ព្រះមហាក្សត្រថៃ មហា វជ្ជរ៉ាឡុងកន បានសម្រេចរៀបអភិសេកផ្លូវការជាមួយជាយារបស់ទ្រង់ អ្នកម្នាង សុធិតា កាលពីថ្ងៃម្សិលមិញនេះ ពោលតែ ៣ថ្ងៃប៉ុណ្ណោះមុនពិធីគ្រងរាជ្យសម្បត្តិរបស់ទ្រង់នៅក្នុងសប្ដាហ៍នេះ។ នេះបើយោងតាមការចុះផ្សាយរបស់សារព័ត៌មាន បាងកក ប៉ុស្តិ៍។
សារព័ត៌មាននេះបានដកស្រង់ព្រះរាជប្រកាសរាជវាំងថៃ ដែលបានប្រកាសថា អ្នកម្នាង សុធិតា បានក្លាយជាអគ្គមហេសីរបស់ព្រះមហាក្សត្រ មហា វជ្ជរ៉ាឡុងកន និងមានព្រះនាមថ្មីថា សុធិតា វជ្ជរ៉ាឡុងកន នៈ អយុធ្យា។
បាងកក ប៉ុស្តិ៍ បានចុះផ្សាយបន្តថា ព្រះរាជពិធីអភិសេកព្រះមហាក្សត្រថៃ ត្រូវបានផ្សព្វផ្សាយនៅតាមទូរទស្សន៍គ្រប់ប៉ុស្តិ៍ទាំងអស់។
ស្ថិតក្នុងព្រះជន្ម ៤០ឆ្នាំ អគ្គមហេសី សុធិតា គឺជាអតីតនារីបម្រើការលើយន្តហោះនៃក្រុមហ៊ុនអាកាសចរណ៍ Thai Airway មុននឹងមានទំនាក់ទំនងជាមួយមហាក្សត្រថៃអង្គនេះ។
អគ្គមហេសី សុធិតា ត្រូវបានមហាក្សត្រថៃ មហា វជ្ជរ៉ាឡុងកន តែងតាំងជាមេបញ្ជាការរងនៃកងអង្គរក្សរបស់ទ្រង់កាលពីឆ្នាំ២០១៤ មុននឹងកាន់តំណែងជាមេបញ្ជាការពេញទីនៅក្នុងឆ្នាំ២០១៦។
ព្រះមហាក្សត្រថៃ មហា វជ្ជរ៉ាឡុងកន ព្រះជន្ម ៦៦ឆ្នាំ គ្រោងនឹងឡើងគ្រងរាជ្យសម្បត្តិផ្លូវការនៅថ្ងៃទី៤ ខែឧសភានេះ បន្ទាប់ពីព្រះបិតារបស់ទ្រង់ អតីតព្រះមហាក្សត្រ ភូមិបុល អាឌុលយ៉ាដេត បានសោយទិវង្គតកាលពីឆ្នាំ២០១៦៕