អង្គការលើកលែងទោសអន្ដរជាតិ (Amnesty International) បានអំពាវនាវឲ្យតុលាការកម្ពុជាទម្លាក់ចោលការចោទប្រកាន់លើអ្នកបកប្រែភាសាឲ្យទូរទស្សន៍រុស្ស៊ី RT លោក រ៉ាត់ រ័ត្នមុនី។
កាលពីថ្ងៃទី៣០ ឧសភា ឆ្នាំ២០១៩ សាលាដំបូងរាជធានីភ្នំពេញបានបើកសវនាការលើសំណុំរឿង លោក រ៉ាត់ រ័ត្នមុនី ពាក់ព័ន្ធភាពយន្តឯកសារ «ម្ដាយខ្ញុំលក់ខ្ញុំ» ប៉ុន្តែ នៅក្នុងសវនាការសួរដេញដោលនេះ មិនមានដើមបណ្ដឹងចូលរួមនោះទេ។
ក្នុងសេចក្ដីថ្លែងការណ៍ កាលពីថ្ងៃទី៣០ ឧសភា ដែល VOD ទើបតែទទួលបាននៅថ្ងៃនេះ នាយកអង្គការលើកលែងទោសអន្ដរជាតិប្រចាំតំបន់អាស៊ីអាគ្នេយ៍ លោក Nicholas Bequelin លើកឡើងថា លោក រ៉ាត់ រ័ត្នមុនី មិនបានធ្វើអ្វីខុស ក្រៅតែពីបកអាក្រាតអំពីរឿងរ៉ាវនៃការជួញដូរផ្លូវភេទនៅកម្ពុជាតែប៉ុណ្ណោះ។
លោក Nicholas Bequelin ហៅករណីលោក រ៉ាត់ រ័ត្នមុនី ថា ជាការគំរាមកំហែងរបស់រដ្ឋាភិបាលទៅលើអ្នកហ៊ានរិះគន់រឿងអាស្រូវទាំងនេះ ជាពិសេសការដឹកនាំរបស់រដ្ឋាភិបាលសព្វថ្ងៃ។
ក្នុងសេចក្ដីថ្លែងការណ៍ លោក Nicholas Bequelin មានប្រសាសន៍បន្ដថា៖ «អាជ្ញាធរគួរតែទម្លាក់ចោលការចោទប្រកាន់លោក រ៉ាត់ រ័ត្នមុនី និងដោះលែងលោកជាបន្ទាន់ និងគ្មានលក្ខខណ្ឌ»។
លោក រ៉ាត់ រត្នមុនី ត្រូវបានតុលាការចោទប្រកាន់ពីបទញុះញង់ធ្វើឲ្យមានការរើសអើង និងបញ្ជូនទៅដាក់ឃុំនៅពន្ធនាគារព្រៃស បន្ទាប់ពីត្រូវបានចាប់ខ្លួននៅឯប្រទេសថៃ កាលពីខែធ្នូ ឆ្នាំមុន ពាក់ព័ន្ធនឹងការផលិតភាពយន្តឯកសារ «ម្ដាយខ្ញុំលក់ខ្ញុំ» របស់សារព័ត៌មានរុស្ស៊ី RT៕