ក្រុមគ្រួសារអតីតសកម្មជនបក្សប្រឆាំង២នាក់នៅស្រុកវាលវែង ខេត្តពោធិសាត់ បារម្ភពីសុវត្ថិភាពឪពុក និងស្វាមីរបស់ពួគេ ក្រោយពីធ្លាក់ខ្លួនឈឺ ខណៈកំពុងជាប់ឃុំ។
អ្នកស្រី ទួន ស្រីរ័ត្ន ត្រូវជាកូនស្រីបង្កើតរបស់លោក ទួន សំអាត អនុប្រធានគណបក្សសង្គ្រោះជាតិប្រចាំស្រុកវាលវែង បានប្រាប់ វី.អូ.ឌី នៅថ្ងៃនេះ ថា ឪពុករបស់នាង និងលោក ចាន់ សុផល ជំទប់ទី១ គណបក្សប្រឆាំងនៅឃុំអូរសោម ត្រូវបានសមត្ថកិច្ចស្រុកវាលវែងចាប់ខ្លួន និងបញ្ជូនទៅស្នងការដ្ឋាននគរបាលខេត្តពោធិ៍សាត់ កាលពីថ្ងៃទី២៨ ខែឧសភាកន្លងមក។
អ្នកស្រី ទួន ស្រីរ័ត្ន បានឲ្យដឹងទៀតថា ឪពុករបស់អ្នកស្រី និងលោក ចាន់ សុផល ត្រូវបានសមត្ថកិច្ចចោទដូចគ្នាថា បានកាប់ព្រៃឈើ និងបែងចែកដីធ្លីឲ្យពលរដ្ឋដោយខុសច្បាប់។
អ្នកស្រី ទួន ស្រីរ័ត្ន អះអាងថា ក្រោយការចាប់ខ្លួននេះ ឪពុករបស់នាងដែលមានអាយុ ៦៩ឆ្នាំនោះ បានធ្លាក់ខ្លួនឈឺខ្លាំង ហើយកំពុងសម្រាកព្យាបាលជំងឺនៅមន្ទីរពេទ្យខេត្ត។
កូនសកម្មជនបក្សប្រឆាំងរូបនេះ ឲ្យដឹងថា ឪពុករបស់នាងកើតជំងឺជាច្រើនមុខ ដូចជា ជំងឺខ្លាញ់រុំបេះដូង និងខ្សោយបេះដូង ជំងឺលើសឈាម ជំងឺលើសជាតិប្រៃ ជំងឺពោះវៀន និងក្រពះ ដោយថា ពេលនេះឪពុករបស់នាងដើរមិនរួចដោយខ្លួនឯងបានឡើយ។
អ្នកស្រីបន្ថែមថា៖ «ខ្ញុំបារម្ភខ្លាចបាត់បង់ប៉ាខ្ញុំទៅ ប្រសិនបើពុំមានការមើលដិតដល់ បារម្ភថា ខ្លាចគាត់ទប់ទល់នឹងស្ថានភាពជំងឺទាំងអស់ហ្នឹងអត់បាន ព្រោះគាត់កំពុងពិបាកដកដង្ហើម គាត់ដកដង្ហើមរបៀបកូនក្មេងកើតជំងឺសួតធ្ងន់ធ្ងរ គឺគាត់ដកដង្ហើមបែបហ្នឹង»។
អ្នកស្រី ប៉ែន សាវ៉ន ត្រូវជាភរិយារបស់លោក ចាន់ សុផល អះអាងថា ស្វាមីរបស់គាត់ក៏កំពុងធ្លាក់ខ្លួនឈឺធ្ងន់ដែរ ដោយខាងពន្ធនាគារបានដឹកយកទៅព្យាបាលនៅមន្ទីពេទ្យខេត្តដូចគ្នា។
អ្នកស្រីបញ្ជាក់ថា ស្វាមីរបស់គាត់កើតជំងឺឡើងឈាម ជំងឺទឹកនោមផ្អែម និងជំងឺតេតាណុសរើឡើងវិញ ដែលធ្វើឲ្យអ្នកស្រីបារម្ភថា អាចប៉ះពាល់ដល់អាយុជីវិត ប្រសិនបើពុំមានការមើលថែដិតដល់។
