រដ្ឋមន្ត្រីក្រសួងព័ត៌មានលើកឡើថា វិស័យសារព័ត៌មាននៅកម្ពុជាមានការរីកចម្រើនជាបន្តបន្ទាប់ ហើយបានបើកសិទ្ធិទូលាយសម្រាប់ការផ្សព្វផ្សាយដំណឹងពិតទាំងជាតិ និងអន្តរជាតិដល់ប្រជាពលរដ្ឋ ដោយមិនមានការគំរាមកំហែងអ្វីនោះទេ។
ក្នុងពិធីអបអរទិវាសេរីភាពសារព័ត៌មានពិភពលោកឆ្នាំ២០១៩ នៅថ្ងៃនេះ រដ្ឋមន្រ្តីក្រសួងព័ត៌មាន លោក ខៀវ កាញារីទ្ធ ថ្លែងថា បច្ចុប្បន្ន សិទ្ធិសេរីភាពបញ្ចេញមតិ និងសិទ្ធិសេរីភាពសារព័ត៌មានត្រូវបានបើកទូលាយដែលមានការធានាដោយច្បាប់ ករណីនេះ អ្នកសារព័ត៌មានអាចបំពេញតួនាទីរបស់ខ្លួនដោយគ្មានការគំរាមកំហែង។
លោកថ្លៃងថា៖ «សិទ្ធិសេរីភាពនៃការបញ្ចេញមតិ និងសិទ្ធិសេរីភាពសារព័ត៌មានត្រូវបានបើកទូលាយធានាដោយច្បាប់រដ្ឋ។ ការរីកចម្រើនយ៉ាងឆាប់រហ័សនៃប្រព័ន្ធផ្សព្វផ្សាយតាមបែបសម័យឌីជីថលនៃយុគសម័យបច្ចុប្បន្ន ដោយប្រព័ន្ធផ្សព្វផ្សាយសិទ្ធិនៅក្នុងម្រាមដៃរបស់មនុស្សគ្រប់រូប ដែលគេអាចបង្ហោះព័ត៌មានគ្រប់ប្រភេទ បានគ្រប់ពេលវេលា»។
លោក ខៀវ កាញារីទ្ធ អំពាវនាវឱ្យអ្នកសារព័ត៌មានទាំងអស់ត្រូវបំពេញការងាររបស់ខ្លួនត្រូវមានក្រមសីលធម៌ វិជ្ជាជីវៈ រក្សានូវភាពថ្លៃថ្នូរ និងខិតខំអភិវឌ្ឍសមត្ថភាពរបស់ខ្លួន ដើម្បីឱ្យដើរទាន់ការរីកចម្រើននូវបច្ចេកវិទ្យាឌីជីថលនាពេលបច្ចុប្បន្ន និងមិនត្រូវយកតួនាទីខ្លួនទៅប្រព្រឹត្តអំពើខុសច្បាប់ ដែលធ្វើឱ្យប៉ះពាល់ដល់តម្លៃសារព័ត៌មានផង។
ប៉ុន្តែ តំណាងស្ថានទូតស៊ុយអ៊ែតប្រចាំប្រទេសកម្ពុជា លោក Andreas Johansson លើកឡើងថា សេរីភាពសារព័ត៌មាននៅប្រទេសកម្ពុជាមិនទាន់បានបើកទូលាយនោះទេ ដោយលោកមើលឃើញថា នាពេលបច្ចុប្បន្ននេះ អ្នកសារព័ត៌មានមួយចំនួននៅតែទទួលរងការធ្វើទុកបុកម្នេញ និងរងការគំរាមកំហែងផងដែរ
លោកថា៖ «សេរីភាពសារព័ត៌មានពិតបានរួមចំណែកខ្លាំងក្លា [ក្នុងការលើកម្ពស់] លទ្ធិប្រជាធិតេយ្យ ហើយពេលខ្លះ ប្រទេសកម្ពុជាក៏មានចំណុចខ្វះសេរីភាពសារព័ត៌មាន ហើយយើងឃើញថា កន្លងមក ក៏មានការគំរាមកំហែងខ្លះទៅសារព័ត៌មានផងដែរ»។
យោងតាមរបាយការណ៍ស្តីពីសន្ទស្សន៍សេរីភាពសារព័ត៌មានពិភពលោកចេញផ្សាយកាលពីខែមេសា ឆ្នាំ២០១៩ ដោយដាក់ចំណាត់ថ្នាក់សេរីភាពសារព័ត៌មានប្រទេសកម្ពុជាលេខ១៤៣ ក្នុងចំណោមប្រទេស១៨០ ក្នុងពិភពលោក។
របាយការណ៍ RSF បានកត់សំគាល់អំពីភាពស្ងៀមស្ងាត់នៅក្នុងការបោះឆ្នោតឆ្នាំ២០១៨ ក្រោយពេលស្ថានីយ៍វិទ្យុប្រមាណជាង៣០ ត្រូវបានបិទកាលពីចុងឆ្នាំ២០១៧។ របាយការណ៍ក៏បានកត់ត្រាបញ្ចូលនូវការបង្ខំឲ្យបិទទ្វាកាសែត ខេមបូឌា ដេលី និងការផ្លាស់ប្តូរម្ចាស់សារព័ត៌មាន ភ្នំពេញប៉ុស្តិ៍។