ប្រធានរាជបណ្ឌិត្យសភាកម្ពុជា លោកបណ្ឌិត សុខ ទូច បានអះអាងថា វាមិនដែលមាននោះទេគ្រាន់តែផ្តិតមេដៃបានកោះត្រល់មកវិញនោះ។
កាលពីឆ្នាំ២០១៨ គណបក្សខ្មែរក្រោក ប្រកាសធ្វើយុទ្ធនាការប្រមូលស្នាមមេដៃដាក់ទៅក្រុមប្រឹក្សាធម្មនុញ្ញ ដើម្បីពិនិត្យសន្ធិសញ្ញាបំពេញបន្ថែម ដែលគណបក្សនេះចាត់ទុកថា ធ្វើឱ្យកម្ពុជាបាត់បង់ទឹកដី។ ប៉ុន្តែ ពេលនោះ លោកសុខ ទូច បានអំពាវនាវឲ្យចាត់វិធានការគណបក្សនោះ ដោយថា វានឹងធ្វើឲ្យប៉ះពាល់សន្តិសុខសង្គម។ ក្រោយមក នៅអំឡុងខែសីហា ឆ្នាំ២០១៨ តំណាងបក្សខ្មែក្រោក បានដាក់ពាក្យបណ្ដឹងទៅតុលាការប្តឹងប្រធានរាជបណ្ឌិត្យសភាកម្ពុជារូបនេះ ពីបទ កុបកម្ម និងជ្រៀតជ្រែកដោយខុសច្បាប់ទៅក្នុងការបំពេញមុខងារសាធារណៈ ។
ឆ្លើយតបទៅនឹងសំណួររបស់អ្នកសារព័ត៌មាន ក្រោយពេលលោកចូលបំភ្លឺនៅសាលាដំបូងនៅព្រឹកថ្ងៃនេះ លោក សុខ ទូច បានលើកឡើងថា ការធ្វើសន្និសីទសារព័ត៌មានរបស់លោក កាលពីឆ្នាំ២០១៨ ទាក់ទងនឹងការប្រមូលស្នាមមេដៃទាមទារកោះត្រល់របស់បក្សខ្មែក្រោក គឺដើម្បីពន្យល់ពលរដ្ឋឲ្យដឹងថា នៅលើពិភពលោក វាមិនដែលមាននោះទេ គ្រាន់តែផ្តិតមេដៃបានទឹកដីមកវិញនោះទេ។
លោក មានប្រសាសន៍ថា៖ «ការចោទប្រកាន់ហ្នឹង មិនត្រឹមត្រូវទេ។ តែពាក្យធ្វើបទសម្ភាសន៍ជាផ្លូវការសារព័ត៌មានសាធារណជន ខ្ញុំបានធ្វើមែននៅ(ឆ្នាំ)២០១៨ ហ្នឹង ពីព្រោះមូលហេតុអី ពីព្រោះយើងដើរផ្ដិតស្នាមមេដៃ ដើម្បីយកកោះត្រល់។ អ៊ីចឹង បើយកកោះត្រល់ សួរថា លក្ខណៈប្រវត្តិសាស្រ្ត គាត់យល់ទេ គាត់នៅឡើយ ហើយផ្លូវច្បាប់អន្តរជាតិមានទេ នៅលើពិភពលោកគ្រាន់តែផ្ដិតស្នាមមេដៃទទួលបានកោះត្រល់មកវិញ ឬបានប្រទេសមកវិញ? វាដែលមានទេ? វាអត់ដែលមានទេ»។
លោក បន្តថា ក្នុងនាមលោកអ្នកវិទ្យាសាស្រ្ត ត្រូវតែនិយាយបញ្ហានេះប្រាប់ទៅមហាជន ហើយលោក ក៏បានច្រានចោលរឿងដែលចោទលោកថា ទៅបង្កើតកុបកម្ម និងជ្រៀតជ្រែកមុខសាធារណៈនោះ។
អនុប្រធានគណបក្សខ្មែរក្រោក លោក ម៉ាក ធីបុត្រ បានសរសេរនៅលើហ្វេសប៊ុករបស់លោកថា យុទ្ធនាការប្រមូលស្នាមមេដៃទាមទារកោះត្រល់កាលពីឆ្នាំ២០១៨ នោះ គឺគណបក្សលោកធ្វើទៅតាមការចង់បានរបស់មហាជនប៉ុណ្ណោះ។
លោក បានសរសេរថា៖ «សុំកុំធ្វើការបន្លប់អង្គហេតុ ចំពោះយុទ្ធនាការស្នាមមេដៃមួយដើម្បីកោះត្រល់។ គណបក្សខ្មែរក្រោក ធ្វើការផ្ដួចផ្ដើមតាមការចង់បានរបស់មហាជន ដោយយោង និងពិនិត្យលើរដ្ឋធម្មនុញ្ញ មាត្រា៩២ ដែលប្រមូលស្នាមមេដៃដាក់ញត្តិអោយក្រុមប្រឹក្សាធម្មនុញ្ញពិនិត្យសារឡើងវិញ»។
អតីតមន្រ្តីបក្សប្រឆាំង បានលើកឡើងជាញឹកញាប់ថា កម្ពុជាបានខាតបង់ទឹកដីទៅប្រទេសវៀតណាម ដោយសារតែសន្ធិសញ្ញាបំពេញបន្ថែមឆ្នាំ២០០៥ ដែលក្នុងនោះក៏មានកោះត្រល់ផងដែរ។ ប៉ុន្តែ រដ្ឋាភិបាលបានច្រានចោលការចោទប្រកាន់នេះ ដោយថា កម្ពុជាមិនបានបាត់បង់ទឹកដីឡើយ ហើយករណីកោះត្រល់ បានបាត់តាំងពីសម័យមុនមកម្ល៉េះ៕