អ្នកស្រីបានទាមទារទៅតុលាការឲ្យដោះលែងស្វាមីគាត់ឲ្យនៅក្រៅឃុំ ដោយថា ស្វាមីរបស់គាត់ពុំបានប្រព្រឹត្តដូចការចោទប្រកាន់ឡើយ ហើយថា ករណីសមត្ថកិច្ចចាប់ខ្លួននោះ គឺពាក់ព័ន្ធរឿងនយោបាយ ដោយសារស្វាមីរបស់គាត់ជាអតីតសកម្មជនគណបក្សសង្គ្រោះជាតិ។
អ្នកស្រីបន្ថែមថា៖ «ខ្ញុំមិនដែលឃើញគាត់ទៅកាប់ព្រៃនៅឯណាបានមួយកាំបិតទេ ហេតុអ្វីបានជាចោទគាត់ថា ទៅទន្រ្ទានយកដីរដ្ឋខុសច្បាប់។ វាមានតែរឿងបក្សហ្នឹង ព្រោះគាត់ពីមុនមកហ្នឹង គាត់ធ្វើបក្សសង្គ្រោះជាតិ។ ពីមុនខ្ញុំគេថា បើចាប់បានលោក ចាន់ សុផល ហ្នឹងបានមួយនៅអូរសោម គឺស្ងាត់ហើយ។ គេចោទគាត់ថា ឃោសនាគណបក្សសង្គ្រោះជាតិហ្នឹង ហើយបក្សហ្នឹងគេរំលាយចោលអស់ហើយ ហេតុអីបានជាមកចាប់គាត់ទៀត»។
វី.អូ.ឌី មិនអាចសុំការឆ្លើយតបពីអ្នកនាំពាក្យសាលាដំបូងខេត្តពោធិ៍សាត់ លោក ហេង ដូនីន បានទេ ដោយទូរសព្ទចូលច្រើនដងគ្មានអ្នកទទួល។
មន្រ្តីឃ្លាំមើលការរំលោភសិទ្ធិមនុស្សនៃអង្គការលីកាដូ លោក កែម គីមស្រ៊ាន់ ឲ្យដឹងថា អតីតសកម្មជនបក្សទាំង ២នាក់ដែលកំពុងជាប់ឃុំនោះ ពិតជាធ្លាក់ខ្លួនឈឺ គឺជាមានជំងឺ និងកំពុងសម្រាកព្យាលនៅមន្ទីពេទ្យពិតមែន។
មន្រ្តីការពារសិទ្ធិមនុស្សរូបនេះឲ្យដឹងថា អង្គការរបស់លោកកំពុងតែស៊ើបអង្កេតទៅលើករណីនេះ ហើយថា ប្រសិនបើរកឃើញថា ការចាប់ខ្លួននោះពាក់ព័ន្ធរឿងនយោបាយ វាគឺជាការគំរាមកំហែងដល់សកម្មជនបក្សប្រឆាំង។
លោកបន្ថែមថា៖ «ទាក់ទងរឿងនេះ បើសិនជាការចោទប្រកាន់នោះមិនត្រឹមត្រូវដូចការលើកឡើងរបស់ក្រុមគ្រួសារគាត់ថា ពួកគាត់មិនជាប់ពាក់ព័ន្ធការចូលកាប់រុករានព្រៃឈើ ឬយកដីរដ្ឋមកធ្វើកម្មសិទ្ធិទេ យើងយល់ឃើញថា វាពាក់ព័ន្ធរឿងនយោបាយច្រើនជាង ព្រោះខ្ញុំយល់ឃើញថា ការចោទប្រកាន់ពួកគាត់ហ្នឹង ដើម្បីឲ្យពួកគាត់ភ័យខ្លាចមិនហ៊ានធ្វើការជួបជុំណាមួយ ដើម្បីធ្វើសកម្មភាពគាំទ្រឲ្យលោក សម រង្ស៊ី ចូលស្រុកវិញ»។
របាយការណ៍របស់អង្គការ Human Right Watch ចេញផ្សាយកាលថ្ងៃទី២ ខែមិនុនានេះ បានឲ្យដឹងថា យ៉ាងហោចណាស់មន្រ្តី និងសកម្មជនអតីតបក្សប្រឆាំងចំនូន ១៤៧នាក់ ត្រូវបានសមត្ថកិច្ច និងតុលាការ កោះហៅសាកសួរ និងឃុំខ្លួន ដោយពួកគេរងការចោទថា បានធ្វើសកម្មភាពបំពានទៅលើសាលដីកាតុលាការកំពូល៕
