មន្ត្រីនាំពាក្យក្រសួងដែនដី នគរូបនីយកម្ម និងសំណង់ បានអះអាងថា រដ្ឋមន្ត្រីដែនដី លោក ជា សុផារ៉ា បានដឹកនាំមន្ត្រីរាប់ពាន់នាក់ចុះទៅពិនិត្យមើលបរិស្ថានក្នុងខេត្តព្រះសីហនុ បន្ទាប់ពីខេត្តជាប់ឆ្នេរសមុទ្រមួយនេះ រងការរិះគន់ចំពោះការគ្រប់គ្រងកាកសំណល់ និងការបង្ហូរទឹកកខ្វក់ចូលសមុទ្រ។
អ្នកនាំពាក្យក្រសួងដែនដី លោក សេង ឡូត បានប្រាប់ វីអូឌី នៅថ្ងៃនេះថា លោក ជា សុផារ៉ា និងមន្ត្រីប្រហែល ៣ពាន់នាក់ ចុះពិនិត្យតាមទីតាំងអភិវឌ្ឍន៍មួយចំនួន ដូចជានៅតំបន់ឆ្នេរ សំណង់អគារនានា ប្រព័ន្ធលូ ប្រព័ន្ធច្រោះទឹកកង្វក់ ជាដើម ចន្លោះពីថ្ងៃទី២៩ ដល់ថ្ងៃទី៣១ ខែមីនានេះ។
លោក សេង ឡូត ប្រាប់ថា៖ «តាមរយៈទស្សនកិច្ចសិក្សានេះ បានឃើញច្បាស់ថា ស្ថានភាពទឹកសមុទ្រ គឺមានស្ថានភាពដូចដើមវិញ។ អញ្ចឹង ឆ្នេរសមុទ្ររបស់កម្ពុជាយើង គឺជាឆ្នេរស្អាតដូចដែលគេឲ្យនាមថា ជាឆ្នេរស្អាតជាងគេនៅលើពិភពលោក»។
អ្នកនាំពាក្យរូបនេះ បន្ថែមថា បរិស្ថានក្នុងខេត្តព្រះសីហនុបានល្អប្រសើរនេះ គឺដោយសាររដ្ឋាភិបាលបានរៀបអភិវឌ្ឍប្រព័ន្ធស្ថានីយប្រព្រឹត្តកម្មទឹកកខ្វក់ចំនួន៤ ដែលមានដីទំហំ ១៦ហិកតា និងប្រព័ន្ធប្រឡាយនានា រួមទាំងប្រពន្ធលូជាច្រើនកន្លែងទៀត ហើយថា ម្ចាស់សណ្ឋាគារ ផ្ទះសំណាក់ និងម្ចាស់សំណង់មួយចំនួន ក៏បានអនុវត្តដាក់ប្រពន្ធច្រោះទឹកកខ្វក់មុនបង្ហូរចេញក្រៅផងដែរ។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មើលឃើញថា អាជ្ញាធរហាក់មិនបានយកចិត្តទុកដាក់ ឬត្រៀមទុកមុនឡើយ ចំពោះគម្រោងអភិវឌ្ឍន៍នានាក្នុងខេត្តព្រះសីហនុ ជាពិសេសវិធានការក្នុងការទប់ស្កាត់បញ្ហាផលប៉ះពាល់បរិស្ថាន។
លោក សន ជ័យ បន្ថែមថា៖ «អញ្ចឹងទៅ យើងត្រូវត្រៀម ឬមានវិធានការទុកជាមុន ដើម្បីដោះស្រាយបញ្ហានេះ ហើយខ្ញុំយល់ថា រដ្ឋាភិបាលចាំបាច់ត្រូវមានវិធានការម៉ឺងម៉ាត់ចំពោះក្រុមហ៊ុន ឬក៏អ្នកវិនិយោគទុននៅខេត្តព្រះសីហនុហ្នឹង ដែលជាដើមចមដែលបង្កឲ្យមានបញ្ហាបរិស្ថានធ្ងន់ធ្ងរនៅក្នុងខេត្តទេសចរណ៍មួយនេះ»។
កាលចុងឆ្នាំ២០១៨ ក្រុមសកម្មជនមាតាធម្មជាតិ បានបង្ហោះវីដេអូមួយបង្ហាញអំពីផលប៉ះពាល់បរិស្ថាន និងសុខភាពប្រជាពលរដ្ឋដែលបង្កឡើងដោយសារការបង្ហូរបំពង់ទុយោទឹកស្អុយចំនួន ២៩កន្លែង ចូលឆ្នេរអូរឈើទាល។
នៅក្នុងវីដេអូនោះ ក្រុមសកម្មជនមាតាធម្មជាតិ បានបង្ហាញលទ្ធផលដែលចេញដោយវិទ្យាស្ថានប៉ាស្ទ័រកម្ពុជា ថា ទឹកនោះមានផ្ទុកទៅដោយសារធាតុគ្រោះថ្នាក់ជាច្រើនដល់សុខភាពមនុស្ស។
អំឡុងពិធីបុណ្យសមុទ្រកាលពីចុងឆ្នាំមុន លោកនាយករដ្ឋមន្ត្រី ហ៊ុន សែន បានបញ្ជាផ្ទាល់មាត់ឲ្យអាជ្ញាធរខេត្តព្រះសីហនុ និងរដ្ឋមន្ត្រីពាក់ព័ន្ធទាំងអស់ ត្រូវស្ដារមុខមាត់ខេត្តនេះឡើងវិញ បន្ទាប់ពីខេត្តរងការរិះគន់អំពីបញ្ហាអសន្តិសុខបង្កឡើងដោយក្រុមជនជាតិចិន និងបញ្ហាការបំពុលបរិស្ថានដែលកើតចេញពីការអភិវឌ្ឍយ៉ាងគំហុកខាងផ្នែកសំណង់នៅក្នុងខេត្តមួយនេះ៕