សាលារាជធានីភ្នំពេញអះអាងថា នឹងធ្វើវេទិកាសាធារណៈមួយ នាដើមសប្តាហ៍ក្រោយនេះ ដើម្បីស្វែងរកកិច្ចសហការភាពជាដៃគូអភិវឌ្ឍន៍ជាមួយអង្គការសង្គមស៊ីវិលឡើងវិញ ក្រោយពីអង្គការសមាគមជាង៣០០ រងការចោទថា ជាក្រុមបដិវត្តពណ៌ប្រឆាំងរដ្ឋាភិបាល ។
លិខិតជូនដំណឹងចុះថ្ងៃទី១ ខែមេសា សាលារាជធានីភ្នំពេញ ឲ្យដឹងថា នៅថ្ងៃទី៩ ខែមេសា សប្តាហ៍ក្រោយនេះ ខ្លួននឹងរៀបចំវេទិកាពិគ្រោះយោបល់ជាមួយអង្គការសង្គមស៊ីវិល នៅមជ្ឈមណ្ឌលកោះពេជ្រ រាជធានីភ្នំពេញ។
សាលារាជធានីបញ្ជាក់ថា៖ «ដើម្បីឲ្យអង្គវេទិកាដំណើរការបានជោគជ័យ និងផ្លែផ្កាគ្រប់ជ្រុងជ្រោយ ព្រមទាំងបានជាប្រយោជន៍សម្រាប់កសាងយុទ្ធសាស្ត្រ ក្នុងការលើកម្ពស់កិច្ចសហការក្នុងការលើកកម្ពស់កិច្ចសហប្រតិបត្តិការ និងភាពជាដៃគូរវាងរដ្ឋបាលសាលារាជធានីភ្នំពេញជាមួយអង្គការសង្គមស៊ីវិល រួមគ្នាធ្វើសកម្មភាពចូលរួមអភិវឌ្ឍប្រទេសគ្រប់វិស័យ»។
អ្នកមានជម្លោះដីធ្លីម្នាក់នៅសហគមន៍បឹងកក់ អ្នកស្រី ផាន់ ឈុនរ៉េត អះអាថា គិតត្រឹមថ្ងៃពុធនេះ គាត់មិនទាន់ទទួលបានព័ត៌មានឲ្យទៅចូលរួមក្នុងវេទិកានោះនៅឡើយទេ។
ប៉ុន្តែ គាត់ថា បើបានទៅចួលរូមគាត់នឹងលើកបញ្ហាប្រឈមរបស់សហគមន៍ដែលមានជម្លោះបានអូសបន្លាយជាង១០ឆ្នាំមកនេះ មិនទាន់ត្រូវបានដោះស្រាយចប់ និងសំណូមពរឲ្យអាជ្ញាធរឈប់បណ្តេញសហគមន៍ក្រីក្រចេញពីតំបន់អភិវឌ្ឍន៍ដូចបច្ចុប្បន្ន។
លោកស្រីថា៖ «ថ្ងៃហ្នឹង បើគេឲ្យចូល ខ្ញុំនឹងនិយាយពីការចង់បានសំណងសមរម្យ ព្រោះអីសាលារាជធានីភ្នំពេញនេះ ព្រោះអីសាលារាជធានី! គាត់កាត់ដីពីអ្នកក្រយកទៅឲ្យអ្នកមាន ហើយដែលនៅសល់ហ្នឹង គាត់មិនដឹងឲ្យអ្នកណាឲ្យច្បាស់លាស់ទេ មានអ្នកថ្មីៗមកនៅច្រើនណាស់ខ្ញុំ ចង់និយាយរឿងហ្នឹង»។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត ស្វាគមន៍ពីដំណឹងប្រកាសបើកវេទិកានេះ ដោយចាត់ទុក ថាជាសញ្ញាវិជ្ជមានមួយឈានទៅស្តារទំនាក់ទំនងជាមួយសង្គមស៊ីវិលឡើងវិញ បើរដ្ឋាភិបាលពិតជាងាកមកគិតថា ក្រុមអង្គការសង្គមស៊ីវិលដៃគូសំខាន់សម្រាប់ជំរុញដល់ការអភិវឌ្ឍ។
លោកថា៖ «ធ្វើវេទិកាសាធារណៈ វាជារឿងល្អហើយ ប៉ុន្តែ អ្វីដែលសំខាន់បំផុត គឺការអនុវត្ត គឺឆន្ទៈពិតប្រាកដក្នុងភាពជាដៃគូរវាងអាជ្ញាធររដ្ឋាភិបាល និងអង្គការសង្គមស៊ីវិល ដោយឈប់លាភពណ៌គ្នាបន្តទៅទៀត ឈប់ចាត់ទុកគ្នាជាសត្រូវ ហើយត្រូវចាត់ទុកគ្នាជាដៃគូក្នុងការអភិវឌ្ឍ»។
កាលពីថ្ងៃទី៣១ ខែតុលា ឆ្នាំ២០១៨ លោក ស ខេង បានចេញលិខិតណែនាំមួយ តម្រូវឲ្យរដ្ឋបាលរាជធានី-ខេត្ត ឲ្យរៀបចំវេទិកាពិគ្រោះយោបល់ជាមួយសមាគម អង្គការមិនមែនរដ្ឋាភិបាល និងសហគមន៍នានានៅមូលដ្ឋាន ឲ្យបានទៀងទាត់រាល់ឆមាស ដើម្បីបន្តពង្រឹងកិច្ចសហប្រតិបត្តិការជាដៃគូជា ។
លុះដល់ថ្ងៃទី១៤ ខែមីនា ឆ្នាំ២០១៩ ក្រសួងមហាផ្ទៃបានចេញលិខិតណែនាំមួយទៀត បញ្ជាឲ្យរដ្ឋបាលរាជធានី-ខេត្ត ធ្វើកិច្ចការនេះឲ្យមានប្រសិទ្ធិភាព ។
ប៉ុន្តែ កាលពីខែកុម្ភៈ ឆ្នាំ២០១៨ រដ្ឋាភិបាលបានចេញផ្សាយសៀវភៅ«ស» ដែលអះអាងថា កម្ពុជាកំពុងកើតមាននូវបដិវត្ដពណ៌មួយ ដែលរៀបចំឡើងដោយអតីតគណបក្សប្រឆាំង ដើម្បីផ្ដួលរំលំរដ្ឋាភិបាលស្របច្បាប់។ ក្នុងសៀវភៅនោះ រដ្ឋាភិបាលក៏បានចោទប្រកាន់អង្គការជាង ៣០០ ថា បានចូលរួមក្នុងបដិវត្តនេះ។
ចាប់ពីពេលនោះមក សហគមន៍អន្តរជាតិនៃប្រទេសលោកសេរី ដែលនាំមុខគេដោយសហរដ្ឋអាមេរិក និងសហភាពអឺរ៉ុប ហៅការចោទប្រកាន់នោះថា បានធ្វើឲ្យលំហប្រជាធិបតេយ្យរួមតូច និងជំរុញរដ្ឋាភិបាលឲ្យស្តារស្ថានការណ៍ឡើងវិញ ។
