អតីតមន្ត្រីគណបក្សសង្គ្រោះជាតិចំនួន៥រូប ចូលខ្លួនបំភ្លឺនៅសាលាដំបូងខេត្តបាត់ដំបងនៅថ្ងៃពុធនេះ តាមដីកាកោះដោយចោទថា បំពានអំណាចសាលដីកាតុលាការកំពូល។
លោក តុន សាម៉ន និងលោក រឿន កែម ជាអតីតមេឃុំ និងអតីតក្រុមប្រឹក្សាឃុំ លោក សម វង្សដារា បានចូលដល់សាលាដំបូងខេត្តបាត់ដំបងតាំងពីព្រឹកព្រលឹម ចំណែកមន្ត្រី២រូបផ្សេងទៀត បំភ្លឺពេលរសៀល។
តុលាការខេត្តបាត់ដំបងបានកោះហៅអតីតមន្ត្រីរបស់សង្គ្រោះជាតិជាបន្តបន្ទាប់ដែលរហូតដល់ថ្ងៃនេះមានចំនួន២៦នាក់ក្នុងបទចោទដូចគ្នានេះ។
អ្នកគាំទ្រជាង៦០នាក់បានប្រមូលផ្តុំគ្នានៅក្រៅតុលាការនៅម៉ោង៨:៣០នាទីព្រឹក ហើយចំនួនមនុស្សបានបន្តកើនឡើងផងដែរ។ នគរបាលក្នុងមូលដ្ឋានបានបិទផ្លូវ ហើយក្រុមឃ្លាំមើលរបស់អង្គការសហប្រជាជាតិ និងអង្គការសិទ្ធិមនុស្សក្នុងស្រុក ក៏មានវត្តមាននៅទីនោះដែរ។
តុលាការកំពូលបានរំលាយគណបក្សសង្គ្រោះជាតិ ជាគណបក្សប្រឆាំងកាលពីខែវិច្ឆិកា ឆ្នាំ២០១៧ ហើយហាមឃាត់មន្ត្រីជាន់ខ្ពស់១១៨រូប មិនឲ្យធ្វើនយោបាយ។
ទោះបីជាយ៉ាងណា អតីតសមាជិកគណបក្សប្រឆាំងនៅខេត្តបាត់ដំបងដែលត្រូវបានកោះហៅទាំងនេះ គឺគ្រាន់តែជាមន្ត្រីថ្នាក់មូលដ្ឋានរបស់គណបក្សនេះ មិនមានឈ្មោះក្នុងចំណោម១១៨នាក់នេះទេ។
អង្គការឃ្លាំមើលសិទ្ធិមនុស្សបានចេញសេចក្តីថ្លែងការណ៍មួយថ្កោលទោសការកោះហៅនេះ ហើយបានអំពាវនាវដល់គណបក្សកាន់អំណាចឲ្យបញ្ឈប់ការធ្វើទុក្ខបុកម្នេញទៅលើអ្នកប្រជែងនយោបាយរបស់ខ្លួនជាបន្ទាន់។
លោក ប៊្រែដ អាដាម (Brad Adams) នាយកប្រតិបត្តិប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស ដែលមានមូលដ្ឋាននៅទីក្រុងញូវយ៉កបានមានប្រសាសន៍ថា៖
«រដ្ឋាភិបាលកម្ពុជាបន្តធ្វើទុក្ខបុកម្នេញលើមន្ត្រីគណបក្សប្រឆាំងជាច្រើនរូបតាមផ្លូវតុលាការ និងគំរាមកំហែងចាប់ដាក់ពន្ធនាគារ ក្រោយពេលគណបក្សប្រឆាំងដ៏ធំមួយនេះ ត្រូវបានរំលាយដោយមិនសមហេតុផលយូរមកហើយនោះ»។
«រដ្ឋាភិបាលគួរបញ្ចប់យុទ្ធនាការធ្វើទុក្ខបុកម្នេញផ្នែកនយោបាយភ្លាមៗលើគណបក្សសង្គ្រោះជាតិ និងទម្លាក់ចោលសំណុំរឿងមិនសមហេតុផលទាំងនេះ»៕