អង្គការសិទ្ធិមនុស្សអន្ដរជាតិ បានទាមទារជាថ្មីឲ្យរដ្ឋាភិបាលរបស់លោកនាយករដ្ឋមន្ដ្រី ហ៊ុន សែន បញ្ឈប់ការគំរាមកំហែងលើសេរីភាពសារព័ត៌មាន ចំពេលដែលកម្ពុជារៀបចំសន្និសីទថ្នាក់តំបន់មួយនៅក្នុងសប្ដាហ៍នេះ។
វេទិកា«ប្រព័ន្ធផ្សព្វផ្សាយអាស៊ីលើកទី ១៦» ត្រូវបានគ្រោងរៀបចំធ្វើឡើងដោយក្រសួងព័ត៌មាន និងវិទ្យាស្ថានតំបន់អាស៊ីប៉ាស៊ីហ្វិក ដើម្បីអភិវឌ្ឍប្រព័ន្ធផ្សព្វផ្សាយ (AIBD) នៅខេត្តសៀមរាប ចាប់ពីថ្ងៃទី១០ រហូតដល់ថ្ងៃទី១៤ ខែមិថុនានេះ។
កិច្ចប្រជុំកំពូលនេះ នឹងប្រព្រឹត្តទៅក្រោមអធិបតីភាពលោកនាយករដ្ឋមន្ដ្រី ហ៊ុន សែន ព្រមទាំងមានការចូលរួមពីភ្ញៀវអន្ដរជាតិ មកពីបណ្ដាប្រទេសនានាជុំវិញពិភពលោកផងដែរ។
ប៉ុន្ដែ ក្នុងសេចក្ដីថ្លែងការណ៍កាលពីថ្ងៃម្សិលមិញ អង្គការឃ្លាំមើលសិទ្ធិមនុស្សអន្ដរជាតិ Human Rights Watch លើកឡើងថា ការរៀបចំកិច្ចប្រជុំកំពូលនេះ គឺជាការមាក់ងាយដល់សេរីភាពបញ្ចេញមតិ និងសេរីភាពសារព័ត៌មាននៅប្រទេសកម្ពុជា បន្ទាប់ពីរដ្ឋាភិបាលរបស់លោក ហ៊ុន សែន បានបង្ក្រាបទៅលើប្រព័ន្ធផ្សព្វផ្សាយ វិទ្យុឯករាជ្យ កាសែត និងបណ្ដាញសង្គមនៅក្នុងប្រទេស។
បើតាមសេចក្ដីថ្លែងការណ៍ អង្គការ Human Rights Watch បានស្នើឲ្យវិទ្យាស្ថាន AIBD ដែលជាអង្គការត្រូវបានបង្កើតឡើង និងទទួលបានការឧបត្ថម្ភដោយអង្គការយូណេស្កូ (UNESCO) និងបណ្ដាប្រទេសផ្សេងទៀត ដែលចូលរួមក្នុងកិច្ចប្រជុំកំពូលមួយនេះ ជំរុញឲ្យរដ្ឋាភិបាលលោក ហ៊ុន សែន បញ្ឈប់ការធ្វើទុក្ខបុកម្នេញលើសេរីភាពសារព័ត៌មាននៅកម្ពុជា។
អង្គការ Human Rights Watch ឲ្យដឹងក្នុងសេចក្ដីថ្លែងការណ៍ថា៖ «បណ្ដាប្រទេសដែលចូលរួមកិច្ចប្រជុំកំពូលស្ដីពីប្រព័ន្ធផ្សព្វផ្សាយអាស៊ី និងអង្គការយូណេស្កូផង គួរជួបលោក ហ៊ុន សែន និងអំពាវនាវជាសាធារណៈ ដោយសុំឲ្យប្រព័ន្ធផ្សព្វផ្សាយឯករាជ្យបើកដំណើរការឡើងវិញ និងបញ្ឈប់ការយាយីលើក្រុមអ្នកសារព័ត៌មាន»។
អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន លោក មាស សុភ័ណ្ឌ ច្រានចោលសេចក្ដីសេចក្ដីថ្លែងការណ៍របស់អង្គការសិទ្ធិមនុស្សអន្ដរជាតិមួយនេះ ថាមិនឆ្លុះបញ្ចាំងការពិតនៅកម្ពុជា។
