រដ្ឋមន្ត្រីការពារជាតិចក្រភពអង់គ្លេស លោក Gavin Williamson ត្រូវបានរដ្ឋាភិបាលនាយករដ្ឋមន្ត្រី អ្នកស្រី ថេរ៉េសា ម៉េយ៍ សម្រេចបណ្ដេញចេញពីតំណែងហើយនៅថ្ងៃនេះ ក្រោយពីមានការស៊ើបអង្កេតទៅលើព័ត៌មានលេចធ្លាយមួយ ដែលឲ្យដឹងថា អង់គ្លេសបានអនុញ្ញាតឲ្យក្រុមហ៊ុនចិន Huawei ធ្វើការអភិវឌ្ឍបណ្ដាញ 5G។ នេះបើតាមការចុះផ្សាយនៃសារព័ត៌មាន BBC របស់អង់គ្លេស។
សារព័ត៌មាន BBC បានដកស្រង់សម្ដីអ្នកនាំពាក្យខុទ្ទកាល័យនាយករដ្ឋមន្ត្រី ដែលបានថ្លែងថា អ្នកស្រី ម៉េយ៍ បានស្នើទៅលោក Gavin Williamson ឲ្យចាកចេញពីរដ្ឋាភិបាល ដោយអ្នកស្រីបានបាត់បង់ជំនឿចិត្តលើសមត្ថភាពរបស់លោក Williamson នៅក្នុងតំណែងរដ្ឋមន្ត្រីការពារជាតិ និងជាសមាជិកគណៈរដ្ឋមន្ត្រី។
បើតាម BBC អ្នកស្រី ម៉េយ៍ បានរៀបរាប់ក្នុងលិខិតមួយច្បាប់ផ្ញើទៅលោក Williamson ថា ការស៊ើបអង្កេតបានបង្ហាញនូវភស្តុតាងបញ្ជាក់ថា លោក Williamson ទទួលខុសត្រូវលើការទម្លាយដោយគ្មានការអនុញ្ញាតនូវព័ត៌មាននៃកិច្ចក្រុមប្រឹក្សាសន្តិសុខជាតិ កាលពីថ្ងៃទី២៣ ខែមេសាកន្លងមក។
BBC បានចុះផ្សាយបន្តថា លោក Williamson បានផ្ញើលិខិតតបទៅអ្នកស្រី ម៉េយ៍ ដោយនិយាយថា លោកសោកស្ដាយដែលអ្នកស្រីយល់បែបនេះ ប៉ុន្តែ លោកបដិសេធថា លោកមិនពាក់ព័ន្ធនៅក្នុងការបែកធ្លាយព័ត៌មាននេះឡើយ ហើយលោកទាមទារឲ្យមានការស៊ើបអង្កេតដោយហ្មត់ចត់។
រដ្ឋាភិបាលអ្នកស្រី ម៉េយ៍ ក៏បានប្រកាសពេលក្រោយបន្តិចមកថា រដ្ឋមន្ត្រីស្ត្រី និងសមភាព អ្នកស្រី Penny Mordaunt នឹងឡើងកាន់តំណែងជំនួសលោក Williamson ហើយក្លាយជាស្ត្រីទី១ដែលកាន់តំណែងរដ្ឋមន្ត្រីការពារជាតិ៕
