មន្ត្រីអង្គការសង្គមស៊ីវិលជំរុញជាថ្មីទៀតទៅអង្គភាពប្រឆាំងអំពើពុករលួយ (ACU) ឱ្យបង្ហាញលទ្ធផលនៃការស៊ើបអង្កេតលើសំណុំរឿងអតីតមេកងរាជអាវុធហត្ថខេត្តរតនគិរី និងស្នងការរងនគរបាលខេត្តកណ្តាល ឱ្យសាធារណជនបានដឹង។
កាលពីថ្ងៃទី២៨ ខែកុម្ភៈ អង្គភាពប្រឆាំងអំពើពុករលួយបានចេញសេចក្តីប្រកាសព័ត៌មានមួយថា អង្គភាពមួយនេះបានបញ្ចប់ការស៊ើបអង្កេតបំណុល និងទ្រព្យសម្បត្តិរបស់អតីតមេបញ្ជាការកងរាជអាវុធហត្ថខេត្តរតនគិរី លោក គឹម រស្មី និងភរិយា រួមទាំងកូនចំនួន ៣ នាក់ របស់លោករួចរាល់ហើយ។
ក្រោយពីបញ្ចប់ការស៊ើបអង្កេតករណីលោក គឹម រស្មី នោះ អង្គភាពប្រឆាំងអំពើពុករលួយថា អង្គភាពនេះ ក៏កំពុងដំណើរការស្រាវជ្រាវទ្រព្យសម្បត្តិ និងបំណុលស្នងការរងខេត្តកណ្តាលគឺ លោក ស្រេង សុខា ផងដែរ។
ប្រធានគណៈកម្មការកម្ពុជាឯករាជ្យប្រយុទ្ធប្រឆាំងអំពើពុករលួយ លោកស្រី ម៉ម ស៊ីថា មានប្រសាសន៍ថា ពលរដ្ឋជាច្រើនកំពុងរង់ចាំមើលលទ្ធផលនៃការស៊ើបអង្កេតរបស់អង្គភាពប្រឆាំងអំពើពុករលួយលើសំណុំរឿងអតីតមេកងរាជអាវុធហត្ថខេត្តរតនគិរី និងស្នងការរងនគរបាលខេត្តកណ្តាល។
លោកស្រីថា៖ «តាំងពីកើតរឿងរហូតមកដល់ពេលនេះ ដំណើរការស៊ើបអង្កេត វាអត់មានបង្ហាញតួលេខណាមួយ ដើម្បីឱ្យមហាជនបានអស់ចម្ងល់នៅឡើយ។ អ៊ីចឹង អាភាពយឺតយ៉ាវ ការមិនបានបង្ហាញជាសាធារណៈ ដោយសារ មន្ត្រីមិនមានសមត្ថភាពក្នុងការស៊ើបអង្កេត ឬមានចេតនាក្នុងការបិទបាំង [មិនបង្ហាញ]។»
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា ប្រសិនអង្គភាពប្រឆាំងអំពើពុករលួយបញ្ចប់ការស៊ើបអង្កេតរួចរាល់ហើយ ប៉ុន្តែ មិនបានបង្ហាញពីលទ្ធផលណាមួយឱ្យសាធារណជនបានដឹងទេនោះ លោកថា សាធារណជននឹងមានមន្ទិលសង្ស័យ ហើយវាយតម្លៃលើស្ថានភាពនេះ ក្នុងន័យអវិជ្ជមានទៀតផងដែរ។
