លោកនាយករដ្ឋមន្ដ្រី ហ៊ុន សែន ប្រកាសបើកផ្លូវឲ្យអតីតឧបនាយករដ្ឋមន្ត្រីមួយរូបដែលកំពុងរស់នៅនិរទេសខ្លួនឯងនៅក្រៅប្រទេស ឲ្យត្រឡប់មកប្រទេសកម្ពុជាវិញ ក្រោយតុលាការចោទប្រកាន់ពីបទជេរប្រមាថព្រះមហាក្សត្រ។
ថ្លែងក្នុងពិធីចែកសញ្ញាបត្រនៅរាជធានីភ្នំពេញនៅព្រឹកថ្ងៃនេះ លោក ហ៊ុន សែន បានប្រាប់ឲ្យអតីតមន្ត្រីជាន់ខ្ពស់គណបក្សហ៊្វុនស៊ិនប៉ិច លោក លឺ ឡាយស្រេង ត្រឡប់មកប្រទេសកម្ពុជាវិញ។
លោក ហ៊ុន សែន ថ្លែងបញ្ជាក់ថា លោកមិនប្រកាន់ទោសពៃរ៍លើលោក លឺ ឡាយស្រេង នោះទេ បើទោះបីជាតុលាការចោទប្រកាន់រូបលោកពីបទ «ប្រមាថព្រះមហាក្សត្រ» និងបណ្ដឹងបរិហារកេរ្ដិ៍នាយករដ្ឋមន្ដ្រីក៏ដោយ។
លោក ហ៊ុន សែន ប្រកាសបើកផ្លូវបែបនេះ ដោយលោកថា បន្ទាប់ពីឃើញអតីតមន្ត្រីជាន់ខ្ពស់គណបក្សហ៊្វុនស៊ិនប៉ិចរូបនេះបានថ្លែងសុំទោសលោកជាសាធារណៈ និងអង្វរករសុំត្រឡប់មកប្រទេសកម្ពុជាវិញ ដើម្បីជួបជុំគ្រួសារ។
ម្យ៉ាងទៀត លោក ហ៊ុន សែន ក៏បង្គាប់ឲ្យក្រសួងយុត្តិធម៌ពិនិត្យមើលពីលទ្ធភាព និងលក្ខខណ្ឌនានា ដើម្បីសម្របសម្រួលឲ្យលោក លឺ ឡាយស្រេង បានត្រឡប់មកកម្ពុជាវិញ។
កាលពីខែមករា ឆ្នាំ២០១៨ សាលាដំបូងរាជធានីភ្នំពេញបានសម្រេចផ្ដន្ទាទោស លោក ឡឺ ឡាយស្រេង ដោយតម្រូវឲ្យសងជំងឺចិត្តទៅដើមបណ្ដឹងចំនួន ៥០០លានរៀល ឬស្មើនឹង ១២ម៉ឺនដុល្លារ បន្ទាប់ពីសំឡេងសន្ទនាឯកជនរបស់លោកជាមួយអ្នកស្រី គី លំអង ត្រូវបានទម្លាយនៅលើបណ្ដាញទំនាក់ទំនងសង្គមហ្វេសប៊ុក ជុំវិញការជជែកអំពីវិសោធនកម្មច្បាប់គណបក្សនយោបាយ ដែលស្នើឡើងដោយគណបក្សប្រជាជនកម្ពុជា។
សំឡេងសន្ទនាតាមទូរស័ព្ទឯកជននោះ ត្រូវបានសម្ដេចក្រុមព្រះ នរោត្ដម រណឫទ្ធិ ចាត់ទុកជាការប្រមាថទៅលើព្រះមហាក្សត្រផងដែរ៕