ក្រសួងមហាផ្ទៃ ណែនាំដល់មន្ត្រីព្រំដែនឲ្យពង្រឹងការត្រួតពិនិត្យបន្ថែមទៀត ជាពិសេសទៅលើបទល្មើសគ្រឿងញៀន និងការសម្អាតប្រាក់ បន្ទាប់ពីសង្កេតឃើញមានការប៉ុនប៉ងលួចធ្វើសកម្មភាពឧក្រិដ្ឋកម្មឆ្លងដែននៅភូមិសាស្ត្រមួយចំនួនដែលមានការធ្វេសប្រហែស និងខ្វះការប្រុងប្រយ័ត្ន។
ក្នុងសេចក្ដីណែនាំចុះថ្ងៃទី២២ ខែមេសា រដ្ឋមន្ត្រីក្រសួងមហាផ្ទៃ លោក ស ខេង បានណែនាំដល់កងកម្លាំងនគរបាលជាតិឲ្យបង្កើនការទទួលខុសត្រូវ និងចាត់វិធានការឲ្យមានប្រសិទ្ធភាពទៅលើបទល្មើសឆ្លងដែនគ្រប់ប្រភេទ។
ក្នុងសេចក្ដីណែនាំនោះក៏បានឲ្យដឹងផងដែរថា ចំពោះបទល្មើសជួញដូរគ្រឿងញៀន និងការសម្អាតប្រាក់ ក្រសួងមហាផ្ទៃជំរុញឲ្យមានការស្រាវជ្រាវ និងបង្ក្រាបឲ្យបានម៉ឺងម៉ាត់ ហើយតម្រូវឲ្យរាយការណ៍សុំគោលការណ៍ពីក្រសួងដោយផ្ទាល់ផងដែរ។
ក្នុងរបាយការណ៍៩ខែនៃឆ្នាំ២០១៨ អាជ្ញាធរជាតិប្រយុទ្ធប្រឆាំងគ្រឿងញៀនបានលើកឡើងថា ការជួញដូរគ្រឿងញៀនឆ្លងកាត់ព្រំដែនប្រទេសកម្ពុជាទៅកាន់ទីផ្សារគ្រឿងញៀនក្នុងតំបន់ និងអន្តរជាតិនៅតែបន្តកើតមាន ដែលតម្រូវឲ្យមន្ត្រីកម្ពុជាពង្រឹងការសហការជាមួយមន្ត្រីប្រទេសជាប់ព្រំដែន ជាមួយនឹងការបំពាក់សម្ភារចាំបាច់ដើម្បីបំពេញតួនាទីផងដែរ។
តាមរបាយការណ៍សមត្ថកិច្ច ក្នុងរយៈពេល៣ខែ ដើមឆ្នាំ២០១៩នេះ សមត្ថកិច្ចបង្ក្រាបបទល្មើសគ្រឿងញៀនបានចំនួន ២០៣៣ករណី និងឃាត់មនុស្សចំនួន ៤៣៩៩នាក់ ក្នុងនោះស្រី ៣៧២នាក់ ជនបរទេស ១០៤នាក់៕