លោកថា៖ «សាធារណជន គេដឹងព័ត៌មានហើយ មិនមែនគេអត់ចាំមើល អត់ចាំតាមដានទេ ទាំងអស់គ្នា រងចាំមើល ចំណាត់ការហ្នឹង គេធ្វើដោយរបៀបម៉េច ឬគ្រាន់តែជាការធ្វើឡើង ក្នុងរយៈពេលមួយខ្យល់ មួយគ្រា ហើយចេះតែអូសបន្លាយពេលវេលា លុបបាត់រឿងរ៉ាវអស់ហ្នឹង។ អាហ្នឹងជារឿងមួយដែលគេអាចមានការសង្ស័យលើចំណាត់ការហ្នឹង គេអាចនឹងមានការចោទប្រកាន់ទៅលើចំណាត់ការហ្នឹង ថាអាចនឹងមានពាក់ព័ន្ធផលប្រយោជន៍អ៊ីចឹង។ អ៊ីចឹង ដើម្បីចៀសវាងការចោទប្រកាន់ហ្នឹង ACU ត្រូវធ្វើកិច្ចការទាំងអស់ហ្នឹង ឱ្យមានតម្លាភាព។»
អនុប្រធានអង្គភាពប្រឆាំងអំពើពុករលួយ លោក ឃាង សេង សុំមិនធ្វើអត្ថាធិប្បាយចំពោះរឿងនេះ ដោយលោកឱ្យសួរសំណួរទៅប្រធានអង្គភាពប្រឆាំងអំពើពុករលួយ លោក ឱម យិនទៀង។
លោកថា៖ «ក្នុងរឿងនេះ ខ្ញុំមិនបានទទួលកិច្ចការនេះ ទាក់ទងឯកឧត្តមទេសរដ្ឋមន្ត្រីផ្ទាល់ ព្រោះគាត់ជាអ្នកចាត់ក្រុមការងារមួយដើម្បីធ្វើការស៊ើបអង្កេត។»
ករណីនេះ ប្រធានអង្គភាពប្រឆាំងអំពើពុករលួយ លោក ឱម យិនទៀង សុំមិនអត្ថាធិប្បាយដោយលោកទាមទារឲ្យអ្នកសារព័ត៌មានដាក់លិខិតទៅ។
លោកថា៖ «សូមសរសេរលិខិតមក ខ្ញុំឆ្លើយតាមលិខិតជូនទៅវិញ!»។
កាលពីថ្ងៃទី៩ ខែកុម្ភៈ ព្រះមហាក្សត្រចេញព្រះរាជក្រឹត្យលុបឈ្មោះអតីតមេបញ្ជាការកងរាជអាវុធហត្ថខេត្តរតនគិរី ឧត្តមសេនីយត្រី (ផ្កាយ១) លោក គឹម រស្មី ចេញពីក្របខណ្ឌកងយោធពលខេមរភូមិន្ទ បន្ទាប់ពីមានការស្នើសុំរបស់លោកនាយករដ្ឋមន្ត្រី ហ៊ុន សែន។
ការស្នើសុំលុបលោក គឹម រស្មី ចេញពីក្របខណ្ឌរដ្ឋនេះ ធ្វើឡើងក្រោយពីមានវីដេអូបង្ហោះលើបណ្តាញសង្គម ថា លោក គឹម រស្មី បានចែកលុយ ១០ម៉ឺនដុល្លារ ឱ្យកូន ៥នាក់ និងទ្រព្យសម្បត្តិជាច្រើនទៀត ក្នុងពិធីខួបកំណើតរបស់ខ្លួន។
ដោយឡែក ការប្រកាសរបស់អង្គភាពប្រឆាំងអំពើពុករលួយ ករណីស្នងការរងខេត្តកណ្តាល គឺ លោក ស្រេង សុខា វិញ ធ្វើឡើងក្រោយពីមានការចែករំលែកតាមបណ្ដាញសង្គមហ្វេសប៊ុក បន្ទាប់ពីស្នងការរងរូបនេះ បានភ្ជាប់ពាក្យជាមួយស្ត្រីម្នាក់ និងបានជូនថ្លៃបណ្ណាការចំនួន ១០ម៉ឺនដុល្លារ ចិញ្ចៀនពេជ្រ និងរថយន្ដលុច្សស៊ីស ៥៧០មួយគ្រឿងដែលមានតម្លៃ ២២ម៉ឺនដុល្លារ។
ក្នុងសារជូនពរឆ្នាំថ្មី លោកនាយករដ្ឋមន្ត្រី ហ៊ុន សែន បានប្តេជ្ញាចិត្តថា រដ្ឋាភិបាលនឹងបន្តវះកាត់លើយន្តការធ្វើកំណែទម្រង់ដ៏ស៊ីជម្រៅ ក្នុងនោះមានទាំងការប្រយុទ្ធប្រឆាំងអំពើពុករលួយ។