មន្ត្រីនគរបាលខេត្តកំពង់ស្ពឺ អះអាងថា កម្មការិនី១០នាក់រងរបួសធ្ងន់ និង៦នាក់រងរបួសស្រាល បន្ទាប់ពីរថយន្តដឹកស៊ីម៉ង់ត៍មួយគ្រឿងបុកជាមួយរថយន្តដឹកកម្មករ នៅឃុំពោធិ៍ម្រាល ស្រុកបរសេដ្ឋ ខេត្តកំពង់ស្ពឺ នៅព្រឹកនេះ។
ស្នងការរងនគរបាលខេត្តកំពង់ស្ពឺ លោក តាប់ លន បានប្រាប់ វី.អូ.ឌី ថា រថយន្តដឹកស៊ីម៉ង់ត៍មួយគ្រឿងបានបុកជាមួយរថយន្តតូរីសដឹកកម្មកររោងចក្រចំនួន៣៥នាក់ ក្នុងទិសដៅបញ្ច្រាសទិសគ្នា ដោយបណ្តាលឲ្យកម្មករ ១៦នាក់រងរបួសធ្ងន់ និងស្រាល។
មន្ត្រីនគរបាលរូបនេះ បានឲ្យដឹងទៀតថា កម្មករ-កម្មការិនីរងគ្រោះទាំងនោះ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកខេត្តកំពង់ស្ពឺ២នាក់ និងខេត្តតាកែវ១៤នាក់ ហើយថា សមត្ថកិច្ចកំពុងតាមចាប់អ្នកបើកបររថយន្តដឹកស៊ីម៉ង់ត៍មកដោះស្រាយតាមច្បាប់។
លោក តាប់ លន បន្ថែមថា៖ «រថយន្តដឹកស៊ីម៉ង់ត៍ជាអ្នកបង្ក វាបានបើកទៅបុករថយន្តដឹកកម្មករ ហើយអ្នកបើកបររថយន្តដឹកធន់ធ្ងន់ហ្នឹង ក្រោយកើតហេតុបានចុះរត់គេចខ្លួនបាត់។ ករណីនេះ សមត្ថកិច្ចយើងកំពុងស្រាវជ្រាវ ដើម្បីចាប់អ្នកបើកបរហ្នឹងមកចាត់ការតាមនីតិវិធី »។
ថ្លែងក្នុងទិវាសប្តាហ៍ជាតិសុវត្ថិភាពចរាចរណ៍លើកទី១២ នៅខេត្តត្បូងឃ្មុំ នៅថ្ងៃទី១១ ខែមិថុនាឆ្នាំ២០១៩នេះ រដ្ឋមន្រ្តីក្រសួងមហាផ្ទៃ លោក ស ខេង មានប្រសាសន៍ថា បញ្ហាគ្រោះថ្នាក់ចរាចរណ៍ឈានដល់កម្រិតជិតប្រកាសអាសន្នហើយ ដោយថា បញ្ហាគ្រោះថ្នាក់ចរាចរណ៍រយៈពេល ៦ខែកន្លងមកនេះ ពុំមានការថយចុះឡើយ៕
