រដ្ឋាភិបាលរបស់គណបក្សកាន់អំណាចបានប្រតិកម្មជាថ្មីទៀតចំពោះលោក សម រង្ស៊ី ដោយចោទអតីតមេដឹកនាំបក្សប្រឆាំងដែលកំពុងរស់នៅក្រៅប្រទេសរូបនេះ ថា ចង់យកពលរដ្ឋធ្វើជាខែលដើម្បីបានចូលមកកម្ពុជាវិញ។
ក្នុងសេចក្ដីថ្លែងការណ៍កាលពីម្សិលមិញ អង្គភាពអ្នកនាំពាក្យរដ្ឋាភិបាលហៅការអំពាវនាវរបស់លោក សម រង្ស៊ី ថាជាទង្វើញុះញង់ និងជាការទាល់ច្រកផ្នែកនយោបាយ។ អង្គភាពអ្នកនាំពាក្យរដ្ឋាភិបាលចោទប្រកាន់លោក សម រង្ស៊ី ថាចង់យកញើសឈាម និងជីវិតរបស់ពលរដ្ឋ ធ្វើជាឈ្នាន់នៃការវិលត្រឡប់របស់លោក។
ក្រៅពីនេះ រដ្ឋាភិបាលក៏ព្រមានចាត់វិធានការច្បាប់ និងប្រកាសត្រៀមទប់ស្កាត់រាល់ចលនាទាំងឡាយ ដែលខ្លួនយល់ថា អាចបំផ្លាញដល់សន្ដិភាព និងការអភិវឌ្ឍរបស់ប្រជាជន។
អង្គភាពអ្នកនាំពាក្យរដ្ឋាភិបាលលើកឡើងក្នុងសេចក្ដីថ្លែងការណ៍ថា៖ «ការអំពាវនាវរបស់ទណ្ឌិតឧទ្ទាមរូបនេះ គឺជាការញុះញង់ពិតប្រាកដដល់ប្រជាពលរដ្ឋខ្មែរ គឺកំពុងបង្ហាញអំពីភាពទន់ខ្សោយនយោបាយ ហើយចង់ងាកប្រើប្រាស់ញើសឈាម និងជីវិតប្រជាជនកម្ពុជាជាឈ្នាន់សម្រាប់ការវិលត្រឡប់មកវិញរបស់ពួកគេ»។
ប្រតិកម្មនេះ គឺធ្វើឡើងបន្ទាប់ពីលោក សម រង្ស៊ី កាលពីថ្ងៃទី២៥ ខែឧសភាកន្លងមកនេះ បានផ្ដល់បទសម្ភាសន៍មួយឲ្យវិទ្យុអាស៊ីសេរី ដោយថា អតីតក្រុមមេដឹកនាំបក្សប្រឆាំងនៅក្រៅប្រទេសនឹងបន្ដការតស៊ូប្រឆាំងរដ្ឋាភិបាលដឹកនាំដោយគណបក្សប្រជាជនកម្ពុជា ដែលលោក សម រង្ស៊ី ថា គឺជារដ្ឋាភិបាលខុសច្បាប់កើតចេញពីការបោះឆ្នោតក្លែងក្លាយ។
ក្នុងបទសម្ភាសន៍ជាមួយវិទ្យុអាស៊ីសេរីនេះ លោក សម រង្ស៊ី ក៏អំពាវនាវជាថ្មីឲ្យកងកម្លាំងប្រដាប់អាវុធ មន្ដ្រីរាជការ និងប្រជាពលរដ្ឋចូលរួមជាមួយលោកនៅក្នុងដំណើរធ្វើមាតុភូមិនិវត្តន៍នេះ។
អ្នកវិភាគនយោបាយជើងចាស់ លោកបណ្ឌិត ឡៅ ម៉ុងហៃ មានប្រសាសន៍ថា អ្នកនយោបាយខ្មែរគួរតែបន្ទន់ឥរិយាបថ ហើយវិលទៅរកតុចរចានយោបាយវិញ ដើម្បីរក្សាផលប្រយោជន៍ជាតិ និងបញ្ចៀសនូវទណ្ឌកម្មផ្សេងៗ ដែលសហគមន៍អន្ដរជាតិព្រមានមកលើកម្ពុជា ជុំវិញបញ្ហារំលោភសិទ្ធិមនុស្ស និងការដើរថយក្រោយនៃលទ្ធិប្រជាធិបតេយ្យ។
លោកបន្ដថា៖ «កុំឲ្យសហគមន៍អន្ដរជាតិ ជាពិសេសសហគមន៍អឺរ៉ុប សហរដ្ឋអាមេរិក សុំឲ្យផ្អាកវិធានការដែលគេប្រុងចាត់មកលើខ្មែរយើងហ្នឹង […] ក៏ប៉ុន្ដែ ចាក់បណ្ដោយទៅជឿគាត់ទៅថា វាអត់ខាត់បង់អីទេ បើសិនជាគេដក EBA ក៏ដកទៅ។ ប៉ុន្ដែ បើមិនបានទេ មានតែគាត់បាត់បង់ការទុកចិត្ត និងគាំទ្រពីប្រជាពលរដ្ឋខ្មែរដែលរងផលប៉ះពាល់ពីការព្យួរប្រព័ន្ធអនុគ្រោះពន្ធនោះ»។
បញ្ហាកម្ពុជា អ្នកជំនាញសិទ្ធិមនុស្សអង្គការសហប្រជាជាតិ លោកស្រី រ៉ូណា ស្មីត បានផ្តល់អនុសាសន៍ថា គួរតែប្តូរវប្បធម៌ពីការផ្តោតទៅលើតែទៅលើបញ្ហាបុគ្គល ទៅផ្តោតលើបញ្ហាជាតិវិញ ទើបអាចជោគជ័យលើបញ្ហាប្រឈមនានានៃស្ថានភាពនយោបាយបច្ចុប្បន្នសម្រាប់ផលប្រយោជន៍ដល់ប្រជាពលរដ្ឋកម្ពុជាទាំងមូល៕
