មូលនិធិសត្វព្រៃពិភពលោក បានលើកឡើងពីផលប៉ះពាល់នៃទំនប់វារីអគ្គិសនីទៅលើធនធានធម្មជាតិ និងសត្វក្នុងទឹក ខណៈជំរុញដល់ប្រទេសនៅក្នុងតំបន់ទន្លេមេគង្គទាំងអស់ឲ្យរកប្រភពថាមពលថ្មីដែលមិនប៉ះពាល់ខ្លាំងដល់ប្រព័ន្ធអេកូឡូស៊ីទាំងនេះ។
ក្នុងសេចក្ដីប្រកាសព័ត៌មានចុះថ្ងៃទី១៣ ខែឧសភា មូលនិធីសត្វព្រៃពិភពលោក WWF បានលើកឡើងថា ក្នុងមួយសតវត្សចុងក្រោយនេះ ការសាងសង់ទំនប់វារីអគ្គិសនីនៅប្រទេសនៃដងទន្លេមេគង្គ ក្នុងនោះមានកម្ពុជាផងដែរ បានធ្វើឲ្យប៉ះពាល់ដល់ការផ្លាស់ទីរបស់ត្រីជាងពាក់កណ្ដាល ហើយដីសណ្ដរច្រើនជាងពាក់កណ្ដាលកំពុងតែត្រូវបានលិចដោយទឹកដែលកើតចេញពីទំនប់វារីអគ្គិសនីទាំងនេះ។
WWF ជំរុញឲ្យប្រទេសដែលនៅតាមតំបន់ដងទន្លេមេគង្គឲ្យងាកមកប្រើប្រាស់ប្រភពថាមពលដែលកើតចេញពីពន្លឺព្រះអាទិត្យ និងខ្យល់វិញ ដើម្បីកាត់បន្ថយការកើនឡើងកម្ដៅផែនដី និងជួយកាត់បន្ថយការបាត់បង់ចំនួនត្រីទឹកសាបផងដែរ។
បើតាម WWF រដ្ឋាភិបាលគួរតែបង្កើតការប្រកួតប្រជែងក្នុងការផ្លាស់ប្ដូរពីវារីអគ្គិសនីទៅរកប្រភពថាមពលថ្មី ព្រមទាំងវាយតម្លៃសារជាថ្មីនូវគម្រោងវារីអគ្គិសនី ដោយគិតទៅលើប្រព័ន្ធអេកូឡូស៊ីរបស់ធម្មជាតិនៅតំបន់ដែលមានគម្រោងទាំងនោះ៕