សមាជិកឧត្តមក្រុមប្រឹក្សាពិគ្រោះ និងផ្តល់យោបល់ អះអាងថា ការដែលសមត្ថកិច្ចចាប់ឃុំខ្លួន សមាជិករបស់ខ្លួនម្នាក់ ជាប់ចោទថា ធ្វើសកម្មភាពរំដោះអ្នកមានជម្លោះដីធ្លីចេញពីពន្ធនាគារនៅខេត្តព្រះវិហារនោះ មិនប៉ះពាល់មុខមាត់ស្ថាប័នទេ។
ប្រធានគណបក្សសាធារណរដ្ឋប្រជាធិបតេយ្យ និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ លោកស្រី សុខ រត័្នសុវណ្ណបញ្ចៈសីលា ត្រូវសមត្ថកិច្ចចាប់ខ្លួន កាលពីថ្ងៃទី៩ ខែមេសា នៅខេត្តព្រះវិហារ ដោយសមត្ថកិច្ចសង្ស័យថា បានដឹកនាំពលរដ្ឋមួយក្រុម ទៅរំដោះជនសង្ស័យ១៤នាក់ ជាអ្នកមានជម្លោះដីធ្លី ចេញពីពន្ធនាគារខេត្តនេះ ខណៈជនសង្ស័យទាំងនោះកំពុងរង់ចាំថ្ងៃបើកសវនាការ។
ប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ លោក សុខ សុវណ្ណ វឌ្ឍនាសាប៊ុន ឲ្យ VOD ដឹងនៅថ្ងៃសុក្រនេះ ថាការចាប់ខ្លួនសមាជិកម្នាក់នោះ មិនធ្វើឲ្យខូចមុខមាត់ស្ថាប័នទេ ដោយថា ស្ត្រីជាសមាជិករូបនេះត្រូវបានព្យួរតួនាទីតាំងពីចុងឆ្នាំ២០១៨មកម្លេះ ក្រោយពីគណបក្សរបស់លោកស្រីមានជម្លោះផ្ទៃក្នុង ធ្វើសមាជប្តូរឈ្មោះគណបក្ស និងប្តូរមេបក្ស ។
លោកថា៖ «ខ្ញុំថាមិនជាការប៉ះពាល់អីទេ ពីព្រោះសកម្មភាពផ្លូវច្បាប់ និងសកម្មភាពផ្លូវការរបស់គាត់ហ្នឹងត្រូវបានលេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់ ធ្វើការផ្អាកតាំងពីខែ១២ [ឆ្នាំ២០១៨] មកម៉្លេះ ដោយសារតែឈរលើគោលការណ៍នៃការជ្រើសតាំងរបស់គណបក្ស។ ហើយគណបក្សរបស់គាត់មានសមាជថ្មី មានប្រធានថ្មី ហើយអ្វីដែលគាត់បានធ្វើជាការទទួលខុសត្រូវចំពោះមុខច្បាប់នៅខាងក្រៅហ្នឹង ជារឿងឯកជនទេ។»
សមាជិកមួយរូបទៀត និងជាប្រធានគណបក្សយុវជនកម្ពុជា លោក ពេជ្រ ស្រស់ ឲ្យដឹងប្រហាក់ប្រហែលដែរថា លោកស្រី សុខ រត័្នសុវណ្ណបញ្ចៈសីលា ដែលសមត្ថកិច្ចចាប់ឃុំខ្លួននោះ សិទ្ធិចុះមូលដ្ឋានរបស់គាត់ត្រូវបានព្យួរ ហើយថា សកម្មភាពដែលចុះទៅរំដោះអ្នកទោសនោះ ថារំលោភតួនាទីដែលមានចែងក្នុងព្រះរាជ្យក្រឹត្យ។ លោកថា បញ្ហានេះជាកំហុសបុគ្គល ។
