អ្នកឃ្លាំមើលបញ្ហាសង្គមមួយចំនួនបង្ហាញការយល់ឃើញថា ការចង់បន្តរក្សាទំនាក់ទំនងល្អជាមួយប្រទេសលោកសេរី អាចជាឧបសគ្គ បើបក្សកាន់អំណាចនៅតែបន្តផាត់បក្សប្រឆាំងចេញពីឆាកនយោបាយនោះ។
លោកនាយករដ្ឋមន្ត្រី ហ៊ុន សែន អំឡុងទៅចូលសន្និសីទអន្តរជាតិលើកទី២៥ ស្តីពី «អនាគតរបស់អាស៊ី» នៅទីក្រុងតូក្យូ ប្រទេសជប៉ុន សប្តាហ៍នេះ បានផ្ញើសារថា «កម្ពុជានៅតែចង់ធ្វើជាមិត្តល្អរបស់អាមេរិកជានិច្ច» តែថា លោកត្រៀមខ្លួនធ្វើសង្គ្រាមរហូតទីបញ្ចប់ជាមួយអតីតមេបក្សប្រឆាំង លោក សម រង្ស៊ី។
អ្នកវិភាគនយោបាយ លោក ឯម សុវណ្ណរ៉ា មានប្រសាសន៍ថា សាររបស់មេដឹកនាំកម្ពុជា អាចជាសារមួយប្រាប់ថា កម្ពុជានៅតែត្រូវការប្លុកលោកសេរី ដើម្បីជាបង្អែកសេដ្ឋកិច្ចរបស់ខ្លួន តែចង់ប្រាប់ប្រទេសទាំងនោះកុំឱ្យនៅពីក្រោយគណបក្សប្រឆាំង ។
អ្នកវិភាគរូបនេះ វិភាគថា បើគេពិនិត្យមើលវិធានការបន្តបន្ទាប់របស់លោកសេរីមកលើកកម្ពុជា មានទាំងដំណើរការព្យួរ EBA លោកថា ជាឧបសគ្គរបស់រដ្ឋាភិបាល បើនៅតែបន្តបិទផ្លូវគណបក្សប្រឆាំង។
លោក ថា៖ «បើសិនជារដ្ឋាភិបាលចង់ជំរុញឱ្យមានទំនាក់ទំនងល្អជាមួយអាមេរិកដូចចិន កម្ពុជាត្រូវធ្វើឱ្យប្រសើរឡើងនូវការបើកលំហសេរីភាព និងលទ្ធិប្រជាធិបតេយ្យដូចដែលលោកសេរី មាន សហរដ្ឋអាមេរិក និងសហគមអឺរ៉ុបចង់បាន។ ហើយបើគណបក្សប្រឆាំងគេអាចសម្របសម្រួលបាន ហើយមិនអាចផាត់គេចេញបានទេ»។
សមាជិកព្រឹទ្ធសភាអាមេរិក៣រូប កាលពីសប្តាហ៍មុន បានស្នើច្បាប់ចងកាតព្វកិច្ចកម្ពុជា ដែលច្បាប់នោះ តម្រូវឱ្យកម្ពុជាគោរពកិច្ចព្រមព្រៀងសន្តិភាពទីក្រុងប៉ារីសឱ្យបានពេញលេញ ត្រូវធានាសន្តិសុខក្នុងតំបន់ និងទប់ឥទ្ធិពលចិន ជាដើម។
អ្នកវិភាគវ័យក្មេង កញ្ញា លី ស្រីស្រស់ និយាយថា បើគេពិនិត្យទៅលើប្រព័ន្ធដឹកនាំកម្ពុជា គឺប្រជាធិបតេយ្យសេរីពហុបក្ស ហើយបើគេពិនិត្យមើលសហរដ្ឋអាមេរិកវិញ តាំងពីអតីតកាលរហូតបច្ចុប្បន្នកំពុងជំរុញប្រទេសមួយចំនួនលើពិភពលោក ឱ្យគ្រប់គ្រងរដ្ឋរបស់ខ្លួនឯងតាមលទ្ធិប្រជាធិបតេយ្យ។
