សមត្ថកិច្ចបានឃាត់ខ្លួន និងដកហូកលុយជិត ១លានដុល្លារពីជនជាតិចិនម្នាក់ បន្ទាប់ពីរកឃើញថា លុយដែលជនជាតិចិននាំចូលមកក្នុងប្រទេសកម្ពុជា ជាលុយខុសច្បាប់។
អ្នកនាំពាក្យអគ្គនាយកដ្ឋានអន្តោប្រវេសន៍ លោក កែវ វណ្ណថន ប្រាប់ វី.អូ.ឌី នៅថ្ងៃនេះ ថា សមត្ថកិច្ចបានឃាត់ខ្លួន និងដកហូតទឹកប្រាក់ចំនួន ៨៥៥ ០០០ដុល្លារ ពីជនជាតិចិនម្នាក់នៅព្រលានយន្តហោះអន្តរជាតិភ្នំពេញ កាលពីម្សិលមិញនេះ បន្ទាប់ពីរកឃើញថា លុយដែលជនជាតិចិននាំពីទីក្រុងហុងកុងចូលប្រទេសកម្ពុជានោះ ពុំមានការបញ្ជាក់ពីប្រភពហិរញ្ញវត្ថុឱ្យបានច្បាស់លាស់។
ក្រោយពីឃាត់ខ្លួន លោកថា សមត្ថកិច្ចកំពុងរៀបចំសំណុំរឿងបញ្ជូនជនជាតិចិនម្នាក់នោះទៅតុលាការ ដើម្បីបន្តនីតិវិធី។
លោកថា៖ «ដោយសារប្រភពនៃលុយនោះ ជនសង្ស័យឆ្លើយមិនច្បាស់លាស់ មិនដឹងប្រភពហ្នឹងបានមកពីណា ទី២ គោលដៅដែលមកប្រើនៅកម្ពុជាក៏មិនច្បាស់លាស់។ អាហ្នឹង [យើង] សង្ស័យថា ពាក់ព័ន្ធនឹងបទសម្អាតប្រាក់»។
លោក កែវ វណ្ណថន បន្តថា នេះជាលើកទី៣ហើយដែលសមកិច្ចកម្ពុជាបានឃាត់ខ្លួន និងដកហូតលុយពីជនជាតិចិនដែលនាំចូលមកប្រទេសកម្ពុជាទ្រង់ទ្រាយធំ ដោយលើកទី១ ដកហូតលុយបានពីជនជាតិចិនជាង ៣លានដុល្លារ កាលពីចុងឆ្នាំ២០១៨ ហើយលើកទី២ ដកហូតទឹកប្រាក់ចំនួន ៣ ៥២០ ០០០ដុល្លារ ក្នុងខែមេសា ឆ្នាំ២០១៩។ លោក កែវ វណ្ណថន បញ្ជាក់ថា ជនជាតិចិនទាំងអស់នោះ ត្រូវបានតុលាការបង្គាប់ឱ្យឃុំខ្លួននៅពន្ធនាគារកម្ពុជា។
