ម្តាយជនរងគ្រោះក្នុងព្រឹតិ្តការណ៍គប់គ្រាប់បែកកាលពីថ្ងៃទី៣០ខែមីនាឆ្នាំ១៩៩៧ អំពាវនាវឲ្យរដ្ឋាភិបាលទប់ស្កាត់ការចាប់ចង ឬសម្លាប់ក្រោមរូបភាពផ្សេងៗព្រោះថា មនុស្សមានជីវិតតែមួយដូចគ្នាទាំងមន្ត្រីជាន់ខ្ពស់ និងប្រជាពលរដ្ឋសាមញ្ញ។
ក្នុងពិធីរំឭកខួប២២ឆ្នាំនៅព្រឹកនេះអ្នកស្រី លី នារី រំឭកថា កូនប្រុសរបស់គាត់ឈ្មោះ ជេត ដួងតារាវុធ បានចូលរួមធ្វើបាតុកម្មទាមទារឲ្យមានការធ្វើកំណែទម្រង់ប្រព័ន្ធតុលាការប៉ុន្តែមានជនមិនស្គាល់មុខចោលគ្រាប់បែកចូលក្នុងហ្វូងបាតុករបណ្តាលឲ្យស្លាប់។
អ្នកស្រីថា ២២ឆ្នាំកន្លងផុតទៅតែសម្រាប់គាត់ ដូចជានៅថ្មីៗហាក់មើលឃើញកូននិងអ្នកផ្សេងទៀតកំពុងដេកស្លាប់ និង ខ្លះបែកសាកសព។លោកស្រីអំពាវនាវឲ្យរដ្ឋាភិបាលទប់ស្កាត់កុំឲ្យមានព្រឹត្តិការណ៍របៀបនេះកើតឡើងទៀត។
អ្នកស្រី លី នារី៖«យើងខ្ញុំសុំអំពាវនាវដល់រដ្ឋាភិបាលមេត្តាទប់ស្កាត់អំពើហិង្សាទាំងឡាយដូចជា គប់គ្រាប់បែក បាញ់សម្លាប់ ចាប់ចងព្រោះថា ជីវិតមនុស្សមិនថា អ្នកមានអ្នកក្រ អ្នកតូចអ្នកធំ មានតែមួយហើយមានតម្លៃដូចៗគ្នា។»
ព្រឹត្តិការណ៍កប់គ្រាប់បែកចូលកន្លែងបាតុករប្រមូលផ្តុំនៅមុខរដ្ឋសភាកាលពីថ្ងៃទី៣០ខែមីនាឆ្នាំ១៩៩៧ បានបណ្តាលឲ្យមានអ្នកស្លាប់១៦នាក់ និង របួសជាង២០០នាក់។
សមត្ថកិច្ចមិនទាន់ចាប់ខ្លួនអ្នកណាម្នាក់ឲ្យទទួលខុសត្រូវចំពោះករណីនេះនៅឡើយ ដោយរដ្ឋាភិបាលអំពាវនាវឲ្យអ្នកមានភស្តុតាងប្រគល់ឲ្យតុលាការ។ ទោះយ៉ាងណារបាយការណ៍របស់ទីភ្នាក់ងារស៊ើបអង្កេតអាមេរិក(FBI)បង្ហាញថា លោក ហ៊ីង ប៊ុនហៀង និង លោក ហ៊ុយ ពិសិដ្ឋជាប្រធាន និងអនុប្រធានកងអង្គរក្សលោកនាយករដ្ឋមន្ត្រីហ៊ុន សែន ពាក់ព័ន្ធរៀបចំព្រឹត្តិការណ៍នេះ។