កញ្ញា លី ស្រីស្រស់ បន្ថែមទៀតថា បរិបទនយោបាយនៅកម្ពុជាវិញ មួយរយៈចុងក្រោយនេះត្រូវបានសហគមន៍អន្តរជាតិ រួមទាំងអាមេរិកផង បានមើលឃើញថា បានរាំងខ្ទប់រលកប្រជាធិបតេយ្យ។ កញ្ញាថា ចរន្តបែបនេះ អាចថាពិបាកទៅរួច បើគណបក្សប្រឆាំងត្រូវបានគេផាត់ចេញពីឆាកនយោបាយរហូតនោះ។
កញ្ញា ថា៖ «វាមានផលលំបាក បើសិនជាយើងចង់រក្សាទំនាក់ទំនងជាមួយសហរដ្ឋអាមេរិក យើងត្រូវតែចរចាជាមួយគណបក្សប្រឆាំង។ មានន័យថា គណបក្សប្រឆាំងជាគណបក្សដែលមានប្រជាប្រិយភាព ដែលអាចប្រកួតប្រជែងស្មើដៃជាមួយនឹងគណបក្សកាន់អំណាចនៅពេលដែលយើងផាត់ចោល វាធ្វើឱ្យការប្រកួតប្រជែង ឬក៏ពហុបក្សហ្នឹងធ្លាក់ចុះ»។
ប្រធានមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា វិភាគថា ការប្រកាសសង្គ្រាមជាមួយអតីតមេដឹកនាំបក្សប្រឆាំង លោក សម រង្ស៊ី អាចជាយុទ្ធសាស្ត្រចាស់ ដើម្បីបន្សាបឥទ្ធិពលដៃគូប្រកួត មុនមានការរៀបចំការបោះឆ្នោតណាមួយតាមការចង់បានរបស់ក្រុមប្រទេសលោកសេរីនោះ។
លោក ថា៖ «យើងដឹងហើយថា គណបក្សបក្សសង្គ្រោះជាតិមានកម្លាំងប្រហាក់ប្រហែលគណបក្សកាន់អំណាច។ ហើយគណបក្សនេះកើតចេញពីចលនាបក្សពីរគឺគណបក្ស សម រង្ស៊ី និងគណបក្សសិទ្ធិមនុស្ស។ អ៊ីចឹង កាលណាបើកផ្លូវឱ្យម្ខាង ហើយបិទផ្លូវខាង ហាក់ដូចជាយុទ្ធសាស្ត្រមួយដែរដើម្បីបំបែកក្រុមហ្នឹងកុំឱ្យមូលគ្នា ឬសាមគ្គីគ្នា»។
ក្រសួងការបរទេសសហរដ្ឋអាមេរិក កាលពីដើមខែឧសភានេះ បានចេញសេចក្តីថ្លែងការណ៍ បន្តទាមទារឱ្យដោះលែងអតីតប្រធានបក្សសង្គ្រោះជាតិ លោក កឹម សុខា និងអ្នកទោសនយោបាយផ្សេងទៀត ព្រមទាំងការដកចេញនូវបម្រាមទាំងអស់ នូវអ្វីដែលអាមេរិកថា ដើម្បីធានាសិទ្ធិតបតាមច្បាប់អន្តរជាតិដែលកម្ពុជាបានផ្តល់សច្ចាប័ន។
ប៉ុន្តែ ក្នុងសន្និសីទអន្តរជាតិនៅប្រទេសជប៉ុន នាយករដ្ឋមន្ត្រីកម្ពុជា លោក ហ៊ុន សែន អំពាវនាវទៅ អន្តរជាតិ កុំឱ្យភ្ជាប់រឿងនយោបាយទៅនឹងការអនុវត្តច្បាប់របស់កម្ពុជា៕