡាអូឡាំពិក។ កីឡាករកម្ពុជា ទទួលបានមេដាយមិនតិចជាង១៥០គ្រឿង ក្នុងមួយឆ្នាំៗក្នុងកម្រិតពិភពលោក កម្រិតទ្វីប កម្រិតតំបន់។
សូមបញ្ជាក់ថា កម្ពុជាបានបញ្ជូនកីឡាករ៥រូបទៅចូលរួមប្រកួតជ្រើសរើសជើងឯកពិភពលោកលើកទី១០ ពីថ្ងៃទី១១ដល់ថ្ងៃទី១៧ ខែធ្នូ ឆ្នាំ២០១៨ នៅទីក្រុងឈៀងម៉ៃ ប្រទេសថៃ ដែលមាន៥១ប្រទេសចូលរួម។ ក្នុងចំណោមកីឡាករកម្ពុជា៥រូប មានតែកីឡារ សំបូរ សុភ័ណ្ឌ ម្នាក់គត់ទទួលបានមេដាយ៕
