ក្រុមប៉ូលិសបង្ក្រាបបាតុកម្ម បានបាញ់ឧស្ម័នបង្ហូរទឹកភ្នែក ខណៈដែលពួកគេព្យាយាមបំបែកក្រុមបាតុករប្រកាន់ជំហរតឹងរ៉ឹង ដែលស្ថិតក្នុងចំណោមបាតុករខ្ទង់ម៉ឺននាក់ ដែលបានចេញតវ៉ាពេញទីក្រុងប៉ារីសកាលពីថ្ងៃម្សិលមិញនេះ ចំថ្ងៃប្រារព្ធទិវាពលកម្មអន្តរជាតិ។ នេះបើតាមការចុះផ្សាយរបស់ទីភា្នក់ងារព័ត៌មាន AFP។
ទីភ្នាក់ងារព័ត៌មានបារាំងមួយនេះ បានចុះផ្សាយបន្តថា ការបង្ក្រាប និងការតវ៉ាកាន់តែតានតឹងឡើង ខណៈដែលក្រុមបាតុករអាវកាក់ពណ៌លឿង និងក្រុមសហជីព បានប្រមូលផ្ដុំគ្នានៅរដ្ឋធានីប៉ារីស ដែលធ្វើឲ្យសន្តិសុខក្នុងទីក្រុងមួយនេះស្ថិតក្នុងស្ថានភាពអាសន្ន។
AFP បានចុះផ្សាយបន្តថា ប៉ូលិស និងកម្លាំងបង្ក្រាបបាតុកម្មជាង ៧៤០០នាក់ ត្រូវបានដាក់ពង្រាយកម្លាំងនៅតាមផ្លូវទៅតាមបញ្ជាពីប្រធានាធិបតីបារាំង លោក អ៊ីម៉ានុយអ៊ែល ម៉ាក្រុង ឲ្យប្រកាន់ជំហររឹងមាំ ប្រសិនបើប្រឈមមុខនឹងអំពើហិង្សា។
បើតាម AFP ប្រជាជនបារាំងប្រហែល ៤ម៉ឺននាក់ បានចេញតវ៉ាកាលពីថ្ងៃម្សិលមិញនេះ ប៉ុន្តែ ក្រុមសហជីពអះអាងថា មានអ្នកចូលរួមដល់ទៅ ៨ម៉ឺននាក់ ខណៈរដ្ឋាភិបាលអះអាងថា មានអ្នកចូលរួមជិត ៣ម៉ឺននាក់ប៉ុណ្ណោះ។
AFP ចុះផ្សាយថា ទាំងក្រុមបាតុករ និងប៉ូលិស សុទ្ធតែរងរបួសក្នុងការប៉ះទង្គិចគ្នានេះ ដោយមនុស្សមួយចំនួនត្រូវបាននាំទៅព្យាបាលរបួសនៅតាមមន្ទីរពេទ្យនានា៕