លោកនាយករដ្ឋមន្ត្រី ហ៊ុន សែន អះអាងថា រដ្ឋាភិបាលរបស់លោកបានយកចិត្តទុកដាក់ទប់ស្កាត់ការប្រើប្រាស់ទម្រង់ធ្ងន់ធ្ងរបំផុតនៃពលកម្មលើកុមារ និងការធ្វើការងារដោយបង្ខំ តាមរយៈការពង្រឹងសមត្ថភាពមន្ដ្រីជំនាញ និងយន្ដការពាក់ព័ន្ធនានា។
ក្នុងសារលិខិតមួយអបអរខួបលើកទី ៧០ នៃទិវាកុមារអន្តរជាតិ ១ មិថុនា កាលពីថ្ងៃម្សិលមិញនេះ លោកនាយករដ្ឋមន្ដ្រី ហ៊ុន សែន អះអាងថា ក្នុងរយៈពេល ៥ឆ្នាំ កុមារកម្ពុជាជិត ៣ម៉ឺននាក់ បានរួចផុតពីទម្រង់ធ្ងន់ធ្ងរបំផុតនៃពលកម្មកុមារ ហើយកុមារជិត ១៨ម៉ឺននាក់ ត្រូវបានទប់ស្កាត់ពីការប្រើប្រាស់ពលកម្មលើកុមារ។
ក្នុងសារលិខិតដដែលនេះ រដ្ឋាភិបាលក៏បានប្ដេជ្ញាបន្ដពង្រឹងយន្ដការអនុវត្តច្បាប់ និងយន្ដការទប់ស្កាត់ពលកម្មលើកុមារ និងអំពាវនាវឲ្យភាគីពាក់ព័ន្ធចូលរួមផងដែរ។
សារលិខិតនោះគូសបញ្ជាក់ថា៖ «សមិទ្ធផលដ៏ធំធេងទាំងនេះសញ្ជាក់ពីការប្ដេជ្ញាចិត្តក៏មុតមាំរបស់រាជរដ្ឋាភិបាល ក្នុងការលើកស្ទួយវិស័យសុខុមាលភាពកុមារ ដែលធានាឲ្យកុមារគ្រប់រូបទទួលបាននូវការគាំទ្រសម្រាប់ការចាប់ផ្ដើមជីវិតដ៏ល្អ និងអភិវឌ្ឍពោរពេញទៅដោយសក្ដានុពលក្លាយពលរដ្ឋកម្ពុជា ដែលមានការទទួលខុសត្រូវក្នុងគ្រួសារ និងសង្គម និងមានផលិតភាពពេញលេញមួយជីវិត»។
កាលពីចុងឆ្នាំ២០១៦ អង្គការសម្ព័ន្ធជំរឿននិងការពារសិទ្ធិមនុស្ស (លីកាដូ) បានចេញផ្សាយរបាយការណ៍ថា បញ្ហាទាសភាព ឬការបញ្ចាំខ្លួនដើម្បីដោះបំណុលនៅកម្ពុជា នៅតែកើតមាននៅឡើយ បើទោះបីមានច្បាប់ដើម្បីដាក់ទោសទណ្ឌក៏ដោយ។
បើតាមរបាយការណ៍ដដែលនោះ អង្គការមួយនេះក៏បានធ្វើការសិក្សាទៅលើទីតាំងផលិតផលឥដ្ឋមួយចំនួននៅប្រទេសកម្ពុជា ហើយរកឃើញថា មានកុមារជាច្រើនបានជួយធ្វើការឪពុកម្តាយក្នុងការងារ ដែលពោរពេញដោយលក្ខខណ្ឌគ្រោះថ្នាក់៕
