អតីតបក្សប្រឆាំងប្រកាសថ្កោលទោសការបោះឆ្នោតក្រុមប្រឹក្សារាជធានី-ខេត្ត ក្រុង-ស្រុក-ខណ្ឌអាណត្តិទី៣ និងចាត់ទុកជាការបោះឆ្នោត «ក្លែងក្លាយ» និងមិនឆ្លុះបញ្ចាំងឆន្ទៈពលរដ្ឋដូចទៅនឹងការបោះឆ្នោតថ្នាក់ជាតិកាលពីខែកក្កដាឆ្នាំមុន។
ក្នុងសេចក្ដីថ្លែងការណ៍កាលពីថ្ងៃម្សិលមិញ អតីតគណបក្សសង្គ្រោះជាតិហៅការបោះឆ្នោតក្រុមប្រឹក្សាអាណត្តិទី៣ ដែលគ្រោងធ្វើឡើងនាថ្ងៃទី២៦ខែឧសភាខាងមុខថា គឺជាការបោះឆ្នោតបង្គ្រប់កិច្ច និងមិនឆ្លុះបញ្ចាំងឆន្ទៈពលរដ្ឋ។
គណបក្សសង្គ្រោះជាតិបានលើកឡើងថា សមាជិកក្រុមប្រឹក្សាឃុំ-សង្កាត់ក្នុងតំណែងចំនួន ៥០០៧ ក្នុងចំណោមតំណែងជាង១ម៉ឺននាក់ (១១៥៧២នាក់) គឺមិនបានកើតចេញពីការបោះឆ្នោតក្រុមប្រឹក្សាឃុំ-សង្កាត់ពិតប្រាកដ ដែលបានបញ្ចប់ទៅដោយភាពចម្រូងចម្រាស់កាលពីឆ្នាំ២០១៧នោះ។
ក្នុងសេចក្ដីថ្លែងការណ៍ដដែល អតីតគណបក្សសង្គ្រោះជាតិក៏អំពាវនាវទៅអង្គការជាតិ និងអន្ដរជាតិ និងបណ្ដាប្រទេសកាន់លទ្ធិប្រជាធិបតេយ្យ កុំឲ្យចូលរួមសង្កេតការបោះឆ្នោតមួយនេះ។
អតីតគណបក្សសង្គ្រោះជាតិ ដែលកាន់កាប់អាសនៈសភាចំនួន៥៥ នៅក្នុងការបោះឆ្នោតកាលពីឆ្នាំ២០១៣ និងទទួលបានអាសនៈក្រុមប្រឹក្សាឃុំសង្កាត់ចំនួន ៥០០៧ នៅក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់កាលពីឆ្នាំ២០១៧កន្លងមក ត្រូវបានតុលាការកំពូលរំលាយចោលតាមបណ្ដឹងរបស់រដ្ឋាភិបាល ហើយអាសនៈទាំងអស់របស់អតីតបក្សប្រឆាំង ក៏ត្រូវបានដកហូត និងបែងចែកទៅឲ្យគណបក្សផ្សេង ដែលមិនបានឈ្នះឆ្នោត។
អតីតគណបក្សប្រឆាំងដ៏ធំមួយនេះ ក៏មិនត្រូវបានអនុញ្ញាតឲ្យចូលរួមក្នុងការបោះឆ្នោតថ្នាក់ជាតិកាលពីចុងខែកក្កដាកន្លងទៅនោះទេ ដែលការបោះឆ្នោតនោះបានផ្ដល់ជ័យជម្នះទាំងស្រុងទៅគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន។
សហគមន៍អន្តរជាតិនាំមុខដោយសហរដ្ឋអាមេរិក និងសហគមន៍អឺរ៉ុប បានថ្កោលទោសការបោះឆ្នោតនោះ និងមិនទទួលស្គាល់លទ្ធផលនៃការបោះឆ្នោតទៀតផង ហើយពួកគេបានចាត់វិធានការមួយចំនួនមកលើកម្ពុជាផងដែរ៕