លោកអះអាងថា រដ្ឋាភិបាលបានខិតខំលើកកម្ពស់សិទ្ធិសេរីភាពសារព័ត៌មានជាបន្ដបន្ទាប់ និងថា វិធានការរបស់រដ្ឋាភិបាលនាពេលកន្លងមក គឺជាការអនុវត្តច្បាប់ និងពង្រឹងនីតិរដ្ឋតែប៉ុណ្ណោះ។
លោក មាស សុភ័ណ្ឌ មានប្រសាសន៍ថា៖ «ខ្ញុំគិតថា របាយការណ៍នេះមិនបានឆ្លុះបញ្ចាំងពីស្ថានភាព និងបរិយាកាសសេរីភាពសារព័ត៌មាននៅកម្ពុជានោះទេ។ បើយើងក្រឡេកមើលសេរីភាពសារព័ត៌មាននៅកម្ពុជា មានការលើកកម្ពស់ជាលំដាប់ពីមួយថ្ងៃទៅមួយថ្ងៃ។ ប្រព័ន្ធផ្សព្វផ្សាយមានការរីកចម្រើនទាំងវិសាលភាពនៃការផ្សព្វផ្សាយ និងមធ្យោបាយនៃការផ្សព្វផ្សាយ»។
ប្រធានផ្នែកស៊ើបអង្កេតរបស់អង្គការលីកាដូ លោក អំ សំអាត យល់ផ្សេងពីរដ្ឋាភិបាល ដោយថា វិធានការអនុវត្ដច្បាប់កាលពីពេលកន្លងមក បានធ្វើឲ្យប៉ះពាល់ដល់សេរីភាពបញ្ចេញមតិ និងប្រព័ន្ធផ្សព្វផ្សាយឯករាជ្យនៅក្នុងប្រទេស។
លោកថា រដ្ឋាភិបាលត្រូវមានឆន្ទៈពិតប្រាកដក្នុងការបើកលំហសេរីភាពសារព័ត៌មាន និងអនុញ្ញាតឲ្យពួកគេបំពេញតួនាទីដោយសេរី និងគ្មានការគំរាមកំហែង។
លោក អំ សំអាត បន្ដថា៖ «សេរីភាពសារព័ត៌មានមិនមែនថា យើងមានវិទ្យុច្រើន មានទូរទស្សន៍ច្រើន យើងថា អាហ្នឹងវាជាលំហទេ។ ពាក្យថា «លំហ» បានន័យថា ការចូលរួមអំពីអ្នកសារព័ត៌មានដែលមាននិន្នាការឯករាជ្យបានច្រើន វាមានតុល្យភាពនឹងគ្នា»។
យោងតាមរបាយការណ៍ស្តីពី «សន្ទស្សន៍សេរីភាពសារព័ត៌មានពិភពលោក ឆ្នាំ២០១៩» ដែលចេញផ្សាយ កាលពីខែមេសាកន្លងទៅ អង្គការអ្នករាយការណ៍គ្មានព្រំដែន Reporters without Border ដែលជាអង្គការមានមូលដ្ឋាននៅប្រទេសបារាំងនេះ បានទម្លាក់ចំណាត់ថ្នាក់កម្ពុជានៅលេខរៀង ១៤៣ ក្នុងចំណោមប្រទេស១៨០ លើពិភពលោក។
ពិន្ទុនេះបង្ហាញថា កម្ពុជាធ្លាក់ចុះមួយលេខទៀត បើធៀបនឹងឆ្នាំ២០១៨ ដែលកម្ពុជាទទួលបានចំណាត់ថ្នាក់១៤២ និងធ្លាក់ចុះដល់ទៅ ១១លេខ បើធៀបនឹងឆ្នាំ២០១៧ ដែលកម្ពុជាមានចំណាត់ថ្នាក់ ១៣២ ក្នុងចំណោមប្រទេស ១៨០។
ក្នុងរបាយការណ៍របស់ខ្លួននោះ អង្គការអ្នករាយការណ៍គ្មានព្រំដែន បានកត់សំគាល់អំពីភាពស្ងៀមស្ងាត់នៅក្នុងការបោះឆ្នោតឆ្នាំ២០១៨ ក្រោយរដ្ឋាភិបាលបិទស្ថានីយ៍វិទ្យុប្រមាណ ៣០ កាលពីអំឡុងបោះឆ្នោតឃុំ-សង្កាត់ ឆ្នាំ២០១៧៕