សមត្ថកិច្ចរារាំងក្រុមគ្រួសារនិងអ្នកគាំទ្រ លោក រ៉ាត់ រត្នមុនី មិនឲ្យទៅឈរនៅក្បែររបងស្ថានទូតរុស្ស៊ី ដោយសមត្ថកិច្ចថា ធ្វើឡើងតាមសំណើរបស់រុស្ស៊ី។
ភរិយានិងសកម្មជនដីធ្លីដែលគាំទ្រលោក រ៉ាត់ រត្នមុនី នៅព្រឹកនេះ បានតវ៉ានៅមុខស្ថានទូតរុស្ស៊ីជាថ្មីទៀត ដើម្បីស្នើសុំឲ្យរដ្ឋាភិបាលរុស្ស៊ីជួយអន្តរាគមន៍ដោះលែងអ្នកបកប្រែភាសាឲ្យទូរទស្សន៍រុស្ស៊ី RT មួយនេះ។ ប៉ុន្តែ ការតវ៉ានេះ ត្រូវក្រុមសមត្ថកិច្ចរារាំងដោយមិនអនុញ្ញាតឲ្យពួកគេទៅឈរនៅក្បែររបងស្ថានទូតឡើយ។
ក្រៅពីមិនអនុញ្ញាឲ្យឈរនៅក្បែររបងហើយ សមត្ថកិច្ចក៏បានគំរាមដកយកឧបករណ៍បំពងសំឡេង និងបានរុញច្រានអ្នកតវ៉ាទាំងនេះទៅម្ខាងទៀតនៃផ្លូវ។
មន្ត្រីនគរបាលដែលយាមនៅមុខស្ថានទូតរុស្ស៊ី លោក លាង ស៊ីថា ប្រាប់អ្នកសារព័ត៌មាន វីអូឌី ថា ការដែលពួកគាត់រារាំងមិនឲ្យអ្នកតវ៉ាឈរជាប់របងស្ថានទូត លោកថា ធ្វើទៅតាមបញ្ជាថ្នាក់លើ។
ភរិយាលោក រ៉ាត់ រត្នមុនី គឺអ្នកស្រី ឡុង គឹមហ៊ាង លើកឡើងថា ស្ថានទូតរុស្ស៊ីចង់គេចវេសការទទួលខុសត្រូវចំពោះរឿងស្វាមីរបស់អ្នកស្រី ទើបបានរារាំងពួកគាត់មិនឲ្យទៅឈរតវ៉ាជាប់របងខាងមុខស្ថានទូតនោះ។
អ្នកស្រីថា៖ «ការតែងរារាំងបែបនេះ គឺពួកគេមិនចង់ឲ្យរឿងរបស់ខ្ញុំលឺ ត្រូវបានលឺដល់គ្រប់គ្នា ហើយពួកគេធ្វើបែបនេះ ដើម្បីបង្ហាញថា ទូតរុស្ស៊ីគេចវេសព្រងើយកន្តើយ អត់ជួយរឿងប្ដីរបស់ខ្ញុំ»។
អ្នកស្រីបន្តថា បើសិនជារដ្ឋាភិបាលរុស្ស៊ីមិនជួយអន្តរាគមន៍ឲ្យដោះលែងស្វាមីទេ អ្នកស្រីនៅតែបន្តតវ៉ា ទោះមានការគំរាមកំហែងក៏ដោយ។
កាលពីថ្ងៃទី១៣ ខែធ្នូ ឆ្នាំ២០១៨ លោក រ៉ាត់ រត្នមុនី ត្រូវបានតុលាការកម្ពុជាចោទប្រកាន់ និងបញ្ជូនទៅឃុំខ្លួននៅពន្ធនាគារព្រៃស ពាក់ព័ន្ធករណីទូរទស្សនរុស្ស៊ី RT ផលិតរឿង «ម្ដាយខ្ញុំលក់ខ្ញុំ» ដែលរដ្ឋាភិបាលចាត់ទុកថា ជាការធ្វើឲ្យប៉ះពាល់ដល់កេរ្តិ៍ឈ្មោះរបស់កម្ពុជា។
លោកត្រូវបានតុលាការចោទប្រកាន់ពីបទញុះញង់ឲ្យមានការរើសអើង តាមមាត្រា ៤៩៦នៃក្រមព្រហ្មទណ្ឌ ដែលត្រូវប្រឈមនឹងទោសក្នុងពន្ធនាគារពី១ ទៅ៣ឆ្នាំ។
ខ្សែភាពយន្តឯកសារនេះ និយាយពីស្ថានភាពស្ត្រីខ្មែរសម្រេចចិត្តលក់កូនស្រីឲ្យបម្រើផ្លូវភេទដោយសារតែជីវភាពក្រីក្រ។ ទាំង RT និងអ្នកផលិតអះអាងថា នេះជារឿងរ៉ាវពិតកំពុងតែកើតមានឡើងនៅកម្ពុជា ប៉ុន្តែ រដ្ឋាភិបាលចាត់ទុកថា នោះជារឿងមិនពិតដែលប្រឌិតឡើង ដើម្បីធ្វើឲ្យខូចឈ្មោះប្រទេស។
