តុលាការខេត្តសៀមរាប បានចោទប្រកាន់បុរសជនជាតិអាមេរិកម្នាក់ពីបទបំពារបំពានផ្លូវភេទលើក្មេងស្រី ៤នាក់ក្នុងប្រទេសកម្ពុជា។
សេចក្ដីប្រកាសព័ត៌មានរបស់អង្គការសកម្មភាពដើម្បីកុមារ (APLE Cambodia) ឲ្យដឹងថា កាលពីថ្ងៃទី២២ ខែឧសភា តុលាការខេត្តសៀមរាបបានសម្រេចចោទប្រកាន់បុរសជនជាតិអាមេរិកម្នាក់ អាយុ ៣៨ឆ្នាំ ពីបទប្រព្រឹត្ត «អំពើអាសប្រឆាំងនឹងអនីតិជនអាយុក្រោម ១៥ឆ្នាំ» គឺបន្ទាប់ពីកុមារី ៤នាក់ អាយុចន្លោះពី១២ ទៅ១៥ឆ្នាំ បានរាយការណ៍ជូនទៅសមត្ថកិច្ចអំពីសកម្មភាពបំពារបំពារមិនសមរម្យទៅលើពួកគេ។
តាមការចុះផ្សាយលើគេហទំព័ររបស់អគ្គស្នងការដ្ឋាននគរបាលជាតិ បុរសជនជាតិរូបនោះឈ្មោះថា CLINE RUGH JAMES។
អ្នកឯកទេសផ្នែកការពារកុមាររបស់អង្គការ APLE Cambodia លោក ឃឹម វ៉ាន់ដូ ប្រាប់ VOD បន្ថែមថា កុមារីទាំង ៤នាក់ គឺជាក្មេងដើរនៅតាមចិញ្ចើមផ្លូវ ហើយបុរសជនជាតិអាមេរិករូបនោះបានល្បួងពួកគេយកទៅផ្ទះជួលរបស់គាត់មួយកន្លែង ស្ថិតក្នុងក្រុងសៀមរាប។
លោក បន្ដថា៖ «គាត់បានលួងលោមកុមារី ៤នាក់ទៅផ្ទះរបស់គាត់ ហើយឆ្លៀតឱកាសហ្នឹង គាត់បានបំពានផ្លូវភេទទៅលើកុមារីទាំងនោះ។ តាមបទចោទដែលខាងតុលាការធ្វើការចោទប្រកាន់នោះ គឺគាត់បានប្រព្រឹត្តអំពើអាសជាមួយកុមារីទាំង៤នាក់ហ្នឹង ដែលមានអាយុចន្លោះពី១២ ទៅ១៥ឆ្នាំ»។
បើតាមសេចក្ដីប្រកាសព័ត៌មានរបស់អង្គការ APLE Cambodia ជនជាប់ចោទជាជនជាតិអាមេរិករូបនោះ កំពុងស្ថិតនៅក្រោមចំណាត់របស់តុលាការ និងស្ថិតក្រោមការឃុំខ្លួននៅពន្ធនាគារជាបណ្ណោះអាសន្ន។
តាមមាតា៤៣ នៃច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ចែងថា ការប្រព្រឹត្តអំពើអាសលើអនីតិជនអាយុក្រោម ១៥ឆ្នាំ ដែលមានទោសដាក់ពន្ធនាគារចន្លោះពី១ឆ្នាំ ទៅ៣ឆ្នាំ និងការពិន័យប្រាក់ពី២លាន ទៅ៦លានរៀល៕