លោក ថា៖ «យើងមានភារកិច្ចចែងក្នុងព្រះរាជ្យក្រឹត្យ ហើយយើងមើលក្នុងព្រះរាជ្យក្រឹត្យទៅវាអត់មានសមត្ថភាពណាទៅលូកដៃឲ្យអ្នកណាខុស អ្នកណាត្រូវទេ។ យើង គ្រាន់តែចុះទៅពិនិត្យសម្មតិកម្មនៃអង្គហេតុនៃបញ្ហា ប្រមូលយកព័ត៌មានហ្នឹងមកដាក់ទៅរដ្ឋាភិបាល ឬក៏ទៅដែនសមត្ថកិច្ចឲ្យគេដោះស្រាយ»។
បើតាមលោក ពេជ្រ ស្រស់ តួនាទីរបស់ឧត្តមក្រុមប្រឹក្សា ចុះប្រមូលបញ្ហានៅថ្នាក់ក្រោមជាតិ យកបញ្ហាទាំងអស់ដែលប្រមូលបានរាយការណ៍ជូនរដ្ឋាភិបាល សុំយោបល់ពីវិធានការដោះស្រាយ មិនមែនខ្លួនជាអ្នកចុះដោះបញ្ហាទេ។
សមាគមអាដហុកការពារសិទ្ធិមនុស្សបានផ្តល់មេធាវីទៅការពារក្តីដោយឥតគិតថ្លៃ ដល់អ្នកមានជម្លោះដីធ្លី៣នាក់ ក្នុងចំណោម ១៤នាក់ ដែលតុលាការបង្គាប់ឲ្យឃុំខ្លួន។
អ្នកនាំពាក្យសមាគមនេះគឺលោក ស៊ឹង សែនករុណា ហៅសកម្មភាពរបស់សមាជិកឧត្តមក្រុមប្រឹក្សាពិគ្រោះ និងផ្តល់យោបល់ នេះថា មិនបានជួយដោះបន្ទុកអ្នកទាំង១៤នាក់ដែលកំពុងឃុំខ្លួន រង់ចាំសវនាការនេះទេ តែថា វាបានបង្កើនបន្ទុកកាន់តែខ្លាំងដល់ជនសង្ស័យ។ លោកថា ទង្វើនេះបានងាកចេញពីនីតិវិធីច្បាប់ និងជះឥទ្ធិពលមិនល្អដល់ស្ថាប័ន។
លោកថា៖ «ជាធម្មតា វាអាចប៉ះពាល់ទៅដល់បុគ្គលមុនគេហើយ។ ទី២ វាអាចប៉ះពាល់ដល់ក្រុមដែរ ព្រោះក្រុមត្រូវបានគេមើលឃើញថា ជាអំណាចដែលត្រូវចាត់តាំងដោយព្រះរាជ្យក្រឹត្យតែងតាំង អីអញ្ចឹង ហើយយើងប្រើតួនាទីខុសពីការផ្តល់ឲ្យ អញ្ចឹងវាស្មើនឹងអំណាចនៃការតែងតាំងហ្នឹង វាសាបរលាប ហើយវាធ្វើឲ្យជះឥទ្ធិពលមិនល្អដល់ក្រុមផ្សេងៗទៀត»។
ឧត្តមក្រុមប្រឹក្សាពិគ្រោះ និងផ្តល់យោបល់ត្រូវបានតែងតាំងដោយព្រះរាជក្រឹត្យ តាមសំណើរបស់នាយករដ្ឋមន្ត្រី។
ឧត្តមក្រុមប្រឹក្សានេះកើតឡើងក្រោយការបោះឆ្នោតអាណត្តិទី៦ មានគណបក្ស១៦ចូលរួម។ គណបក្សមួយ មានមនុស្សពីរនាក់មកកាន់តួនាទីនេះ គឺប្រធាន និងអនុប្រធាន ។
គណបក្សនយោបាយទាំងនោះមិនទទួលបានសំឡេងឆ្នោត រហូតមានអាសនៈក្នុងសភាទេ តែពួកគេត្រូវបាន តែងតាំងឋានៈចាប់ពីរដ្ឋមន្ត្រីដល់ទេសរដ្ឋមន្ត្រី៕
