សមត្ថកិច្ចបិទផ្លូវ និងទីតាំងមួយចំនួននៅក្បែរសាលាដំបូងខេត្តបាត់ដំបង

សមត្ថកិច្ចបិទផ្លូវ និងទីតាំងមួយចំនួននៅក្បែរសាលាដំបូងខេត្តបាត់ដំបងនៅព្រឹកនេះ ដោយសំអាងហេតុផលថា ដើម្បីរៀបចំសោភ័ណភាពតុលាការ ខណៈអតីតមន្ត្រីគណបក្សសង្គ្រោះជាតិ​៦រូបទៀតបន្តចូលខ្លួនបំភ្លឺតាមដីកាកោះ។​

នៅថ្ងៃព្រហស្បតិ៍នេះ អតីតចៅសង្កាត់ និងក្រុមប្រឹក្សាគណបក្សសង្គ្រោះជាតិចំនួន ៤រូប កំពុងចូលឆ្លើយបំភ្លឺនៅតុលាការនៅពេលព្រឹក គឺរួមមាន អតីតសមាជិកក្រុមប្រឹក្សាខេត្តបាត់ដំបង លោក ឌឹម សារឿន ចៅសង្កាត់អូរចារ កញ្ញា ស៊ិន ចាន់ពៅរ៉ូហ្សេត អតីតចៅសង្កាត់ទួលតាឯក លោក ម៉ក រ៉ា និងអតីតចៅសង្កាត់ព្រែកព្រះស្ដេច លោក ខាន់ ប៊ុនផេង។ ចំណែក២នាក់ទៀត នឹងត្រូវឆ្លើយបំភ្លឺនៅពេលរសៀល ដែលរួមមាន អតីតចៅសង្កាត់ចំការសំរោង លោក ឃួន ចំរើន និងអតីតក្រុមប្រឹក្សាក្រុងបាត់ដំបង លោក យួម​ ដូង។

ចំពោះស្ថានភាពនៅតុលាការខេត្តបាត់ដំបងនាព្រឹកនេះ គឺសមត្ថកិច្ចបានរារាំងក្រុមអ្នកគាំទ្រ មន្ដ្រីអង្គការសង្គមស៊ីវិល និងអ្នកសារព័ត៌មាន មិនឲ្យចូលទៅឈរនៅបរិវេណខាងមុខតុលាការនោះទេ។ ចំណែកផ្លូវក្បែរនោះខ្លះក៏បិទដែរ ដោយសំអាងហេតុផលថា កាត់ដើមឈើរៀបចំសោភ័ណភាពតុលាការ។​

គិតត្រឹមថ្ងៃទី៩ ខែឧសភានេះ មនុស្ស ១១នាក់ក្នុងចំណោមមនុស្សចំនួន ២៦នាក់របស់អតីតគណបក្សប្រឆាំង ចូលឆ្លើយបំភ្លឺតាមដីកាកោះមកសាកសួររបស់តុលាការខេត្តបាត់ដំបងជុំវិញការចោទថា ពួកគេបានធ្វើសកម្មភាពបំពានទៅសាលដីការបស់តុលាការកំពូលពាក់ព័ន្ធនឹងការរំលាយអតីតបក្សប្រឆាំង៕