មន្ត្រីជាន់ខ្ពស់ក្រសួងយុត្តិធម៌ បានឲ្យដឹងថា អ្នកទោសដល់ទៅជាង ៤០០នាក់ ត្រូវបានស្នើសម្រាប់ការលើកលែងទោស អំឡុងពិធីបុណ្យចូលឆ្នាំខ្មែរខាងមុខនេះ។
អ្នកនាំពាក្យក្រសួងយុត្តិធម៌ លោក គឹម សន្តិភាព បានប្រាប់ វី.អូ.ឌី នៅថ្ងៃនេះថា ក្រសួងគ្រោងនឹងប្រជុំ និងពិនិត្យមើលសំណើលើកលែង និងបន្ធូរបន្ថយទោសទណ្ឌិតចំនួន ៤៦០នាក់ ក្នុងនោះមានស្ត្រី ៤៩នាក់ សម្រាប់ពិធីបុណ្យចូលឆ្នាំថ្មីប្រពៃណីជាតិខាងមុខនេះ។
អ្នកនាំពាក្យរូបនេះ បានឲ្យដឹងទៀតថា សំណើលើកលែងទោស ឬបន្ធូរបន្ថយទោសទណ្ឌិតនេះ ត្រូវបានបញ្ជូនមកពីតាមបណ្ដាខេត្តក្រុងនានានៅទូទាំងប្រទេស។ ប៉ុន្តែ លោកថា គណៈកម្មការថ្នាក់ជាតិដែលពិនិត្យលើសំណើនេះ នៅមិនទាន់បានសម្រេចយ៉ាងណានៅឡើយទេ។
លោក គឹម សន្តិភាព មានប្រសាសន៍ថា៖ «គណៈកម្មការជាតិបានទទួលនូវសំណើពីគណៈកម្មការរាជធានី-ខេត្ត លើការស្នើសុំអនុគ្រោះទោសសម្រាប់ទណ្ឌិតក្នុងឱកាសបុណ្យចូលឆ្នាំខ្មែរខាងមុខនេះ គឺមានចំនួន ៤៦០នាក់ ក្នុងនោះមានស្រី ៤៩នាក់។ យើងអត់ទាន់អាចនិយាយអីបានទេពេលនេះ ដោយសាររសៀលនេះ បានគណៈកម្មការជាតិចាប់ផ្ដើមកិច្ចប្រជុំរបស់ខ្លួនពិនិត្យលើសំណើនេះ»។
អ្នកទោសកម្ពុជា តែងតែទទួលបានការលើកលែងទោស ឬក៏បន្ធូរបន្ថយទោសពីព្រះមហាក្សត្រនៅរៀងរាល់ពិធីបុណ្យជាតិធំៗ ៣ដងក្នុងមួយឆ្នាំ ដូចជា ពិធីបុណ្យចូលឆ្នាំខ្មែរប្រពៃណីជាតិ ពិធីបុណ្យវិសាខបូជា និងព្រះរាជពិធីបុណ្យអុំទូក៕
