រាជរដ្ឋាភិបាលសម្រេចបង្កើតក្រុមការងារតាមវិស័យ ដើម្បីធ្វើជាដៃគូពិភាក្សាការងារជាមួយវិស័យឯកជន ហើយក្រុមការងារនេះមានសមាសភាពមកពីក្រសួងពាក់ព័ន្ធមួយចំនួនផងដែរ។
សេចក្តីសម្រេចមួយដែលចេញដោយរាជរដ្ឋាភិបាលកពីថ្ងៃ២៥ ខែមីនា បានប្រកាសតែងតាំងសមាសភាពក្រុមការងារតាមវិស័យ សម្រាប់ពិភាក្សាការងារជាមួយវិស័យឯកជន ដោយមានចំនួន១២ ក្រុម និងមានសមាសភាពប្រធាន អនុប្រធាន និងសមាជិក ចំនួនជាង៣០០នាក់ (៣១៩)។
ថ្លែងក្នុងពិធីចែកសញ្ញាបត្រឱ្យនិស្សិតនៅរាជធានីភ្នំពេញនៅថ្ងៃនេះ លោក ហ៊ុន សែន ក៏បានបញ្ជាក់ជាថ្មីថា រដ្ឋាភិបាលប្តេជ្ញាធ្វើកំណែទម្រង់នានា ដើម្បីសម្រួលដល់វិស័យឯកជនឱ្យកាន់តែប្រសើរ និងជំរុញឯករាជ្យភាពសេដ្ឋកិច្ចរបស់ខ្លួន ដោយមិនត្រូវពឹងផ្នែកលើប្រព័ន្ធអនុគ្រោះពន្ធពីបរទេសនោះឡើយ។
រដ្ឋាភិបាលបានផ្តើមយុទ្ធនាការពង្រឹងឯករាជ្យសេដ្ឋកិច្ចរបស់ខ្លួន និងធ្វើកំណែទម្រង់ ដើម្បីសម្រួលដល់វិស័យឯកជនជាបន្តបន្ទាប់ រួមមាន វិធានការមិនយកពន្ធលើប្រាក់ចំណេញចំពោះសហគ្រាសកសិកម្មរយៈពេល៥ឆ្នាំ វិធានការដកកាំកុងត្រូលចេញពីព្រំដែន ការលុបចោលស្ថាប័ននាវាចរកាំសាប និងការលុបចោលការិយាល័យក្រសួងនៅថ្នាក់ស្រុកមួយចំនួនជាដើម។
យុទ្ធនាការកំណែទម្រង់ផ្ទៃក្នុងនេះ ធ្វើឡើងក្រោយពេលសហភាពអឺរ៉ុប និងសហរដ្ឋអាមេរិកបានព្រមានដកប្រព័ន្ធអនុគ្រោះពន្ធ EBA និង GSP ពីកម្ពុជានៅពេលខាងមុខ ប្រសិនបើរដ្ឋាភិបាលមិនព្រមស្តារស្ថានការណ៍នយោបាយ និងសិទ្ធិមនុស្ស ឱ្យបានប្រសើរនោះទេ៕